ރާއްޖޭގައި ތަފާތު ދީންތަކުގެ އަޅުކަންކުރުމުގެ މިނިވަންކަން ދިނުމުގެ ވަގުތު ޖެހިއްޖެ ކަމަށް ބުނެ އިންޑިއާގެ ނޫހެއް ކަމުގައިވާ މަންގަލޯރިއަނުން ގޮވާލައިފިއެވެ.

ދާދި ފަހުން އެފްކޮންސް ކުންފުނިން އައްޑޫ ސިޓީގެ މަގުތައް ހެދުމުގެ މަޝްރޫޢު ފެށުމަށް ހިންދޫ ދީނުގެ އަޅުކަމެއް ކުރި މައްސަލަ އިސްލާމިކް މިނިސްޓްރީން ފުލުހަށް ހުށަހަޅާފައިވާ ކަަމަށް"ޓައިމްސް އޮފް އައްޑޫ" އިން ރިޕޯޓް ކޮށްފައިވާ ކަން ފާހަގަކޮށް، އިންޑިއާގެ އެ ނޫހުގައި ބުނީ، މިނިސްޓްރީން އެ މައްސަލަ ހުށަހަޅާފައިވަނީ، އެއީ ދިވެހިރާއްޖޭގެ ގާނޫނާއި، އިސްލާމްދީނާއި ފުށުއަރާ ޢަމަލެއް ކަމަށް ބުނެފައި ކަމަށެވެ. އަދި އިސްލާމިކް މިނިސްޓްރީން އެފަދަ ފިޔަވަޅެއް އަޅާފައިވަނީ، ރާއްޖޭގައި ދީނާއި ޚިލާފް އެއްވެސް ކަމެއް ކުރާ ނަމަ، އެކަމާއި ދެކޮޅަށް ފިޔަވަޅު އަޅުއްވާނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވި ފަހުންކަންވެސް އެ ނޫހުން ފާހަގަކޮށްފައިވެއެވެ.  

" އިންޑިއާ އަކީ ރާއްޖޭގެ އުމްރާނީ ތަރައްގީއަށް ބޮޑެތި އެހީތަކެއް ވަމުން އަންނަ ގައުމެއް" ތިލަމާލެ ބްރިޖު އެޅުމަށް ރާއްޖެ އާއި އިންޑިއާ އާއި އެކު ވެވުނު އެއްބަސްވުމަށް އިޝާރާތް ކޮށް އެ ނޫހުގައި އިތުރަށް ބުނެފައިވެއެވެ.

Advertisement

މިއާއެކު އެ ނޫހުން ބުނީ، ދިވެހިރާއްޖެއަކީ ދީނުގެ ކަންކަން ތަންފީޒުކުރުމުގައި އަބަދުވެސް ގަލްފް ޤައުމުތަކަށް ތަބާވާ ގައުމަކަށް ވާއިރު ގަލްފްުގެ ބައެއް ޤައުމުތަކުގައިވެސް އެހެން ދީންތަކަށް މިނިވަންކަން ދޭން ފަށާފައިވާ ކަމަށެވެ. އެގޮތުން އެކުވެރި ޢަރަބި އިމާރާތުން އެ ޤައުމުގެ ހަފުތާ ބަންދުތައް ހުކުރު ހޮނިހިރުގެ ބަދަލުގައި ހޮނިހިރު އާދީއްތައަށް ބަދަލުކޮށްފައިވާކަމަށާއި، ބަހުރެއިނާއި އޮމާން އަދި އެމިރޭޓްސްގެ ބައިނަލްއަޤުވާމީ އިޤުތިޞާދާ ފައިހަމަކުރުމުގެ ގޮތުން ދީނުގެ އަސަރު ކުޑަކުރަމުން އަންނަ ކަމަށް އެ ނޫހުގެ ލިޔުމުގައި ފާހަގަކުރިއެވެ.

އެހެންނަމަވެސް އެފަދަ އެއްވެސް ބަދަލެއްގެ އަސަރެއް ރާއްޖެއިން ނުފެންނަކަން ފާހަގަކޮށް އެ ނޫހުން ބުނީ ރާއްޖެ ދަނީ ހަރުކަށިކަމާއި ހައްދުފަހަނައެޅުމާ ދިމާލަށް ކަމަށެވެ. އެގޮތުން ބިލެއްދޫގައި ހިންދޫ ދީނުގެ އަޅުކެއް ކުރި އިންޑިއާ ބަޔަކާމެދު ތަހުގީގެއް ހިންގާފައިވާކަމަށްވެސް އެ ނޫހުގައި ފާހަގަކޮށްފައިވެއެވެ.

އަދި މީގެ އިތުރުން، 2018 ވަނަ އަހަރު، ގާނޫނާއި ޚިލާފަށް ސިއްރު ފެންފުށީގެ ފަޮުތެރޭގައި ބަހައްޓާފައި ހުރި ބުދުތައް، ރައީސް ޔާމީންގެ ސަރުކާރުގައި އެމްއެންޑީއެފުން ގޮސް ހަލާކުކޮށްލި ކަންވެސް އެ ރިޕޯޓުގައި ފާހަގަކޮށްފައިވެއެވެ.