އެންމެ ބުއްދިވެރި ގޮތަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މޮރިޝަސްގެ ބޮޑު ވަޒީރަށް ފޮނުވި ސިޓީފުޅު މިހާރު ދެއްކެވުންކަމަށާއި، ފަހުން އެ ސިޓީފުޅު ފެންނައިރު ކަންކަން މާ ގޯސް ވާނެކަމަށް ކުރީގެ ބަންޑާރަނައިބު ޑރ މުހައްމަދު މުނައްވަރު ވިދާޅުވެއްޖެއެވެ. 

ސަންގު ޓީވީއަށް ދެއްވި އިންޓަވިއުއެއްގައި ޑރ މުވައްވަރު ވިދާޅުވީ ސަރަހައްދާއި ގުޅުންހުރި މައްސަލަތަކަކީ ސިއްރު ކުރެވިގެންވާނެ ކަމެއް ނޫންކަމަށެވެ. އަދި އެއީ އެއްވެސް ހާލަތެއްގައި ސިޔާސީ ކުލަ ޖައްސައިގެންވާނެ ކަމެއް ނޫންކަމަށް ޑރ މުނައްވަރު ވިދާޅުވިއެވެ. 

ސަރުކާރުން އެ ސިޓީފުޅު ސިއްރުކުރަން ޖެހިވަޑައިގަންނަވާ ސަބަބާއި ދޭތެރޭގައި ގިނަ ސުވާލުތަކެއް ހުރިކަން ޑރ މުނައްވަރުގެ ވާހަކައިގައި ފާހަގަކުރެއްވިއެވެ. އެއާއެކު ވިދާޅުވީ މިހާރު ސަރުކާރުން އެ ސިޓީ ސިއްރު ކުރިނަމަވެސް، އެ ސިޓީ އަދި ރައްޔިތުންނަށް ހާމަވާނެ ދުވަހެއް އަންނާނެކަމަށެވެ. އެ ހިސާބުން ކަންތައްތައް މާ ގޯސްވާނެކަމަށް ޑރ މުނައްވަރު ވަނީ ވިދާޅުވެފައެވެ. 

Advertisement

ޑރ މުނައްވަރު ވިދާޅުވީ ގައުމީ މަސްލަހަތާއި ގުޅުންހުރި ވާހަކަތައް ދެއްކެވުމުން، އެފަދަ މީހުންނަށް ފުރައްސާރަކުރުމުން އަދި ކަންކަން އިސްލާހު ނުވާނެކަމަށެވެ. 

ސީރިއެސްކޮށް ގައުމާއި ދޭތެރޭގައި ވިސްނަން ޖެހޭ ކަންތައްތަކެއް ހުރިކަން ޑރ މުނައްވަރު ފާހަގަކުރެއްވިއެވެ. ދިވެހިރާއްޖެއަކީ ކުޑަ ކުޑަ ގައުމެއްކަމަށާއި، މި ގައުމުގައި ސިއްރުން ކަންތައްތަކެއް ހިންގުމަކީވެސް އުނދަގޫކަމެއްކަން ހަނދުމަކޮށްދެއްވާކަމަށް ޑރ މުނައްވަރު ވަނީ ވިދާޅުވެފައެވެ.