އަންހެނަކު އިންނާނެ ކަމަށް ބުނުމުން އޭނާއަށްޓަކައި ފިރިހެންމީހާ ކުރި ޚަރަދުތައް ހޯދަން ފިރިހެން މީހާގެ ފަރާތުން ހުށަހެޅި މައްސަލާގައި އޭނާއާއި ދެކޮޅަށް މައްސަލަ ނިމިއްޖެއެވެ. 

ށ އަތޮޅުގެ ރަށަކަށް ނިސްބަތްވާ އެ ފިރިހެން މީހާ ދައުވާ ކޮށްފައިވަނީ އދ. އަތޮޅުގެ ރަށަކަށް ނިސްބަތްވާ އަންހެނެއްގެ މައްޗަށެވެ. 

އެގޮތުން ކުރި ދައުވާގައި ފިރިހެންމީހާ ބުނީ، އެ ދެމީހުންނަކީ ކުރިން އިނދެގެން އުޅުނު ދެމީހުންނެވެ. އަދި އެއަށްފަހު ވަރިވެފައިވާއިރު، އަނެއްކާވެސް އެ ފިރިހެން މީހާއާއި އިންނާނެކަމަށް އަންހެންމީހާ ބުނި ކަމަށް އޭނާ ކުރި ދައުވާގައި ކިޔައިދީފައިވެއެވެ. އެގޮތުން، އޮންނާނެކަމަށް ބުނެ ފިރިހެންމީހާ އާއި އެކީގައި ގާތްގުޅުމެއް އަންހެން މީހާ ބާއްވާފައިވާއިރު، ފިރިހެން މީހާ ލައްވާ ގިނަ ޚަރަދުތަކެއްވެސް އަންހެން މީހާ ކުރިކަމަށް ދައުވާގައި ބުނެފައިވެއެވެ. 

އެގޮތުން އުފަންދުވަހާއި ދިމާކޮށް ކޭކާއި މާ ބޮނޑި ގަނެދީ، މޭކަޕް ސާމާނާއި އަންނައުނާއި ޖިމްގެ ފީ އާއި ޕެޑާއި، ފައިވާނާއި ބޫޓާއި، އިސްލާމިކް ބޭންކް އެކައުންޓް ހުޅުވަންބޭނުންވާ ފައިސާ އާއި، ހެދުން ފަހާ ފޮއްޗާއި، ހެޑްސެޓް ފަދަ އެތައް ސާމާނެއް އަންހެން މީހާއަށް ގަނެދީފައިވާ އިރު އެތަކެއްޗަށް ފިރިހެން މީހާގެ އަތުން ދިޔަ ޚަރަދުތަކުގެ ތަފްސީލްވެސް އޭނާ ވަނީ ދައުވާގައި ހާމަކޮށްފައެވެ. އަދި އޭގެ އިތުރުންވެސް އެކިފަހަރު މަތިން ފޮނުވި ފައިސާ އާއި ގާނޫނީ ޚަރަދާ އެކު ޖުމުލަ 34،000 އެއްހާ ރުފިޔާ ހޯދަން ކޯޓުގައި އެ ފިރިހެން މީހާ ވަނީ އެދިފައެވެ.

އެހެން ނަމަވެސް، އެ މައްސަލާގައި ސިވިލް ކޯޓުން އިއްޔެ ނިންމީ ފިރިހެންމީހާ ގަނެދީފައިވާ ތަކެއްޗަށް ބަލާއިރު ކޭކާއި މާބޮނޑި ފަދަ ތަކެއްޗަކީ އާންމު އުސޫލުން މީހުން ހަދިޔާގެ ގޮތުގައި ދޭނެ ތަކެތި ކަމަށާއި އަދި ފައިސާގެ ގޮތުގައި އެންމެ ގިނައިން ދީފައި ހުރީ ވެސް 2،500ރ. ކަމަށެވެ.

އެހެންވުމުން އެއީ ދަރަންޏަކަށް ވުރެ ބޮޑަށް، ހަދިޔާގެ ގޮތުގައި ދީފައިވާ ތަކެތި ކަމަށް ބެލެވޭ ކަމަށް ހުކުމުގައިވެ އެވެ. އަދި އިތުރު ހެއްކެއް ނެތީސް، އެއީ ދަރަންޏެއް ކަމަށް ނުނިންމޭނެ ކަމަށް ހުކުމުގައިވެ އެވެ. ވީމާ ފިރިހެން މީހާގެ ދައުވާގައި އެއްވެސް އަސާސެއް ނެތް ކަމަށްބުނެ ކޯޓުންވަނީ އޭނާއާއި ދެކޮޅަށް އެ މައްސަލަ ނިންމާފައެވެ.