ރ. އަތޮޅު ކައުންސިލުން މުޅި އެ އަތޮޅަށް ހުޅުވާލައިގެން ބާއްވާ ފުޓްސަލް މުބާރާތުގައި ހުކުރު ދުވަހުގެ މެޗުތައް ހުޅުދުއްފާރާއި އިނގުރައިދޫ އަދި ދުވާފަރު ކާމިޔާބުކޮށްފި އެވެ.
ބުރާސްފަތި ދުވަހު ފެށި މުބާރާތް ކުރިޔަށްދަނީ ޖުމްލަ 10 ޓީމު ދެ ގްރޫޕަކަށް ބަހާލުމަށްފަހު އެވެ. ކޮންމެ ދުވަހެއްގެ ހަވީރު ދެ މެޗު ކުޅޭއިރު ބައެއް މެޗުތައް ރޭގަނޑު ވެސް ކުޅޭނެއެވެ.
މުބާރާތުގެ ގްރޫޕް އޭ ގައި ހިމެނޭ ޓީމުތަކަކީ ރަސްމާދޫ، އިންނަމާދޫ، މަޑުއްވަރީ، ވާދޫ އަދި އިނގުރައިދޫ އެވެ. ގުރޫޕް ބީ ގައި ހިމެނޭ ޓީމުތަކަކީ އަލިފުށި، މާކުރަތު، ހުޅުދުއްފާރު، މީދޫ، އަދި ދުވާފަރެވެ.
ހުކުރު ދުވަހު ހަވީރު ކުޅުނު ފުރަތަމަ މެޗުގައި ބައްދަލުކުރީ ގްރޫޕް ބީ ގެ ހުޅުދުއްފާރާއި މާކުރަތެވެ. މި މެޗު 3-1 އިން ކާމިޔާބުކޮށްފައި ވަނީ ހުޅުދުއްފާރެވެ. ހަވީރު ކުޅުނު އިނގުރައިދޫ އާއި ވާދޫ އެވެ. މި މެޗު 6-1 ގެ ތަފާތު ބޮޑު ނަތީޖާއަކުން އިނގުރައިދޫ މެޗު ކާމިޔާބުކުރި އިރު، ހުކުރު ދުވަހުގެ ރޭގަނޑު ކުޅުނު މެޗު 2-0 އިން ކާމިޔާބުކުރީ ދުވާފަރެވެ. މިއީ މުބާރާތުގައި ދުވާފަރުގެ ދެވަނަ މޮޅެވެ.
އުނގޫފާރުގައި ކުރިޔަށްދާ މި މުބާރާތުގެ ފުރަތަމަ ދުވަހު ވެސް ވަނީ ފޯރިގަދަ ތިން މެޗު ކުޅެފައެވެ. މުބާރާތް ފެށުމުގެ ގޮތުން އެންމެ ފުރަތަމަ ކުޅުނު މެޗުގައި ބައްދަލުކުރީ ވާދޫ އާއި ރަސްމާދޫއެވެ. މި މެޗް ރަސްމާދޫން ކާމިޔާބުކުރީ 2-1 އިންނެވެ. ދެވަނަ މެޗްގައި ބައްދަލުކުރީ ދުވާފަރާއި އަލިފުއްޓެވެ. މި މެޗް ފަސޭހަކަމާއިއެކު 4-0 އިން ކާމިޔާބުކުރީ ދުވާފަރުންނެވެ. އަދި އެ ރޭ އިންނަމާދޫ އާއި މަޑުއްވަރި ބައްދަލުކުރި މެޗު ނިމުނީ ލަނޑެއް ނުޖެހި އެއްވަރުވެގެންނެވެ.
މުބާރާތުގައި ހޮނިހިރު ދުވަހުވެސް ފޯރިގަދަ ތިން މެޗު ކުޅޭނެއެވެ. ފުރަތަމަ މެޗުގައި އެ ދުވަހުގެ ހަވީރު 16:00 ގައި ބައްދަލުކުރާނީ މަޑުއްވަރި އަދި ރަސްމާދޫ އެވެ. ދެވަނަ މެޗުގައި 17:00 ގައި ބައްދަލުކުރާނީ ހުޅުދުއްފާރާއި އަލިފުއްޓެވެ.
Advertisement
This content is created and paid for by advertisers and does not involve Voice Journalists
