ކޮންމެ އަހަރެއްގެވެސް ނޮވެމްބަރު 3 ވަނަ ދުވަހު ރާއްޖޭގައި ފާހަގަކުރާ ނަސްރުގެ ދުވަސް، ފާހަގަކުރުމަށް ރަށްރަށުގެ ކައުންސިލް ތަކަށް ނާންގާ ހަމައެކަނި ސަރުކާރަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރު ކަމަށް ގުރައިދޫ ކައުންސިލްގެ ރައީސް ހުސައިން ޔާމީން މުހައްމަދު ވިދާޅުވެއްޖެއެވެ. 

1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހު ދިވެހިންނަށް ޣައްދާރުވި ބާގީންނާއި ތަމަޅަ ޓައިގަރުން ރާއްޖެ އަރައި 19 ދިވެހިން ޝަހީދުކޮށްލި އެދުވަހު ދިވެހި ސިފައިންނާއި ދިވެހިން ދެއްކެވި ހިތްވަރުގެ ހަނދާން އައު ކުރުމުގެ ގޮތުން ކޮންމެ އަހަރަކުވެސް ނޮވެމްބަރު 3 ވަނަ ދުވަހު ސަރުކާރުން ގިނަ ހަރަކާތްތަކެއް ކުރިއަށް ގެންދެއެވެ. 

އެހެންނަމަވެސް، މިސަރުކާރު އައި ފަހުން، ނަސްރުގެ ދުވަހު ދިދަދަމައި ޒީނަތްތެރި ކުރުން ފަދަ ކަންކަން ކުރާ ތަނެއް ނުފެނެއެވެ. 

އެކަމާއި ގުޅިގެން ގުރައިދޫ ކައުންސިލްގެ ރައީސް، ޔާމީން ކުރެއްވި ޓުވީޓެއްގައި ވިދާޅުވީ، ކައުންސިލްގައި ވޭތުވެ މިދާ 10 އަހަރުތެރޭވެސް ނަސްރުގެދުވަސް ރަށްރަށުގެ ފެންވަރުގައި ފާހަގަކުރުމުގެ ގޮތުން ކަމެއްކުރުމަށް ސަރުކާރުން ނާންގާ ހަމައެކަނި ވެރިކަމަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ވެރިކަަން ކަމަށެވެ. 

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ވެރިކަން އައި ފަހުން، ނަސްރުގެ ދުވަހާއި ގުޅިގެން ސަރުކާރުން ކޮންމެ އަހަރަކު ބާއްވާ ޚާއްސަ ރަސްމީ ޖަލްސާވެސް ނުބާއްވައެވެ. އަދި މީގެ އިތުރުން މާލެއާއި ރަށްރަށުގެވެސް މަގުތަކުގައި ދިދަ ޖަހައި ޒީނަތްތެރިކުރާ ތަނެއްވެސް މިސަރުކާރުގައި ނުފެނެއެވެ.