ކުލަގަދަ ގިނަ ހަރަކާތްތަކާއެކު ދުނިޔޭގެ އެންމެ ބޮޑު ފުޓުބޯޅަ އީދު ކަމަށްވާ ފީފާ ވޯލްޑް ކަޕް 2022 ގަތަރުގައި ފަށައިފި އެވެ. 

އަރަބި ބައްރުގައި ފުރަތަމަ ފަހަރަށް ބޭއްވޭ ވޯލްޑް ކަޕް ހުޅުވުމުގެ ރަސްމިއްޔާތު ޝަރަފްވެރިކޮށްދެއްވީ ގަތަރުގެ އަމީރު ތަމިމް ބިން ހަމަދު އަލް ސާނީ އެވެ. މީގެއިތުރުން ފީފާގެ ރައީސް ޖިއާނީ އިންފަންޓީނޯ އާއި އެ ގައުމުގެ އިސްވެރިން ބައިވެރިވެވަޑައިގަތެވެ. 

މުބާރާތުގެ ބިޑު 2010 ވަނަ އަހަރު ގަތަރު ކާމިޔާބުކުރުމާއެކު އެ ގައުމުން ވަނީ މުބާރާތަށް ތައްޔާރުވާން ފަށާފައެވެ. އެގޮތުން މުބާރާތަށް ހާއްސަކޮށް ޖުުުމްލަ ހަތް ސްޓޭޑިއަމް އެ ގައުމުން ވަނީ މުބާރާތައް ތައްޔާރުކޮށްފައެވެ. 

Advertisement

ހުޅުވުމުގެ ރަސްމިއްޔާތުގެ ތެރެއިން ގަތަރު ވޯލްޑްކަޕް 2022 ގެ ރަސްމީ މެސްކޮޓް، ލަބީބްވެސް ދައްކާލައިފާއިރު މަޝްހޫރު އެކްޓަރ މޯގަން ފްރީމަން ވެސް މި ރަސްމިއްޔާތުގެ ތެރެއިން ބައިވެރިވިއެވެ. މީގެއިތުރުން ކުރީގެ ވޯލްޑް ކަޕުތަކުގައި ބޭނުންކުރި މެސްކޮޓުތަކާ ލަވަތައް މި ރަސްމިއްޔާތުގެ ތެރެއިން ހުށައަޅާދީފައިވެއެވެ. އަދި ބީޓީއެސް ގެ ލަވައެއް ވެސް ފެނިގެންދިޔަ އެވެ.

މުބާރާތުގެ ހުޅުވުމުގެ ރަސްމިއްޔާތުގެ ތެރެއިން-- ފޮޓޯ: ގެޓީ އިމޭޖަސް

ގަތަރުގެ އަމީރު ދެއްކެވި ވާހަކަފުޅުގައި ވަނީ މުބާރާތް ކާމިޔާބުކަމާއެކު ބޭއްވުމަށް މަސައްކަތްކުރެއްވި ހުރިހާ ފަރާތްތަކަށް ޝުކުރު އަދާކުރައްވާފައެވެ. އަދި މި ވޯލްޑް ކަޕު ވެގެންދާނީ ގަތަރުގެ ތާޜީހުގައި ރަން އަކުރުން ފަވާލެވިގެންދާނެ މުބާރާތެއްގެ ގޮތުގައި އަމީރު ފާހަގަކުރެއްވި އެވެ. 

މި ފަހަރުގެ މުބާރާތުގައިވެސް 32 ޓީމު ވާދަކުރާއިރު 64 މެޗު ކުޅެވިގެންދާނެއެވެ. މި މުބާރާތުގެ އެންމެ ފަހުގެ ޗެމްޕިއަނުންނަކީ ފްރާންސްއެވެ. އަދި އެންމެ ކާމިޔާބު ޓީމަކީ ފަސް ފަހަރު މި މުބާރާތް ކާމިޔާބުކުރި ބްރެޒިލްއެވެ. މި ދެ ޓީމުވެސް މި މުބާރާތުގައި ފެނިގެންދާނެއެވެ.

މުބާރާތުގެ ފުރަތަމަ މެޗުގައި ބައްދަލުކުރާނީ މުބާރާތް ބާއްވާ ގައުމު ގަތަރާއި އެމެރިކާ ބައްރުގެ ގައުމު ކަމަށްވާ އެކުއެޑޯ އެވެ.