ރައީސް ޞާލިހު މޮރިޝަސް އަށް ފޮނުއްވި ސިޓީގެ ތަފްސީލް ދެއްވައިފި!
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް މޮރިޝަސްގެ ބޮޑުވަޒީރަށް ފޮނުއްވެވި ސިޓީފުޅުގެ ތަފްސީލް ފޮރިން މިނިސްޓަރ ޝާހިދު ދެއްވައިފިއެވެ.
ރާއްޖެއާއި ޗާގޯސްގެ ކަނޑުގެ ސަރަހައްދު ފުށުއަރާ މައްސަލައާއި ގުޅޭގޮތުން މަޢުލޫމާތު ހިއްސާކުރުމަށް ރޭ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޝާހިދު ވިދާޅުވީ، ރައީސް ޞާލިހް މޮރިޝަސްގެ ބޮޑުވަޒީރު ޕްރަވިންދް ޖުގާނަތްއަށް ފޮނުއްވާފައިވާ ސިޓީފުޅު ސަރުކާރުން އެފަދަ ލިއެކިއުންތައް ހާމަކުރުމަށް އޮންނަ އުސޫލުގެ ތެރެއިން ހާމަކުރައްވާނެ ކަމަށެވެ.
އެގޮތުން، އެ ސިޓީފުޅުގެ ތަފްސީލް ދެއްވުމުގެ ކުރިން ޝާހިދު ވަނީ، 2017 ވަނަ އަހަރު މޮރިޝަސް އިން އދ. އަށް ހުށަހެޅުއްވި ގަރާރަށް އަލިއަޅުވާލެއްވާފައެވެ. އެގޮތުން، ޗާގޯސްއަކީ މޮރީޝަސްގެ ބާރު ހިނގާ ތަނެއްކަމަށާއި، އެތަނުގައި ތިބި މީހުން ގަދަބާރުން ބާލުވާފައިވާކަމަށާ، ވުމާއެކު އެތަނުގެ އަސްލު ވަޒަންވެރިން އެތަނަށް ގެނެސް ޗާގޯސް މޮރީޝަސްއާއި ހަވާލުކުރުމަށް އެ ގަރާރުގައި އެދިފައިވާ ކަމަށް ޝާހިދު ވިދާޅުވިއެވެ. އަދި އެފަހަރު ރާއްޖެއިން އެ ގަރާރާއި ދެކޮޅަށް ވޯޓު ދެއްވި ކަންވެސް އޭނާ ފާހަގަކުރެއްވިއެވެ.
މިއާއެކު ޝާހިދު ވިދާޅުވީ، ރައީސް ޞާލިހުގެ އެ ސިޓީގައި އެމަނިކުފާނު ލިޔުއްވާފައިވާ ގޮތުގައި، ޗާގޯސް މައްސަލާގައި އަލުން މިފަދަ ގަރާރެެއް އދ.މަޖިލީހަށް އައިސްފިނަމަ ދެކޮޅު ނުހަދާނެކަމަށް ވިދާޅުވެފައިވާނެކަމަށެވެ. އަދި އެއީ އިސްތިއުމާރީ ބާރަށް ރާއްޖެއިން އަބަދުވެސް ތާއީދުނުކުރާތީކަމަށްވެސް ޝާހިދު ވިދާޅުވިއެވެ. ނަމަވެސް އިޓްލޮސްގެ ވޯޓެއް ލައިފިނަމަ އެކަމާއި އެއްވެސް ގުޅުމެއް ނޯންނާނެކަމަށްވެސް އެ ސިޓީގައި ބަޔާންކޮށްފައިވާކަމަށް ޝާހިދު ވިދާޅުވިއެވެ.
މިނިސްޓަރ އިތުރަށް ވިދާޅުވީ ބައިނަލްއަޤްވާމީ ޤާނޫނުން ރާއްޖެއަށް ލިބިދޭ އެންމެ ބޮޑު ސަރަހައްދެއް ހޯދުމަށް ސަރުކާރުން މަސައްކަތްކުރުމުގައި ދެމިއޮންނާނެކަމަށެވެ. އަދި މި ސަރުކާރުން ވެސް ޗާގޯސް މައްސަލާގައި އަމަލުކުރަމުން ދަނީ މީގެ ކުރީގެ ސަރުކާރުތަކުން އަމަލުކުރިފަދައިން ކަމަށާއި، ނަމަަވެސް އެ މައްސަލަ ހޫނުވެފައި ވަނީ އެކަމުގެ ހަގީގަތް އެނގޭ ފަރާތްތަކުންވެސް ކަން އޮތްގޮތާ ދެކޮޅަށް ވާހަކަ ދައްކަވަމުން ގެންދާތީ ކަމަށް ޝާހިދު ވިދާޅުވިއެވެ.
Advertisement
This content is created and paid for by advertisers and does not involve Voice Journalists