މިހާރު ގަތަރުގައި ކުރިއަށްދާ ވޯލްޑްކަޕް ގައި އީރާނުގެ ޓީމުން ކުޅޭ ފުރަތަމަ މެޗު އިއްޔެ އިންގްލެންޑް އާއި ދެކޮޅަށް ކުޅެފައިވާއިރު، އެ މެޗު ފެށުމުގެ ކުރިން އީރާނުގެ ޓީމުން އެ ގައުމުގެ ގައުމީ ސަލާމް ކިޔައިފައެއް ނުވެއެވެ. 

މި ނިންމުން އީރާނުގެ ގައުމީ ފުޓުބޯޅަ ޓީމުން ނިންމާފައި މިވަނީ، އެ ގައުމުގެ ސަރުކާރާއި ދެކޮޅަށް މުޒާހަރާ ކުރަމުންދާ މީހުންނާއިއެކުގައި ގައުމީ ޓީމު ތިބިކަން ހާމަކުރުމުގެ ގޮތުންނެވެ. 

އީރާނުގައި ކުރިއަށްދާ މި މުޒާހަރާ ފެށިފައިވަނީ މި އަހަރުގެ ސެޕްޓެމްބަރު މަހުގެ ތެރޭގައެވެ. އެއީ އެގައުމަށް ނިސްބަތްވާ އުމުރުން 22 އަހަރުގެ މަހްސާ އަމީނީ ނަމަކަށް ކިޔާ އަންހެނަކު ފުލުހުންގެ ބެލުމުގެ ދަށުގައި ވަނިކޮށް ނިޔާވުމާއި ގުޅިގެންނެވެ. އެ ހާދިސާއަށްފަހު، އީރާނުގެ ސަރުކާރާއި ދެކޮޅަށް މުޒާހަރާ ކުރަން ފަށާފައިވާއިރު، އެ މުޒާހަރާ ހޫނުވެ ސަތޭކަ އެތައް ބަޔަކު މިހާރުވެސް ވަނީ މަރުވެފައެވެ. އަދި މުޒާހަރާގެ ތެރެއިން ހިނގަމންދާ  ހަމަނުޖެހުންތަކުގައި ގިނަ ބަޔަކު ވަނީ ޒަޚަމްވެފައެވެ. 

ގައުމީ ސަލާމް ނުކިޔުމަކީ އީރާނުގެ ގައުމީ ފިރިހެން ފުޓްބޯޅަ ޓީމުން މުޒާހަރާ ކުރާ މީހުންނާއި އެކު ވާކަން ދެއްކުމުގެ ގޮތުން ނިންމި ފުރަތަމަ ނިންމުމެއް ނޫނެވެ. އެހެނީ މީގެ ކުރިން، ސެޕްޓެމްބަރު މަހުގައި، އެ ޓީމުން ސެނެގާލް އާއި ދެކޮޅަށް ކުޅުނު ރަހުމަތްތެރި ކަމުގެ މެޗެއްގައިވެސް  މުޒާހަރާވެރިންގެ ހައްގުގައި އެޓީމުން ވަނީ ގައުމީ ޖާރޒީގެ ރަތް ކުލަ ފޮރުވުމުގެ ގޮތުން އޭގެ މަތިން ކަޅު ޖެކެޓު ލައިފައެވެ. 

ދުނިޔޭގެ އެތައް ބަޔަކު ބަލަމުންދިޔަ ވޯލްޑް ކަޕް ގެ މެޗު ފެށުމުގެ ކުރިން، ގައުމީ ސަލާމް ޖަހަމުންދިޔަ ވަގުތު އެ ނުކިޔައި ތިބުމަކީ އީރާނުގެ ކުޅިވަރު ކުޅޭ ޓީމަކުން މިހާތަނަށް ނިންމި އެންމެ ބޮޑު ނިންމުން ކަމަށް ބޭރުގެ މީޑިއާ ތަކުން ބުނެއެވެ. މީގެ ސަބަބުން ކުޅުންތެރިންނަށް ކުރިމަތިވެދާނެ ކަންކަމެއް އަދި މިހާތަނަށް އެނގިފައެއް ނުވެއެވެ. 

އީރާނުގެ ގައުމީ ފުޓުބޯޅަ ޓީމުގެ އިތުރުން، ބީޗް ފުޓްބޯޅަ ޓީމާއި، ވޯޓާ ޕޯލޯ އަދި ބާސްކެޓް ބޯޅަ ޓީމުންވެސް މީގެ ކުރިންވަނީ އެ ގައުމުގެ ގައުމީ ސަލާމް ކިޔުމާއި ދެކޮޅު ހަދާފައެވެ.