ރޭ ދަންވަރު މ. ނިރުފެހިގައި އަލިފާން ރޯވެ ހިނގި އަލިފާނުގެ ހާދިސާ ހިނގިގޮތް މިހާރު ބަލަމުންދާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ. 

މ. ނިރުފެހީގެ ތިރީ ގަރާޖުގައި ރޭ 12:30 އެހާކަންހާއިރު ރޯވި އަލިފާންގަނޑު އެއްކޮށް ނިއްވާލެވުނީ ފަތިހު 4:34 ގައިކަމަށް އެމްއެންޑީއެފްއިން މައުލޫމާތު ދީފައިވެއެވެ.

މިހާދިސާ އާއި ގުޅިގެން މިހާތަނަށް 10 މީހުން ނިޔާވެފައި ވާއިރު، 50 އަށްވުރެ ގިނަ މީހުންވަނީ އެންޑީއެމްއޭގެ ބެލުމުގެ ދަށަށް ގެނެސްފައެވެ.

އެކަމާއި ގުޅިގެން ހިތާމަފާޅުކޮށް ރައީސް ޞާލިހު ކުރެއްވި ޓްވީޓެއްގައި ވިދާޅުވީ، ‏ރޭ މާލޭގައި ހިނގި ނުރައްކާތެރި އަލިފާނުގެ ހާދިސާއަކީ ވަރަށް ހިތާމަވެރި ހާދިސާއެއްކަމަށެވެ. 

އަދި އެ ހާދިސާގައި އެތައް ބައެއްގެ ފުރާނަ ގެއްލި ގިނަ ޢަދަދެއްގެ ބަޔަކަށް ގެއްލުންތަކެއް ލިބިފައިވާ ކަން ފާހަގަކުރައްވައި ވިދާޅުވީ، މިހާދިސާ ހިނގައި ދިޔަގޮތް މިހާރު ބަލަމުންދާ ކަމަށެވެ. 

މީގެ އިތުރުން ރައީސްގެ މެސެޖުގައި ވަނީ ހާދިސާގައި ނިޔާވި މީހުންގެ ޢާއިލާތަކަށް ތަޢުޒިޔާފޮނުއްވާފައެވެ. 

އަދި މި ނުރައްކާތެރި ހާދިސާގައި އަލިފާން ރޯވެފައި ވަނީ ގަރާޖަކާއި އިންވެގެން ހުންނަ ގެއެއްގައި ކަމަށްވާއިރު ހާދިސާ ހިނގި ސަބަބެއް ނޭނގުނުނަމަވެސް އެ ގޭގައި ގިނަ އަދަދެއްގެ ގޭސްފުޅިތަކެއް ހުރިކަމަށް އެމްއެންޑީއެފްއިން ބުނެއެވެ.

މިހާދިސާގައި ނިޔާވެފައިވަނީ ބިދޭސީންނެވެ. އޭގެ ތެރޭގައި ގިނައީ އިންޑިއާ ރައްޔިތުންނެވެ. 

މިއީ ރާއްޖޭގައި މިހާތަނަށް ހިނގި އަލިފާނުގެ އެންމެ ހިތާމަވެރި ހަދިސައެވެ.