ރާއްޖެއާއި ސަރބިއާއާ ދެމެދު އޮން-އެރެއިވަލް ވިސާ ހަމަޖެއްސުމާމެދު މިނިސްޓަރ އޮފް ފޮރިންގ އެފެއާޒް ޝާހިދު، ސާބިއާގެ ފަސްޓް ޑެޕިއުޓީ ޕްރައިމް މިނިސްޓަރ އަދި މިނިސްޓަރ އޮފް ފޮރިންގ އެފެއާޒް އޮފް ދަ ރިޕަބްލިކް އޮފް ސަރބިއާ، އިވިއްސާ ޑޭސިކްއާ މަޝްވަރާ ކުރައްވައިފިއެވެ. 

މިނިސްޓަރު ޝާހިދު ސާބިއާއަށް ކުރެއްވި ދަތުރުގައި ސާބިއާގެ ފޮރިން މިނިސްޓަރަކާއެކު ބޭއްވި ބައްދަލުކުރެއްވުމުގައި އެމަނިކުފާނު ވަނީ ދެޤައުމުގެ ގުޅުން އިތުރަށް ބަދަހިކުރުމާއި ގުޅޭގޮތުން ފުޅާދާއިރާއެއްގައި މަޝްވަރާކުރައްވާފައެވެ. މިގޮތުން ރާއްޖެއާއި ސަރބިއާއި އާއި ދެމެދު ވިސާ ނެގުމެއް ނެތި ދަތުރުކުރެވޭނެ ގޮތެއް ހޯދުމަކީ މުހިއްމުކަމެއްކަމަށް މިނިސްޓަރ ޝާހިދު ވިދާޅުވިއެވެ. އަދި އޭގެ ސަބަބުން ދެޤައުމުގެ ރައްޔިތުންގެ ދެމެދުގައި ގުޅުން ބަދަހިވެ، ފަތުރުވެރިކަމުގެ ދާއިރާއިން ދެޤައުމުގެ ގުޅުން މިހާރަށްވުރެ ބޮޑަށް ބަދަހިވެގެންދާނޭކަމަށްވެސް ޝާހިދު ފާހަގަކުރެއްވިއެވެ.

މިނިސްޓަރުގެ ޝާހިދުގެ ވާހަކައާއި ގުޅިގެން، ރާއްޖެއާއި ސަރބިއާއި އާއި ދެމެދު އޮންއެރައިވަލް ވީސާ ހަމަޖެއްސުމާއި ގުޅޭގޮތުން ސަރބިއާ ސަރުކާރުން މަޝްވަރާކުރާނެކަމަށް އެ ޤައުމުގެ ހާރިޖީ ވަޒީރު ވިދާޅުވިއެވެ.

Advertisement

މީގެ އިތުރުން، މިނިސްޓަރު ޝާހިދު ސާބިއާއަށް ކުރެއްވި ދަތުރުގައި ތަޢުލީމީ ދާއިރާއާއި ޒުވާނުން ބާރުވެރިކުރުވުމާއި ސިއްޙީ ދާއިރާއާއި ފަތުރުވެރިކަމުގެ ދާއިރާއިން ދެ ގައުމު ދެމެދު ގުޅުން ބަދަހިކުރުމާއި ގުޅޭގޮތުން ވަނީ މަޝްވަރާކޮށްފައެވެ.

އެގޮތުން ސަރބިއާއިން ރާއްޖެއަށް ފޯރުކޮށްދޭ ސްކޯލަރޝިޕްގެ ފުރުސަތުތައް އިތުރުކުރުމަށާ، ކުޅިވަރުގެ ދާއިރާއިން 20 އާއި 25 އާއި ދެމެދުގެ ޢަދަދަކަށް ކުޅުންތެރިކަން ތަމްރީންކުރުމުގެ ފުރުސަތު ދިނުމަށް ތައްޔާރަށް އޮތްކަންވެސް އެގައުމުންވަނީ ހާމަކޮށްފައެވެ. 

ފޮރިންގ މިނިސްޓަރ ސަރބިއާއަށް ވަޑައިގަތީ އެޤައުމުގެ ފަސްޓް ޑެޕިއުޓީ ޕްރައިމް މިނިސްޓަރ އަދި މިނިސްޓަރ އޮފް ފޮރިންގ އެފެއާޒް އޮފް ދަ ރިޕަބްލިކް އޮފް ސަރބިއާ އިވިއްސާ ޑޭސިކްގެ ދަޢުވަތަކަށެވެ.