ދިވެހި ނޫސްވެރިންނަށް އޮތް ބިރާއި ގޮންޖެހުންތަކާ ނުރައްކާތައް އަބަދުވެސް އެކި މިންވަރަށް އެކި ސިފަސިފައިގައި އޮންނަ ކަމަށް މޯލްޑިވްސް މީޑިއާ ކައުންސިލް (އެމްއެމްސީ)ގެ ރައީސް މުހައްމަދު ޝަފާއު ހަސަން ވިދާޅުވެއްޖެ އެވެ.

ރޭ އެމްއެމްސީއިން ބޭއްވި 2021 ވަނަ އަހަރުގެ ނޫސްވެރިކަމުގެ އިނާމު ދިނުމުގެ ޖަލްސާގައި ވާހަކަ ދައްކަވަމުން ޝަފާއު ވަނީ، މީޑިއާ ކައުންސިލްގެ މި ދައުރުގައި ކުރެވިފައިވާ މުހިންމު ކަންކަމަށް އަލި އަޅުވާލައްވާފައެވެ. އެގޮތުން އެގޮތުން 11 އަހަރު ފަހުން ނޫސްވެރިންގެ އަހްލާގީ މިންގަނޑު މުރާޖައާކޮށް މީޑިއާގެ އެންޑޯސްމެންޓާ އެކު އަމަލުކުރަން ފަށާފައިވާކަން އޭނާ ފާހަގަކުރެއްވި އެވެ.

އަދި މީގެ އިތުރުން، ގައުމުން ފޮނުވައިގެންނާއި، ދާއިރާގެ އެންމެ ތަޖުރިބާ ހުރި މީހުންގެ އެހީގައި ގިނަ އަދަދެއްގެ ޒުވާނުން ނޫސްވެރިކަމަށް ނެރެދެވުނު ކަމަށް އޭނާ ވިދާޅުވި އެވެ. އަދި ހަމައެހެންމެ، ރަޖިސްޓަރީކޮށް ހިންގާ ނޫސް މަޖައްލާތަކުގެ ދަފުތަރު އެކުލަވައިލުމުގެ އާ އުސޫލް މިދައުރުގެ ތެރޭގައި ތަރުތީބުކޮށްފައިވާ ކަމަށާ، ކުރިއަށް ހިނގާ ދުވަސްކޮޅުގެ ތެރޭގައި މީޑިއާ ދަފްތަރު އެކުލަވާލައި ނިމޭނެ ކަމަށްވެސް އޭނާ ވިދާޅުވިއެވެ. 

މިއާއެކު ޝަފާއު ވިދާޅުވީ، ދިވެހި ނޫސްވެރިންނަށް އޮތް ބިރާއި ގޮންޖެހުންތަކާ ނުރައްކާތައް އަބަދުވެސް އެކި މިންވަރަށް އެކި ސިފަސިފައިގައި އޮންނަ ކަމަށެވެ. އެގޮތުން މި ވަގުތު ވެސް މަސްދަރު ހާމަ ކުރަން މަޖުބޫރުކޮށް ޖަލަށްލެވޭ ގޮތަށް ހަދާފައިވާ ގާނޫނެއް އެބަ އޮތްކަން އޭނާ ފާހަގަކުރެއްވި އެވެ. އަދި ނޫސްވެރިންނާއި ނޫސްވެރިކަމަށް ވަރަށް ބޮޑު ހުރަހަކާ ނުރައްކަލެއް ކުރިމަތި ވާނެ އިސްލާހެއް ގާނޫނުލްއުގޫބާތަށް ހުށަހަޅާފައި އެބަ އޮތް ކަމަށްވެސް ވިދާޅުވި އެވެ.

އެކަން އެހެން އޮއްވާ ވެސް ނޫސްވެރިކަމުގެ މާހައުލުގައި އޮތް ބިރުވެރިކަން ކުޑަ ކުރަން މަޖިލީހަށް ފޮނުވާފައިވާކަން ވެސް އޭނާ ފާހަަގަކުރެއްވި އެވެ.

"އެކަން އެހެން އޮއްވާ ވެސް މި ކައުންސިލުން ވާނީ ނޫސްވެރި ކަމުގެ މާހައުލުގައި އޮތް ބިރުވެރިކަން ކުޑަ ކުރަން، އަދި ޒަމާނާ ފައި ހަމަ ކުރަން 12 އަހަރު ފަހުން ކައުންސިލުގެ ގާނޫނަށް ގެންނަން ފެންނަ އިސްލާހުތައް މަޖިލީހަށް ފޮނުވާފަ. އެކަން ވެސް އަޅުގަނޑުމެނަށް ވާނެ. އަދި ނޫސްވެރިކަން ވަށައި ބައްދާލަން ނަގާ ވިލާގަނޑު ވެސް އެއްލާލެވޭނެ." ޝަފާއު ވިދާޅުވި އެވެ. 

ޝަފާއު އިތުރަށް ވިދާޅުވީ، ރާއްޖޭގެ ނޫސްވެރިކަން "ވަޑިފަތިވެފައި" އޮތްގޮތް އަދި ރާއްޖޭގެ މީޑިއާގެ މާލީ މިނިވަންކަމުގެ ސިފަ އޮތް ހާލަތު އެންމެނަށް އެނގޭ ކަމަށާއި އެކަން ވަޒަންކޮށް ފަރުވާ ހޯދުން މުހިންމު ކަމަށެވެ.

އެގޮތުން، މީޑިއާ ކައުންސިލުން ފުރަތަމަ ފަހަރަށް ރާއްޖޭގެ މީޑިއާތަކާއި ގުޅޭ ބޭސްލައިން ސްޓަޑީއެއް ފުރިހަމަ ކުރަމުންދާ ކަމަށާ، އަދި މީޑިއާ އަށް ހިތްވަރު ދިނުމަށް މީޑި ގްރާންޓް ސްކީމެއް މިހާރު ފަށާފައިވާ ކަމަށްވެސް އޭނާ ވިދާޅުވިއެވެ.