މިފަހަރުގެ ގަތަރު ވޯލްޑްކަޕް ކާމިޔާބުކުރާނެ ކަމަށް ގިނަ ބަޔަކު އިއްތިފާގުވި އާޖެންޓީނާ ކުޅުނު ފުރަތަމަ މެޗުގައި "އަންޑަ ޑޯގް" ޓީމުގެ ގޮތުގައި ބެލެވުނު ސައުދީ އަރަބިއްޔާ އަތުން ލަދުވެތި ގޮތަކަށް ބަލިވެއްޖެއެވެ.

ސައުދީން މި މެޗު ކާމިޔާބުކޮށްފައި ވަނީ އާޖެންޓީނާ އިން ލަނޑެއް ޖަހާފައިވަނިކޮށް ފަހަތުން އަރާ ކާމިޔާބުކުރި ދެ ލަނޑާއެކު 2-1 ގެ ނަތީޖާއަކުންނެވެ. 

އާޖެންޓީނާ އިން މުޅި މެޗު ކޮންޓްރޯލްކޮށްގެން ކުޅުނު ނަމަވެސް ސައުދީން ކުޅުނީ ވަރަށް ހުށިޔާރުކޮށެވެ. ހާއްސަކޮށް މެދުތެރެއިން ލިއޮނަލް މެސީ އަށް އެއްވެސް ފުރުސަތެއް ދިނަ ނުދީ އެ ޓީމުން ވަނީ މެޗުގެ ބޮޑުބައި ހިފަހައްޓާފައެވެ. 

Advertisement

މެޗުގައި އާޖެންޓީނާއިން ލަނޑުޖަހާ ލީޑު ނެގީ 10 ވަނަ މިނެޓުގައެވެ. މިއީ ލިބުނު ޕެނަލްޓީއަކުން ކެޕްޓަން ލިއޮނަލް މެސީ ކާމިޔާބުކުރި ލަނޑެކެވެ. 

އޭގެ ފަހުން މެޗުގެ 22 ވަނަ މިނެޓުގައި މެސީ އިތުރު ލަނޑެއް ޖެހި ނަމަވެސް ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފައެވެ. އަދި މެޗުގެ 29 ވަނަ މިނެޓުގައި ލައުޓާރޯ މާޓިނޭޒް ލަނޑު ޖެހި ނަމަވެސް ވީޑިއޯ އެސިސްޓެންޓް ރެފްރީ (ވީއޭއާރް) ބެލުމަށްފަހު ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފައެވެ.

ދެވަނަ ހާފު ފަށައިގެން ސައުދީން ވަނީ ގާތް ގާތުގައި ދެ ލަނޑު ޖަހާ އެ ޓީމު ކޮޅަށް ނަތީޖާ އަނބުރާލައިފައެވެ. އެގޮތުން މެޗުގެ 48 ވަނަ މިނެޓުގައި ސައުދީއަށް ނަތީޖާ ހަމަހަމަކޮށްދިނީ ސަލަޙް އަލް ޝެހޭރީއެވެ. އަދި އޭގެ ފަސް މިނެޓު ފަހުން ސައުދީއަށް ލީޑު ނަގައިދިނީ ސާލިމް އަލް ދަވްސާރީ ޖަހައިދިން ލަނޑުންނެވެ.

މި ބައްޔާއެކު އާޖެންޓީނާއިން ދަމަހައްޓަމުން އައި މޮޅުވުމުގެ ރެކޯޑަށް ވަނީ ނިމުން އައިސްފައެވެ. ޖުމްލަ 36 މެޗުން އެ ޓީމު މޮޅުވެފައިވާއިރު، މި މެޗުން ސައުދީ ބަލިކުރެވިއްޖެ ނަމަ އެ ޓީމަށް 37 މެޗުން މޮޅުވުމުގެ ރެކޯޑާއެކު އެންމެ ގިނަ މޮޅު ހޯދި ޓީމާ އަރާ ހަމަވާނެއެވެ.