އެންމެ ބުއްދިވެރި ގޮތަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މޮރިޝަސްގެ ބޮޑު ވަޒީރަށް ފޮނުވި ސިޓީފުޅު މިހާރު ދެއްކެވުންކަމަށާއި، ފަހުން އެ ސިޓީފުޅު ފެންނައިރު ކަންކަން މާ ގޯސް ވާނެކަމަށް ކުރީގެ ބަންޑާރަނައިބު ޑރ މުހައްމަދު މުނައްވަރު ވިދާޅުވެއްޖެއެވެ.
ސަންގު ޓީވީއަށް ދެއްވި އިންޓަވިއުއެއްގައި ޑރ މުވައްވަރު ވިދާޅުވީ ސަރަހައްދާއި ގުޅުންހުރި މައްސަލަތަކަކީ ސިއްރު ކުރެވިގެންވާނެ ކަމެއް ނޫންކަމަށެވެ. އަދި އެއީ އެއްވެސް ހާލަތެއްގައި ސިޔާސީ ކުލަ ޖައްސައިގެންވާނެ ކަމެއް ނޫންކަމަށް ޑރ މުނައްވަރު ވިދާޅުވިއެވެ.
ސަރުކާރުން އެ ސިޓީފުޅު ސިއްރުކުރަން ޖެހިވަޑައިގަންނަވާ ސަބަބާއި ދޭތެރޭގައި ގިނަ ސުވާލުތަކެއް ހުރިކަން ޑރ މުނައްވަރުގެ ވާހަކައިގައި ފާހަގަކުރެއްވިއެވެ. އެއާއެކު ވިދާޅުވީ މިހާރު ސަރުކާރުން އެ ސިޓީ ސިއްރު ކުރިނަމަވެސް، އެ ސިޓީ އަދި ރައްޔިތުންނަށް ހާމަވާނެ ދުވަހެއް އަންނާނެކަމަށެވެ. އެ ހިސާބުން ކަންތައްތައް މާ ގޯސްވާނެކަމަށް ޑރ މުނައްވަރު ވަނީ ވިދާޅުވެފައެވެ.
"ތިޔަ މޮރިޝަސް ބޮޑު ވަޒީރަށް ދެއްވައިގެން އުޅުއްވާ ސިޓީއެއް، ދެއްކެވީމަ އެނގޭނެ ދެއްތޯ ކީއްވެގެންކަން ކޮންމެސް ވަރަކަށް. މީގެ ދެ ދުވަސްކުރިން މޮރިޝަސްގެ ޚާރިޖީ ވަޒީރަށް ނިސްބަތްކޮށް ނޫސްތަކުގައި ލިޔުނު ވާހަކައެއް، އެއީ ރާއްޖެ އެކަން ކުރީ ގޮތް ހުސްވެގެންނޭ، ވަރަށް ގިނަ ސުވާލު އުފެދޭ، ގޮތް ހުސްވުމަކީ ކޮބައިތޯ؟ ބައެއްގެ ދަށުވީތޯ؟ ބަޔަކު ބުނާގޮތަށް އެކަންތައް ކުރަން މަޖުބޫރުވީތޯ؟ އަޅުގަނޑުމެންނަށް މަޖުބޫރު ކުރުވީތޯ؟ ގޮތް ހުސްވާނީ ކިހެނެއް ވީމަ ތޯ؟ އެހެންވީމަ އެ ސިޓީއެއް މިހާރު ދެއްވުން ބުއްދިވެރި. އެ ސިޓީ ނުދެއްވައިފިއްޔާ ފަހުން ފެންނަ އިރު އެހާ ރީއްޗެއް ނުވާނެ"
ކުރީގެ ބަންޑާރަނައިބު ޑރ މުނައްވަރު
ޑރ މުނައްވަރު ވިދާޅުވީ ގައުމީ މަސްލަހަތާއި ގުޅުންހުރި ވާހަކަތައް ދެއްކެވުމުން، އެފަދަ މީހުންނަށް ފުރައްސާރަކުރުމުން އަދި ކަންކަން އިސްލާހު ނުވާނެކަމަށެވެ.
ސީރިއެސްކޮށް ގައުމާއި ދޭތެރޭގައި ވިސްނަން ޖެހޭ ކަންތައްތަކެއް ހުރިކަން ޑރ މުނައްވަރު ފާހަގަކުރެއްވިއެވެ. ދިވެހިރާއްޖެއަކީ ކުޑަ ކުޑަ ގައުމެއްކަމަށާއި، މި ގައުމުގައި ސިއްރުން ކަންތައްތަކެއް ހިންގުމަކީވެސް އުނދަގޫކަމެއްކަން ހަނދުމަކޮށްދެއްވާކަމަށް ޑރ މުނައްވަރު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
