ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމުން އިސްތިއުފާ ދެއްވަން، ނުވަތަ ޗެކްއައުޓް ވާން ޖެހޭ ކަމަށް މި ސަރުކަާރުގެ ކުރީގެ ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި 2023 ވަނަ އަހަރަށް ސަރުކާރުން ހުށަހަޅާފައިވާ ބަޖެޓަށް ބަހުސް ކުރައްވަމުން އީވާ ވަނީ އަދުގެ ސަރުކާރަށް ވަރަށް ބޮޑަށް ފާޑުވިދާޅުވެފައެވެ.  

އެގޮތުން އެމްޑީީޕީން ވެރިކަމަށް އަންނަންވެގެން ރައްޔިތުންނަށް ވެފައިވާ ވައުދުތައް ނުފުއްދޭ ކަމަށާ، އަދުގެ ސަރުކާރުން ހިންގަމުންދާ ކޮރަޕްޝަންގެ މައްސަލަތައް ތަހުގީގު ނުކުރާ ކަމަށް އޭނާ ވިދާޅުވިއެވެ. 

Advertisement

"ކޮންމެ ބަނދަރަކާއި ގުޅިގެން އެމްއެމްޕީއާރުސީގެ ވައްކަން ހޯދާތަން ފެންނަންޖެހޭނެ. ކޮންމެ ބަނދަރަކާއި ގުޅިގެން މި ސަރުކަާރުގެ ވެންޓިލޭޓަރު ވައްކަން ހޯދަން އުޅޭތަން ފެންނަން ޖެހޭނެ. ކޮންމެ ބަނދަރަކާއި ގުޅިގެން ގަލޮޅު އުތުރު މާލެއަށް ބޯހިޔާވަހިކަން ފޯރުކޮށްދޭން ޖެހޭނެ. ކޮންމެ ބަނދަރަކާއި ގުޅިގެން ގެއްލިފައިވާ ރިލުވާނާއި މަރާލާފައިވާ ޔާމީން އިންސާފު ހޯދާތަން ފެންނަންޖެހޭނެ. ކޮންމެ ބަނދަރަކާއި ގުޅިގެން އެމްޑީޕީން މަސްވެރިންނަށް ވީ ވައުދުތައް ފުއްދާތަން ފެންނަންޖެހޭނެ." އީވާ ވިދާޅުވިއެވެ. 

އީވާގެ މި ވާހަކައާއި ގުޅިގެން މަލީހު ކުރެއްވި ޓުވީޓެއްގައި ވިދާޅުވީ، ރައީސް އިބްރާހީމް މުހައްމަދު ސޯލިހަށް ވަޢުދު ނުފުއްދުނުކަމާއި, ވައްކަން އާންމުކޮށްފިކަމާއި, ދައުލަތް ބަނގުރޫޓްކޮށްފިކަމާއި, ވެރިކަން ނުކުރެވޭ ކަމާއި, ނާޤާބިލުކަމުގެ ވާހަކަ އެންމެ ގަދަޔަށް ދައްކަނީ އެމަނިކުފާނު ގެ ޢާއިލާ ތެރެއިންކަމަށެވެ. 

"ދެން ރައީސް ޞާލިހު ޗެކްއައުޓްވާން އެބަޖެހޭ." މަލީހު ވިދާޅުވިއެވެ. 

އެމްޑީޕީގެ އެތެރޭގައި އުފެދިފައިވާ ހަމަނުޖެހުންތަކާއި ގުޅިގެން އެ ޕާޓީ ވަރަށް ބޮޑަށް ދެކަފިވެފައިވާއިރު, އެ ޕާޓީގެ ރައީސް، މުހައްމަދު ނަޝީދުގެ ފެކްޝަނުގެ ހިމެނޭ މެންބަރުން އަންނަނީ ސަރުކާރަށް ވަރަށް ބޮޑަށް ފާޑުވިދާޅުވެ، ރައީސް ޞާލިހަށް ދެވަނަ ދައުރެއް ދެއްވަން ނުފެންނަ ކަމަށް ވިދާޅުވަމުންނެވެ.