ދުނިޔޭގެ އެންމެ ޝަރަފްވެރި ފުޓުބޯޅަ މުބާރާތް ކަމަށްވާ ފީފާ ވޯލްޑް ކަޕް 2022 ގައި މުބާރާތް ބާއްވާ ގަތަރު ބަައްޔަކުން ފަށަން ޖެހިއްޖެ އެވެ. 

އަލް ބައިތް ސްޓޭޑިއަމުގައި ކުޅުނު މި މެޗު ނިމުނީ 2-0 އިން އެކުއެޑޯ މެޗު ކާމިޔާބުކޮށްގެންނެވެ. މިއީ ވޯލްޑް ކަޕުގެ ތާޜީހުގައި މުބާރާތް ބާއްވާ ގައުމު ކުޅުނު ފުރަތަމަ މެޗުން ބަލިވި ފުރަތަމަ ފަހަރެވެ. 

މެޗު ފަށައިގެން ތިންވަނަ މިނެޓުގައި އެކުއެޑޯގެ ކެޕްޓަން އެނާ ވެލެންސިއާ ވަނީ ލަނޑު ޖަހާފައެވެ. ނަމަވެސް ވީޑިއޯ އެސިސްޓެންޓް ރެފްރީ (ވީއޭއާރް) ބެލުމަށްފަހު ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފައެވެ.

ނަމަވެސް މެޗުގެ 16 ވަނަ މިނެޓުގައި އެކުއެޑޯއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެ ޓީމަށް ޖަހައިދިނީ ވެލެންސިއާއެވެ. މިއީ ގަތަރުގެ އޭރިއާގެ ތެރެއިން އެކުއެޑޯގެ ކުޅުންތެރިއަކަށް ގަތަރުގެ ކީޕަރު އަލް ޝީބް ކުރި ފައުލަކާއި ގުޅިގެން ލިބުނު ޕެނަލްޓީއަކުން ވެލެންސިއާ ކާމިޔާބުކުރި ލަނޑެކެވެ.

މެޗުގެ 31 ވަނަ މިނެޓުގައި ގަތަރުން ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މި ލަނޑުވެސް އެ ޓީމަށް ޖަހައިދިނީ ވެލެންސިއާއެވެ.

ފުރަތަމަ ހާފުގައި ގަތަރުގެ ފަރާތުން ދަށް ކުޅުމެއް ފެނުނު ނަމަވެސް ދެވަނަ ހާފުގައި އެ ޓީމު ވަނީ ވަރަށް ބޮޑުތަން ކުޅުން ރަނގަޅުކޮށްފައެވެ. ނަމަވެސް ލަނޑެއް ކާމިޔާބުކުރެވޭ ގޮތެއް ނުވިއެވެ. 

ގަތަރު އަދި އެކުއެޑޯ ހިމެނޭ ގްރޫޕްގައި ދެން ހިމެނޭ ޓީމުތަކަކީ ނެދަލަންޑްސް އަދި ސެނެގާލެވެ. މި ދެ ޓީމު ބައްދަލުކުރާނީ މާދަމާ ރޭ ރާއްޖެގަޑިން 21:00 ގައެވެ.