ޕާކިސްތާނުގެ ކުރީގެ ބޮޑުވަޒީރު އިމްރާން ޚާނަށް ދިނީ ފިނޑި ހަމަލާއެއް ކަމަށާ، އެއްވެސް ހާލެއްގައި އަނިޔާވެރިކަމެއް ބަލައެއް ނުގަނެވޭނެ ކަމަށް ސަރުކާރު ހިންގާ ކޯލިޝަންގައި ހިމެނޭ އަދާލަތު ޕާޓީން ބުނެފިއެވެ. 

އިމްރާން ޚާނު އަވަހާރަކޮށްލަން އިއްޔެ ދެވުނު ހަމަލާ ކުށްވެރިކޮށް އަދާލަތު ޕާޓީން ކުރި ޓްވީޓެއްގައި ވަނީ އެ ހަމަލާއަކީ ފިނޑި ހަމަލާއެއްގެ ގޮތުގައި ސިފަ ކޮށްފައެވެ. އަދި މުޖުތަމައުގައި ހިނގާ އެއްވެސް ކަހަލަ އަނިޔާވެރިކަމެއް ބަލައި ނުގަނެވޭނެ ކަމަށާ، އެފަދަ ކަންކަން ހުއްޓުވުމަށް މަސައްކަތް ކުރަންޖެހޭނެ ކަމަށްވެސް އެ ޕާޓީން ބުނެފައިވެއެވެ. މީގެ އިތުރުން ޢިމްރާން އަށާއި އެ ހަމަލާގައި އަނިޔާވި އެންމެނަށް އަވަސް ޝިފާއަކަށް ވެސް ވަނީ އެދިފައެވެ. 

އިމްރާންގެ ގަޔަށް ބަޑިން ހަމަލާދީފައިވަނީ އަވަސް އިންތިހާބަކަށް ގޮވާލާ މުޅި ޕާކިސްތާނުގައި ކުރިއަށް ގެންދާ އެއްވުމުގެ ތެރެއިން ގުޖުރާންވާލާގައި ބޭއްވި އެއްވުމެއްގެ ތެރެއިންނެވެ. އަދި އެ ޕާޓީގެ އޮފިޝަލް އަޒްހަރު މަޝްވާނީ އާއި ހަވާލާދީ އަލްޖަޒީރާއިން ރިޕޯޓް ކޮށްފައިވާ ގޮތުގައި ބަޑިން ދިން ހަމަލާ އަމާޒުވީ އިމްރާންގެ ފަޔަށެވެ. ނަމަވެސް އިމްރާންގެ ހާލު ރަނގަޅު ކަމަށްވެސް އޭނާ ވިދާޅުވިއެވެ. 

އެ އެއްވުމުގެ ތެރެއިން އިމްރާންގެ އިތުރުން އޭނާގެ ސަޕޯޓަރެއްގެ ގަޔަށް ބަޑި ޖެހުމުގެ ސަބަބުން މަރުވެސް ވެފައިވާކަމަށް ރިޕޯޓްތައް ބުނެއެވެ. އަދި އިމްރާން ނިސްބަތްވާ ޕާޓީ ކަމަށްވާ ޕާކިސްތާން ތަހްރީކް އިންސާފް ޕާޓީގެ އެހެން ބައެއް މެންބަރުންނަށްވެސް އަނިޔާވެފައިވެއެެވެ.

އިމްރާން ޚާނަށް ބަޑިން ހަމަލާދިން ކަމަށް ތުހުމަތު ކުރެވޭ މީހާ މިހާރު ހައްޔަރު ކޮށްފައިވާއިރު އޭނާގެ ވީޑިއޯއެއް ފުލުހުން ވަނީ އާއްމު ކޮށްފައެވެ. އަދި އެ ވީޑިއޯގައި އޭނާ ވަނީ އިމްރާން ޚާން ގަޔަށް ބަޑިޖެހު ސަބަބުވެސް ވަނީ ހާމަކޮށްފައެވެ. 

"އޭނާ (އިމްރާން ޚާން) އުޅެނީ އެހެން މީހުން މަގުފުރައްދަން. އަހަރެންނަށް އެކަން ހަޖަމެއް ނުވޭ." އިމްރާން ޚާން ގަޔަށް ބަޑިޖެހި މީހާ ބުނެފައިވެއެވެ.