ހޯރަފުށީގައި ހުންނަ ހއ. އަތޮޅު މަދަރުސާގެ ޓީޗަރަކު އެ ސުކޫލުގެ ދަރިވަރަކަށް ޖިންސީ ގޯނާ ކުރި މައްސަލާގައި ޓީޗަރު ސަސްޕެންޑް ކޮށްފައިވާ ކަމަށް އެޑިޔުކޭޝަން މިނިސްޓްރީން ބުނެފިއެވެ.

އެޑިޔުކޭޝަން މިނިސްޓްރީން މިއަދު ބުނީ، ހއ. އަތޮޅު މަދަރުސާގެ ޓީޗަރަކު އެސުކޫލުގައި ކިޔަވަމުންދާ އަންހެން ދަރިވަރަކަށް ޖިންސީގޯނާ ކުރިކަމުގެ މައްސަލައެއް މިނިސްޓްރީއަށް ރިޕޯޓް ކުރެވިފައިވާ ކަމަށެވެ. އަދި އެއީ ދިވެހި ނަސްލުގެ ޓީޗަރެއް ކަމަށްވެސް މިނިސްޓްރީން ބުނެފައިވެއެވެ. 

މިނިސްޓްރީން ބުނީ، އެ މައްސަލަ މިނިސްޓްރީއަށް ރިޕޯޓް ކުރެވުމާއި އެކު ހަމައެވަގުތުން ޓީޗަރު ދަރިވަރުންނާ އެކަހެރިކޮށް މައްސަލައިގެ ތަހުޤީގަށް ޓީޗަރު ސަސްޕެންޑުކުރެވިފައިވާ ކަމަށެވެ. އަދި މައްސަލަ ފުލުހުންނަށް ހުށަހަޅާފައިވާ ކަމަށްވެސް ބުނެފައިވެއެވެ. 

މި މައްސަލަ އާއި ގުޅިގެން މިމަހު 16 ވަނަ ދުވަހު ފުލުހުން ބުނީ، އުތުރުގެ -- ހއ، ހދ، ށ -- ރަށެއްގައި އުމުރުން 12 އަހަރުގެ އަންހެން ކުއްޖަކަށާއި 14 އަހަރުގެ އަންހެން ކުއްޖަކަށް ޖިންސީ ގޯނާ ކުރި ކަމަށް ތުހުމަތު ކުރެވޭ މައްސަލައެއް މިމަހު 15 ވަނަ ދުވަހު ހުށައަޅާފައިވާ ކަމަށެވެ.

އަދި އެ މައްސަލައާ ގުޅިގެން 49 އަހަރުގެ މީހަކު ވަނީ ހައްޔަރު ކޮށްފައިވާ ކަމަށާ ކޯޓް އަމުރެއްގެ ދަށުން އެ މީހާ ހައްޔަރު ކުރީވެސް އެ ދުވަހު ވަގުތެއްގައި ކަމަށް ފުލުހުން ބުނެފައިވެއެވެ. އަދި އެއީ އެއީ ދިވެހި ފިރިހެނެއް ކަމަށާ އޭނާ ނިސްބަތް ވަނީވެސް އެ ކުދީން ހިމެނޭ ރަށަށް ކަމަށް ފުލުހުން މައުލޫމާތުދެއެވެ.

މި މައްސަލަ ފުލުހުން އަންނަނީ ތަހުގީގު ކުރަމުންނެވެ.