ފީފާ ވޯލްޑް ކަޕް 2022 ގެ ގްރޫޕް ސީގައި މެކްސިކޯ އާއި ޕޮލަންޑް ބައްދަލުކުރި މެޗުވެސް އެއްވަރުވެގެން ނިމިއްޖެ އެވެ.

މި މެޗު ނިމުނީ އެއްވެސް ޓީމަކަށް ލަނޑެއް ކާމިޔާބުނުކުރެވި އެވެ. މެޗުގައި ލަނޑު ޖަހާނެ އެންމެ ރަނގަޅު ފުރުސަތުތަކެއް ލިބުނު އެއް ކުޅުންތެރިއަކީ ރޮބަޓް ލެވަންޑޮސްކީ އެވެ. 

މެޗުގައި މެކްސިކޯ އަށް ވެސް ލަނޑުޖަހާނެ ރަނގަޅު ފުރުސަތުތަކެއް ލިބި ވަނީ ބޭކާރުވެފައެެވެ. އެގޮތުން މެޗުގެ 25 ވަނަ މިނެޓުގައި ވޭގާ އަށް ލިބުނު ފުރުސަތު ފާހަގަކޮށްލެވެއެވެ.

Advertisement

މެޗުގެ ދެވަނަ ހާފުގައިވެސް ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ 52 ވަނަ މިނެޓުގައި މެކްސިކޯގެ ލަޒާނޯ ވަނީ ނުރައްކާތެރި ހަމަލާއެއް ފޮނުވާލައިފައެވެ. އެކަމަކު މި ހަމަލާ ޕޯލަންޑްގެ ކީޕަރު ޝެޒްނީ ވަނީ ދިފާއުކޮށްފައެވެ.

މެޗުގެ 54 ވަނަ މިނެޓުގައި ޕޮލަންޑަށް ވަނީ ޕެނަލްޓީއެއް ލިބިފައެވެ. މެކްސިކޯގެ އޭރިއާގެ ތެރެއިން ޕޯލަންޑްގެ ފޯވާޑް ލެވަންޑޯސްކީއަށް ފައުލު ކުރުމާއި ގުޅިގެން ލިބުނު ޕެނަލްޓީ އޭނާ ފޮނުވާލި ނަމަވެސް މެކްސިކޯގެ ކީޕަރު ޖިލޫމޯ އޯޗުވާ ވަނީ އެ ބޯޅަ ދިފާއުކޮށްފައެވެ.

މި ނަތީޖާއާއެކު މި ގްރޫޕްގެ އެއްވަނައިގައި މި ވަގުތު އޮތީ އާޖެންޓީނާ ބަލިކުރި ސައުދި އަރަބިއްޔާއެވެ. ދެވަނަ އަދި ތިންވަނައިގައި އޮތީ ޕޯލަންޑާއި މެކްސިކޯއެވެ. އެއާއެކު މި ގްރޫޕުގެ ފޯރި މި ވަނީ އިތުރަށް ގަދަވެފައެވެ.