ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު ޝިމާޒް އަލީއަށް ގްރޫޕަކުން ރޭ ދިން ހަމަލާ މިނިސްޓަރ ނަހުލާ ކުށްވެރިކުރައްވައިފިއެވެ.

ސިމާޒްއަށް ދެވުނު ހަމަލާއާއި މިނިސްޓަރ ނަހުލާއާއި ގުޅުވައި ފަތުރާވާހަކަތައް ދޮގުކުރައްވައި އެކަމަނާ ކުރެއްވި ޓުވީޓެއްގައި ވިދާޅުވެފައިވަނީ، 

ޝިމާޒަށް ދިން ހަމަލާ ހަރުކަށި އިބާރާތުން ކުށްވެރި ކުރައްވާ ކަމަށެވެ. ނަމަވެސް "މައްސަލަތައް ބަލަމުންދާ ދަނޑިވަޅުގައި މިކަމަށް އެކި ގޮތްގޮތުން ނުފޫޒު ފޯރުވަން މަސައްކަތްކޮށް، މިކަމުގެ ތެރޭގައި އަޅުގަނޑުގެ އާއިލާ އަށް ނިސްބަތްކޮށް ދެކެވޭ ވާހަކަތަކަކީ އަބުރު ކަތިލުމުގެ ހުތުރު އަމަލުތަކެއް" ކަމަށް ނަހުލާ ވިދާޅުވި އެވެ.

ޓްރާންސްޕޯޓް މިނިސްޓްރީ ތެރޭގައި ހިންގާފައިވާ ބޮޑެތި ކޮރަޕްޝަންތައް ތިލަވެ، ގިނަ ބައެއްގެ ފާޑުކިޔުން އަމާޒުވެފައިވާ މި ދަނޑިވަޅުގައި މިނިސްޓަރ ނަހުލާ ވަނީ ޑެޕިއުޓީ މިނިސްޓަރ ގެ ކޮރަޕްޝަންގެ މައްސަލަތަކެއް ރައީސް އޮފީހަށް ހުށަހަޅާފައެވެ.

ޝިމާޒާ ގުޅޭ ޝަކުވާތަކެއް ނަހުލާ ހުށަހެޅުއްވިކަން ރައީސް އޮފީހުން ވަނީ މީގެ ކުރިން ނޫސްވެރިންގެ ބައްދަލުވުމެއްގައި ކަށަވަރުކޮށްދީފަ އެވެ.

ޓްރާންސްޕޯޓް މިނިސްޓަރުގެ ނާއިބު ޝިމާޒް އަލީ (ކ) އަދި މިނިސްޓަރު އައިޝަތު ނަހުލާ

ޝިމާޒުގެ މައްޗަށް ތުހުމަތުކުރެވޭ ކޮރަޕްޝަންގެ މައްސަލައެއް އެންޓި-ކޮރަޕްޝަން ކޮމިޝަން (އޭސީސީ) ތަހުގީގުކޮށް، އޭނާ އެކު، ޓްރާންސްޕޯޓް މިނިސްޓްރީގެ ބިޑް ކޮމިޓީގެ ހަ މެމްބަރުންގެ މައްޗަށް ދައުވާކޮށްދިނުމަށް އެދި ޕްރޮސެކިއުޓާ ޖެނެރަލްއަށް މިދިޔަ އަހަރު ފޮނުވި އެވެ. ނަމަވެސް އެކަށީގެންވާ ހެކި ނެތިގެން އެ މައްސަލަ ކޯޓަށް ފޮނުވާފައެއް ނުވެ އެވެ.   

ސިމާޒަކީ ސަރުކާރު ކޯލިޝަން ޕާޓީއެއްކަމުގައިވާ އެމްއާރއެމްގެ ސްލޮޓެއްގައި ސްޓޭޓް މިނިސްޓަރކަން އަދާކުރައްވަމުން ގެންދަވާ ބޭފުޅެކެވެ. މިހަލާއާއި ގުޅިގެން އެމްއާރުއެމްއިން ވަނީ، މިކަމުގައި އަވަސް ތަހުގީގެއް ހިންގައި ފިޔަވަޅު އެޅުމަށް ގޮވާލާފަ އެވެ.