އިންޑިއާ ސިފައިން ރާއްޖޭގައި ތިބި ތިބުމަކީ މިނިވަންކަމަށް އޮތް ނުރައްކަލެއްކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
އެމަރު މިފަދައިން ވިދާޅުވެފައިވަނީ ނަސްރުގެ ދުވަހާ ގުޅުވައި، "ކުރި ޖިހާދު- ކުރަން އޮތް ޖިހާދު" ގެ ނަމުގައި ދިވެހި ނޭޝަނަލް އެކްޝަން (ޑީއެންއޭ) އިން ރޭ ބޭއްވި ޖަލްސާގައި ވާހަކަދައްކަވަމުންނެވެ.
އެ ޖަލްސާގައި ވާހަކަދައްކަވަމުން އުމަރު ވަނީ ރާއްޖޭގެ މިނިވަންކަން ދިފާއުކުރުމަށް ކުރަންޖެހޭ މުހިންމު ކަންކަމަށް އަލިއަޅުވާލައްވާފައެވެ.
އެގޮތުން އުމަރު ވިދާޅުވީ މިނިވަންކަން ދިފާއުކުރުމަށް ރާއްޖޭގެ އެކި ސަރަހައްދުތަކުަގއި އެކި ނަންނަމުގައި އައިސްތިބި އިންޑިއާ ސިފައިން އަނބުރާ ފޮނުވާލަން ޖެހޭކަމަށެވެ. އެމީހުން ރާއްޖޭގައި ތިބި ތިބުމަކީ ރާއްޖޭގެ މިނިވަންކަމަށް އޮތް ވަރަށް ބޮޑު ނުރައްކަލެއްކަމަށް އުމަރު ވިދާޅުވިއެވެ.
"މިމީހުން މި ދަނީ ބިސް އަޅަމުން، އެމީހުން އެދަނީ ވިޔަފާރިތަކާއި ސަލާމަތީ ކަންކަމާއި، ޚާރިޖީ ކަންކަމުގެ ތެރެއަށް ވަންނަމުން، މިވަރުގެ ބާރުގަދަ ގައުމެއްގެ ލަޝްކަރެއް، ދިވެހިރާއްޖޭގައި ގާއިމުވެ ތިބުމަކީ އަޅުގަނޑުމެންނަށް ނުރައްކަލެއް، މިކަމާ އަޅުގަނޑުމެން ހޭލަން ޖެހޭ، އެކި ގައުމުތައް އަޅުވެތިކުރަން ފެށި ގޮތް އަޅުގަނޑުމެން ޖެހޭ ތާރީހީ ފަތްފުށްތަކުން ބަލަން"
ކުރީގެ ހޯމް މިނިސްޓަރު އުމަރު ނަސީރު
ތާރީހުގައި ގައުމުތައް އަޅުވެތިކޮށްފައިވާ ބައެއް ގޮތްތަކަށްވެސް އުމަރު ވަނީ އަލުއަޅުވާލައްވާފައެވެ.
އެގޮތުން އޭނާ ވިދާޅުވީ އިނގިރޭސިން އިންޑިއާ އަޅުވެތި ކުރީ ވިޔަފާރީގެ ނަމުގައިކަމަށެވެ. އިނގިރޭސިން އިންޑިއާ އަޅުވެތި ކުރީ ވިޔަފާރި ކުރުމުގެ ނަމުގައި އީސްޓް އިންޑީސް ކިޔާ ކުންފުންޏެއް ހަދާ މަޑުމަޑުން އެ ކުންފުނި ހަނގުރާމަވެރި ބަޔަކަށް ބަދަލުކޮށްގެންކަމަށް އުމަރު ވިދާޅުވިއެވެ. އަދި އިންޑިއާއަށް އެރި އިނގިރޭސި ސިފައިން އެގައުމުން ބޭލުނީ 200 އަހަރު ފަހުންކަމަށްވެސް އުމަރު ވިދާޅުވިއެވެ.
ގައުމުތައް އަޅުވެތި ކުރަނީ ވަރަށް ހީލަތްތެރި ރޭވުންތަކުގެ ތެރެއިންކަމަށާއި މިހާރު މި ގައުމުގައި ހިނގަމުންދާ ކަންކަމާއި ދޭތެރޭވެސް ރައްޔިތުން ވަރަށް ބޮޑަށް ފާރަވެރިވާން ޖެހޭކަމަށް އުމަރު ނަސީރު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
