ޓްރާންސްޕޯޓު މިނިސްޓަރު ޢާއިޝަތު ނަހުލާއާ ބޮޑެތި މައްސަލަތަކެއް ޖެހިފައިވާ ދަނޑިވަޅެއްގައި އެ މިނިސްޓްރީގެ ޑެޕިއުޓީ މިނިސްޓަރު ޝިމާޒު އަލީގެ ސައިކަލަށް ބަޔަކު ގެއްލުންދީފިއެވެ. 

ކޮރަޕްޝަންގެ ބޮޑެތި ތުހުމަތު ތަކެއް ޝިމާޒުއަށް ކޮށް އޭނާ މަގާމުން ވަކިކުރުމަށް ނަހުލާ އެދުމާއި ގުޅިގެން އެ ދެބޭފުޅުންގެ ދެމެދުގައި މައްސަލަ ތަކެއް ޖެހިފައި ވަނިކޮށް، ޝިމާޒު ގެ ސައިކަލަށް ބަޔަކު ގެއްލުން ދީފައިވާކަމަށް އޭނާ ވަނީ ވިދާޅުވެފައެވެ. 

އެކަން އަންގައި އޭނާ ކޮށްފައިވާ ޓުވީޓެއްގައި ވަނީ، ދޮގު ތުހުމަތު އަޅުވާފައި، ސައިކަލު ހަލާކުކޮށް، އިންޒާރުގެ މެސެޖުކޮށްފައި އެވަރުން ނުވެގެން އާއިލާއަށް ގުޅާފައި އިންޒާރުދޭން ފެށީ ކޮން ކަމެއް ނުވެގެންތޯ ސުވާލު ކުރައްވާފައެވެ. 

އެ ޓުވީޓާއެކު ޝިމާޒު ވަނީ އޭނާގެ ސައިކަލުގެ ފޮޓޯއާއި ބޭރުގެ ނަންބަރެއް ބޭނުންކޮށްގެން ވަޓްސްއަޕް މެދުވެރިކޮށް އޭނާއަށް ފޮނުވާފައިވާ އިންޒާރުގެ މެސެޖެއްވެސް ހިއްސާކުރައްވާފައިވެއެވެ. އެ ފޮޓޯގައި އޭނާގެ ސައިކަލުގެ މަޑި ވަރަށް ބޮޑަށް ކަފާލާފައިވާ މަންޒަރު ފެނެއެވެ. 

ޝިމާޒާއި މިނިސްޓަރު ނަހުލާގެ ގުޅުން ގޯސްވެ ޝިމާޒު މަޤާމުން ވަކިކޮށްދިނުން އެދިވަޑައިގެން ނަހުލާވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ އަރިހަށް ފޮނުއްވި ސިޓީގައި ޝިމާޒު މަޤާމުގެ ނުފޫޒު ނަހަމަ ގޮތުގައި ބޭނުންކުރައްވައިގެން ކޮރަޕްޝަނުގެ ގިނަ އަމަލުތަކެއް ހިންގަވާފައިވާ ކަމުގެ ހެކި ލިބިފައިވާކަމަށް ނަހުލާ ވަނީ ވިދާޅުވެފައެވެ.

އެގޮތުން، ޤަވާއިދާ ޚިލާފަށް އެއްގަމު އުޅަނދު ރަޖިސްޓަރީކޮށްދީގެން އަމިއްލައަށް ބޮޑެތި މަންފާތަކެއް ޝިމާޒު ހޯއްދަވަމުން ގެންދާކަމަށް ތުހުމަތުކުރައްވާފައިވާއިރު, ޤަވާއިދާ ޚިލާފަށް ދޫކޮށްފައިވާ ރަޖިސްޓަރީތަކުގައި ސޮއިކުރެއްވީ ޝިމާޒު ކަމަށްވެސް ނަހުލާ ވިދާޅުވެފައިވެއެވެ.