ހދ. ވައިކަރަދޫގައި 81 އަހަރުގެ އަންހެނަކަށް ޖިންސީ ގޯނާ ކޮށް ރޭޕް ކުރަން މަސައްކަތް ކޮށްފިއެވެ. 

އެ ޖިންސީ ގޯނާ ކުރި އަންހެން މީހާގެ ދަރިފުޅު އެކަމާއި ގުޅިގެން ކޮށްފައިވާ ޓުވީޓެއްގައި ވަނީ ރޭޕް ކުރަން މަސައްކަތް ކުރި ފިރިހެން މީހާގެ ފޮޓޯއެއްވެސް ހިއްސާ ކޮށްފައެވެ. އަދި ފުލުހުންނަށް އެމީހާ ހައްޔަރު ނުކުރެވުފައި ވަނީ އޭނާ ކޯޓު އަމުރެއް ނުލިބިގެން ކަމަށް ފުލުހުން ބުނެފައިވާ ކަމަށާ، އެ މީހާ މިހާރު ޑިންގީއެއްގައި އެރަށުވެސް ފުރައިގެން ގޮސްފައިވާ ކަމަށް ބުނެފައިވެއެވެ. 

މީގެ އިތުރުން އޭނާ ބުނީ، އެ މީހާ އަކީ ލަނޑާ ދޯންޏެއްގައި މަސައްކަތް ކުރާ ށ. ނޫމަރާ އަަށް ނިސްބަތްވާ މީހެއް ކަމަށާ އޭނާ ހައްޔަރުކޮށްފައިވާ ކަމެއް އަދި ނުވާ ކަމެއްވެސް ނޭނގޭ ކަމަށެވެ. 

މިކަމާއި ގުޅިގެން ފުލުހުން ވިދާޅުވީ، ހދ. ވައިކަރަދޫގައި 81 އަހަރުގެ އަންހެނަކަށް ޖިންސީ ގޯނާ ކުރަން މަސައްކަތް ކުރި މައްސަލައެއް ނޮވެމްބަރު 11 ވަނަ ދުވަހުގެރޭ 19:00 ހާއިރު އެ އިދާރާއަށް ރިޕޯޓް ކޮށްފައިވާ ކަމަށެވެ. އަދި އެ މައްސަލަ އާއި ގުޅިގެން ބަލަންޖެހޭ ކަންކަން ބަލަމުން އަންނަ ކަމަށްވެސް ފުލުހުން ވިދާޅުވިއެވެ. 

އެހެންނަމަވެސް، އެ މައްސަލާގައި މީހަކު ހައްޔަރު ކޮށްފައިވާ ކަމެއް ހާމައެއް ނުކުރައްވައެވެ.