މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ޑެޕިއުޓީ މިނިސްޓަރުގެ މަޤާމުގައި ހުންނެވި ޝިމާޛް ޢަލީއަށް ފިޔަވަޅު އެޅުމުގެ ކުރިން ކުރެވޭ ތުހުމަތުތައް ރަނގަޅަށް ތަހުގީގު ކުރުމަށް އޭނާ ނިސްބަތްވާ ޕާޓީ، އެމްއާރްއެމް އިން ގޮވާލައިފިއެވެ. 

ޝިމާޛް ޢަލީ އަށް ކުރެވޭ ތުހުމަތު ތަކާއި ގުޅޭ ގޮތުން އެމްއާރްއެމް އިން ނެރުނު ނޫސް ބަޔާނެއް ބުނީ އޭނާއަށް ކުރެވޭ ތުހުމަތު ތަކަކީ އެޕާޓީއިން ކަންބޮޑުވާ ބާވަތުގެ ކަންތައް ކަމަށެވެ.

އަދި އެމް.އާރް.އެމް އަކީ ކޮރަޕްޝަންއާ ދެކޮޅަށް ވަކާލާތުކޮށް ކޮރަޕްޝަން ހުއްޓުވުމަށް އަބަދުވެސް މަސައްކަތް ކުރަމުން ގެންދާ ޕާޓީއެއް ކަން ފާހަގަކޮށް އެޕާޓީން ބުނީ، އެފަދަ މައްސަލަތައް ތަހުގީގުކޮށް ބެލުމަށް ހެދިފައިވާ މުއައްސަސާތަކުން ފުރިހަމަ ތަހުޤީޤެއް ހިންގުމަށްފަހު މެނުވީ އެކަމުގައި ގޮތެއް ނިންމުމަކީ ރަގަޅު ގޮތެއް ނޫން ކަމުގައި ޕާޓީ އިން ދެކޭ ކަމަށެވެ.

މިއާއެކު އެބަޔާނުގައި ވަނީ، ތުހުމަތު ކުރެވިފައިވާ ފަދަ ބޮޑެތި ކަންތައްތައް މިސަރުކާރުގެ ވުޒާރާއެއްގައި ހިނގަމުންދާކަމަށް ތުހުމަތު ކުރެވުމަކީ މިޕާޓީއިން ވަރަށް ކަންބޮޑުވާ ކަމެއް ކަމަށާ މިފަދަ ކަންކަން ކުރަމުންދާ ކަމަށްވާނަމަ، އެކަންކަން ކުރަމުން އައިސްފައިވަނީ ކިހާ ދުވަހަކަށް އަދި ކިހާ ބައެއްގެ ބައިވެރިވުމާ އެކުގައިކަންވެސް ހާމަވާނީ ކަމާބެހޭ ފަރާތަތްތަކުން ކުރެވޭ ފުރިހަމަ ތަހުޤީޤަކަށްފަހުކަމަށް އެ ޕާޓީން ގަބޫލު ކުރާކަމަށެވެ.

މީގެއިތުރުން، ޝިމާޛް ޢަލީ އަކީ އެމްއާރުއެމްގެ ސްލޮޓެއްގައި މަޤާމުގައި ހުންނެވި ފަރާތަކަށްވާތީ އެމް.އާރް.އެމްގެ އެތެރޭގެ އުޞޫލުތަކާ އެއްގޮތްވާ ގޮތުގެ މަތިން، މި ތުހުމަތު ތަކާ ގުޅޭގޮތުތުން އިތުރު މަޢުލޫމާތު ސާފުކޮށް ޝިމާޛް އަށް ޖަވާބުދާރީ ވުމުގެ ފުރުޞަތު ދިނުމަށްފަހު ޕާޓީން ގޮތެއް ނިންމާނެ ކަމަށްވެސް އެ ބަޔާނުގައި ބުނެފައިވެއެވެ.