ގަތަރުގައި ކުރިޔަށްދާ ފީފާ ވޯލްޑްކަޕް 2022 ގެ ގްރޫޕް ބީ ގައި އިންގްލަންޑް ކުޅުނު ފުރަތަމަ މެޗުގައި ފަސޭހަކަމާއެކު އީރާން ބަލިކޮށްފިއެވެ. 

ޚަލީފާ އިންޓަނޭޝަނަލް ސްޓޭޑިއަމްގައި ހޯމަ ދުވަހު ކުޅުނު މި މެޗު އިންގްލަންޑް ކާމިޔާބުކޮށްފައި ވަނީ 6-2 ގެ ނަތީޖާއަކުންނެވެ. މިއީ އީރާންގެ ތާރީހުގައި ވެސް ބައިނަލްއަޤްވާމީ ފުޓުބޯޅަ މެޗެއްގައި މިހާ ތަފާތު ބޮޑުކޮށް ބަލިވި ފުރަތަމަ ފަހަރެވެ. 

މަރުގެ ގްރޫޕުގެ ގޮތުގައި ގިނަ ބަޔަކު ބުނާ މި ގްރޫޕުން އިންގްލަންޑް ހޯދި މި މޮޅުގައި އެ ޓީމުން ވަނީ މެޗު ފަށައިގެން ފުލުފުލުގައި ގިނަ ހަމަލާތަކެއް އުފައްދާފައެވެ. 

Advertisement

އިންގްލަންޑުން ވަރަށް ބޮޑަށް ކުރިޔަށް ޖެހިގެން ގިނަ ހަމަލާތަކެއް އުފައްދަމުން ދަނިކޮށް އީރާނަށް މައްސަލަތަކާއި ކުރިމަތިވީ މެޗުގެ ވަރަށް ކުރީކޮޅު އެ ޓީމުގެ އެއް ނަމްބަރު ކީޕަރު އަލިރޭޒާ ބެއިރަންވަޑްއަށް އަނިޔާވެ ބަދަލުކުރަން ޖެހުމުންނެވެ.

މެޗުގެ 35 ވަނަ މިނެޓުގައި އިންގަލަންޑުން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެ ޓީމަށް ކާމިޔާބުކޮށްދިނީ އުމުރުން 19 އަހަރުގެ ޖޫޑް ބެލިންގްހަމްއެވެ. މިއީ އޭނާ އިންގްލަންޑްގެ ގައުމީ ޓީމަށް ޖަހައިދިން ފުރަތަމަ ލަނޑެވެ. އޭގެ ފަހުން މެޗުގެ 43 ވަނަ މިނެޓުގައި ބުކާއޯ ސަކާ ވަނީ އިންގްލަންޑަށް އިތުރު ލަނޑެއް ޖަހައިދީ ލީޑު ފުޅާކޮށްފައެވެ.

ފުރަތަމަ ހާފު ނިމުމުގެ ކުރިން ރަހީމް ސްޓާލިންގް ވަނީ އިންގްލަންޑުގެ ތިންވަނަ ލަނޑު ޖަހައިފައެވެ. މެޗުގެ ދެވަނަ ހާފުގައިވެސް އިންގަލަންޑުން ވަނީ އީރާންގެ ހާފަށް ބާރުބޮޑުކޮށް ގިނަ ހަމަލާތަކެއް އުފައްދައިފައެވެ. އެގޮތުން މެޗުގެ 62 ވަނަ މިނެޓުގައި އިންގްލަންޑްގެ ސަކާ ވަނީ އިތުރު ލަނޑެއް ޖަހާފައެވެ. އެކަމަކު އޭގެ ދެ މިނެޓު ފަހުން އީރާންގެ އިތުބާރު ފޯވާޑް މެހްދީ ތަމީރީ ވަނީ ލަނޑު ޖަހާ ފަރުގު ކުޑަކޮށްފައެވެ.

އިންގްލަންޑުގެ ފަސްވަނަ ލަނޑު އެ ޓީމަށް ކާމިޔާބު ކޮށްދިނީ މެޗުގެ 71 ވަނަ މިނެޓުގައި ބަދަލު ކުޅުންތެރިއެއްގެ ގޮތުން ކުޅެންއެރި މާކަސް ރަޝްފޯޑެވެ. އަދި މެޗުގެ 90 ވަނަ މިނެޓުގައި އިންގްލަންޑުން ކާމިޔާބުކުރި ހަވަނަ ލަނޑު އެ ޓީމަށް ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެންއެރި ޖެކް ގްރީލިޝްއެވެ.

ނަމަވެސް އިތުރު ވަގުތުގައި ލިބުނު ޕެނަލްޓީއަކުން އީރާންގެ ތަމީރީ ވަނީ އިތުރު ލަނޑެއް ޖަހައި ފަރަގު ކުޑަކޮށްފައެވެ.