މީގެ ކުރީގައި ހިގައި ދިޔަ އަލިފާނުގެ ހާދިސާތައްވެސް ހިގީ ގާނޫނާއި އެއްގޮތަށް އަމަލުކުރެވިފައިނެތީމައި ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ރޭ ދަންވަރު މ. ނިރުފެހިގައި އަލިފާން ރޯވެ ހިނގި އަލިފާނުގެ ހާދިސާއައި ގުޅިގެން، އެތަނުގެ ހާލަތު ބެއްލެވުމަށްޓަކައި ވަޑައިގެން މީޑިއާތަކާއި ވާހަކަދައްކަވަމުން ރައީސް ސާލިހު ވިދާޅުވީ މި އަލިފާނުގެ ހާދިސާ މާލޭގައި ފަހުގެ ތާރީހެއްގައި ހިގައިދިޔަ އެންމެ ނުރައްކާތެރި ހާދިސާ ކަމަށެވެ.

އެގޮތުން، މި ހާދިސާގައި 10 މީހެއްގެ ފުރާނަގެއްލިފައިވާއިރު، އެމީހުންނަކީ ކޮން ގައުމަކަށް ނިސްބަތްވާ ބައެއްކަން އަދި ކަށަވަރުވެފައި ނުވާކަމަށް ރައީސް ޞާލިހު ވިދާޅުވިއެވެ. އެހެންނަމަވެސް، އޭގެ ތެރޭގައި ލަންކާއާއި، ބަންގްލަދޭޝްގެ އިތުރުން އިންޑިއާ މީހުން ހިމެނޭނެ ކަމަށް މިހާތަނަށް ލިބުނު މައުލޫމާތުން ކަށަވަރުވާކަމަށް ރައީސް ވިދާޅުވި އެވެ. 

މިއާއެކު،މިފަދަ އަލިފާނުގެ ހާދިސާތައް ހިގިޔަ ނުދިނުމަށްޓަކައި ކުރަންޖެހޭ ވަރަށް ގިނަ މަސައްކަތްތަށް ހުރިކަން ފާހަގަކުރައްވައި ރައީސް ޞާލިހު ވަނީ އަލިފާން ފެތުރުން ހުއްޓުވުމަށްޓަކައި އެމްއެންޑީއެފްގެ ފަޔާ އެންޑް ރެސްކިއު އިން ކުރެއްވި މަސައްކަތްތަކަށް ތައުރީފު ކުރައްވާފައެވެ. އެގޮތުން އެމްއެންޑީއެފް އިން އަވަސް ފިޔަވަޅުތަކެއް އަޅައިގެން އަލިފާން ފެތުރުން ނުހުއްޓުވުނު ނަމަ، މިއީ ވަރަށް ބޮޑު އަލިފާނުގެ ޙާދިސާއަކަށްވާނެކަމަށް އެމަނިކުފާނު ވިދާޅުވިއެވެ. 

"މި ހާދިސާ ހިގިކަމުގެ ރިޕޯޓް އެމްއެންޑީއެފް އަށް ލިބިފައި މިވަނީ ރޭގަ 12:30 ހާއިރު، 3 މިނެޓުގެ ތެރޭގައި މިތަނަށް ފަޔާ އެންޑް ރެސްކިއު ހާޒިރުވެ އައިސް ކަމާއިބެހޭ މަސައްކަތްތައް ފަށާފައި. ވަރަށް ރަނގަޅު މަސައްކަތްތަކެއް ކުރެއްވީ އަލިފާން އިތުރަށް ފެތުރުނަ ނުދީ ހިފެހެއްޓިފައި މިއޮތީ އަވަހަށް އެތަނަށް އެމްއެންޑީއެފްގެ ފަޔާ އެންޑް ރެސްކިއު ހާޒިރުވެ ކުރެވުނު މަސައްކަތުން." ރައީސް ޞާލިހު ވިދާޅުވިއެވެ. 

މީގެ އިތުރުން ރައީސް ވިދާޅުވީ މިފަަދަ ހާދިސާތައް މަދުކުރުމަށް ހައްލެއް ގެނެވޭނީ މާލޭގައި އޮތް ތޮއްޖެހުން ހުއްޓުވިގެންކަމަށާ، އެއީ މާލެއަށް ކުރިމަތިވެފައިވާ އެންމެ ބޮޑު އެއް ގޮންޖެހުންކަމަށެވެ. 

އަދި މިފަދަ ހާދިސާތައް ހުއްޓުވުމަށް އެޅެން ހުރި އިތުރު ފިޔަވަޅުތައް ހޯދާނެކަމަށް ފާހަގަކުރައްވައި ރައީސް ވިދާޅުވީ، މީގެ ކުރިންވެސް ކެމިކަލް ގުދަނެއް ގޮވައި ދިވެއްސަކު ނިޔާވި ހިތާމަވެރި ހާދިސާ ހިނގާފައިވަނީ ގާނޫނާއި ޚިލާފަށް ކަންކަން ބެހެއްޓުމުގެ ސަބަބުން ކަމަށެވެ. އެެގޮތުން، އެފަދަ ކެމިކަލް ގުދަން ތަކަކީ މީހުން ދިރިއުޅޭ ސަރަހައްދުތަކުގައި ހުރުން ހުއްދަ ނޫން އެއްޗެހި ނަމަވެސް އޭރު ހުރި ކަމަށާ އެހެންނަމަވެސް މިހާރު އެކަން ހައްލު ކުރެވިފައިވާ ކަމަށް އެމަނިކުފާނު ވިދާޅުވިއެވެ. 

މީގެ އިތުރުން، މާލޭގައި ހުރި އެފަދަ ގަރާޖުތަކާއި ވޯކްޝޮޕްތަކުގެ މައްސަލަ އަކީވެސް ހައްލު ކުރަންޖެހިފައިވާ ކަންކަން ކަމަށާއި، އެކަންކަން ވެސް ބަލާނެ ކަމަށް އެމަނިކުފާނު ވިދާޅުވިއެވެ.