ދަރިމައިވުމުގެ މައްސަލަ ކުރިމަތިވެފައިވާ ފަރާތްތަކުގެ ތެރެއިން މާލީގޮތުން ދަތިކަން ހުރި ފަރާތްތަކަށް ހާއްސަކޮށްގެން އައިވީއެފް ފަންޑެއް ފާޓިލިޓީ ސަޕޯޓް ކޮމިއުނިޓީގެ ފަރާތުން ލޯންޗްކޮށްފިއެވެ.

މި ފަންޑް ލޯންޗްކޮށްފައިވަނީ ބައިނަލްއަޤްވާމީ ގޮތުން ފާހަގަކުރާ "ވޯރލްޑް ފާރޓިލިޓީ ޑޭ" ގެ މުނާސަބަތުގައި މި ޖަމިއްޔާއިން ބޭއްވި ހާއްސަ ފަންޑްރެއިޒިން ގާލާ ޑިނާގައެވެ. 

"އަ ނައިޓް އޮފް ހޯޕް"ގެ ނަމުގައި ނޮވެމްބަރު މަހުގެ 2 ދުވަހުގެ ރޭ ކުރިއަށްދިޔަ ގާލާގައި މި ފަންޑް ލޯންޗްކޮށްދެއްވީ ޖަމިއްޔާ    އުފެދުނީއްސުރެ މިއަދާ ހަމައަށް ގިނަ އެހީތަކެއް ފޯރުކޮށްދެމުން އަންނަ ފަރާތެއްކަމުގައިވާ މަރިޔަމް ޝެނިން އެވެ.  

Advertisement

އައިވީއެފް ފަންޑަކީ، މާލީ ދަތިތަކާއި ހެދި އިންވިޓްރޯ ފާޓިލައިޒޭޝަން (އައިވީއެފް) ގެ ޓްރީޓްމަންޓް ހެދުމުގެ ފުރުސަތު ލިބިފައިނުވާ ފަރާތްތަކަށް ހާއްސަކޮށްގެން މާލީ އެހީ ފޯރުކޮށްދިނުމަށްޓަކައި ޖަމިއްޔާއިން ހުޅުވާލާ ފަންޑެކެވެ. މި ފަންޑްގެ އެހީގައި ކޮންމެ އަހަރަކުވެސް ދެމަފިރިއަކަށް އައިވީއެފް ހެދުމުގެ ފުރުސަތު އިން ލިބިގެންދާނެ އެވެ. 

ހަމައެއާއެކު, ހަފްލާގައި ވަނީ އިންޑިއާގެ ޔާމީ ފާޓިލިޓީ ކްލިނިކާއި އެކު އިތުރު ދެ ފަރާތަކަށް އައިވީއެފް ހެދުމުގެ ފުރުސަތު ލިބިގެންގޮސްފައެވެ. މިގޮތުން އެކަމަށް ހާއްސަ މެމޮރޮންޑަމް އޮފް އަންޑަސްޓޭސްޑިންއެއްގައިވަނީ ޔާމީ ފާޓިލިޓީ ކްލިނިކާއި އެކު ފާޓިލިޓީ ސަޕޯޓް ކޮމިއުނިޓީގެ ފަރާތުން ސޮއެ ކޮށްފައެވެ. މިގޮތުން, ޖަމިއްޔާގެ ފަރާތުން ސޮއެ ކުރެއްވީ ޖަމިއްޔާގެ ފައުންދާ އަދި ރައީސް އާޝާ ހުސެއިން އެވެ. އަދި ޔާމީ ފާޓިލިޓީ ކްލިނިކްގެ ފަރާތުން ސޮއެ ކުރެއްވީ އެ ކްލިނިކްގެ ފައުންޑާ އަދި ޑިރެކްޓާ ޑރ.ސަންކަލްޕް ސިންގް އެވެ. 

އައިވީއެފް ފަންޑަށް ނަން ހުށަހެޅުމުގެ ފުރުސަތު ހުޅާވެލިފައިވަނީ އުމުރުން 25 އަހަރު ފުރިފައިވާ އަދި މަދުވެގެން ދެ އަހަރުވަންދެން ކައިވެނިކޮށްގެން އުޅޭ ދިވެހި ދެމަފިރިންނަށެވެ. އަދި 25 އަހަރު ނުފުރޭނަމަ ހާއްސަ ހާލަތްތަކެއްގެ ދަށުން ސިއްޚީ ކަންކަމަށް ބަލައި އެ ފުރުސަތު އޮންނާނެ ކަމަށްވެސް އެ ޖަމިއްޔާއިން ބުނެއެވެ. އެޕްލިކޭޝަން ފީގެ ގޮތުގައި 200 ރުފިޔާ ނަގާއިރު, ގުރުއަތުން ހޮވޭ ފަރާތަކަށް ފަންޑް އެވޯޑްކުރުމުގެ ކުރިން ރެކޯޑު ސާފުކުރެވިގެންދާނެ ކަމަށްވެސް ޖަމިއްޔާއިން ބުނެއެވެ. 

މިރޭގެ ހަފްލާގައި ޖަމިއްޔާގެ ބައެއް މެންބަރުންގެ އިންފާޓިލިޓީ ޖޯރނީވެސް ވަނީ ހިއްސާކޮށްފައެވެ. އަދި ދަރިމައިވުމުގެ ދަތިތައް ތަހައްމަލު ކުރާ އަންހެނެއްގެ އިހުސާސްތައް ދައްކުވައިދޭނެ ފަދަ މުނިފޫހިފިލުވުމުގެ އައިޓަމެއް ޑައޮނީސިއެކް އިންވަނީ ހުށަހަޅައިދީފައެވެ. މި ހަފްލާގެ އޮފިށަލް ޕާރޓްނަރުންގެ ގޮތުގައި ވޯލްކް, ޗާންދަލިއާ, ސަން މީޑިއާ, އަދި މަދޮޝިޕް ހިމެނެއެވެ. އަދި ހަފްލާ ބާއްވައިފާ ވަނީ މީރުމާ ހޯލްގައެވެ.