ފީފާ ވޯލްޑްކަޕް 2022 ގައި މުބާރާތުގެ އެންމެ ދަށް ޓީމުތަކުގެ ތެރޭގައި ބެލެވުނު ޖަޕާނުން ވަރުގަދަ ޖަރުމަނު ބަލިކޮށް ބޮނޑި ދީފިއެވެ.
ގަތަރުގެ ޚަލީފާ އިންޓަނޭޝަނަލް ސްޓޭޑިއަމްގައި ކުޅުނު މި މެޗު ޖަޕާނުން ކާމިޔާބުކޮށްފައިވަނީ ފަހަތުން އަރާ ޖެހި ލަނޑުތަކާއެކު 2-1 ގެ ނަތީޖާއަކުންނެވެ.
ދުނިޔޭގެ ޗެމްޕިއަންކަން ހަތަރު ފަހަރު ހޯދާފައިވާ ޖަރުމަނު އަތުން ހޯދި މި މޮޅަކީ ވޯލްޑްކަޕް ތާރީހުގައި ޖަޕާނަށް މިހާތަނަށް ލިބުނު އެންމެ ބޮޑު މޮޅެވެ. އަދި އެންމެ ރަނގަޅު ނަތީޖާއެވެ.
މެޗުގެ ހަތްވަނަ މިނެޓުގައި ޑައިޗީ ހުރަސްކުރި ބޯޅައަކުން ޑައިޒަން މައެޑާ ލަނޑެއް ޖެހި ނަމަވެސް އެއީ އޮފްސައިޑު ލަނޑެއް ކަމަށް ވަނީ ނިންމާފައެވެ.
މެޗުގެ 30 ވަނަ މިނެޓުގައި ޖަޕާނުގެ ކީޕަރު ކުރި ފައުލަކާއި ގުޅިގެން ޖަރުމަނަށް ޕެނަލްޓީއެއް ލިބުނެވެ. މެޗުގެ 32 ވަނަ މިނެޓުގައި ލިބުނު މި ޕެނަލްޓީ ގުންޑޮގާން ވަނީ ފަސޭހަކަމާއެކު ކާމިޔާބުކޮށްފައެވެ. އަދި ފުރަތަމަ ހާފުގެ އިތުރު ވަގުތުގައި ކައި ހަވާޓްޒް ލަނޑެއް ޖެހި ނަމަވެސް އެއީ އޮފްސައިޑް ލަނޑެއް ކަމަށް ނިންމިއެވެ.
ޖަރުމަނުގެ އެ ލީޑު ހިފަހައްޓާލެވޭ ގޮތް ވީ 74 ވަނަ މިނެޓާއި ހަމަޔަށެވެ. ބަދަލު ކުޅުންތެރިއެއްގެ ގޮތުގައި ކުޅެން އެރި ރިޓްސޫ ޑޯން ވަނީ އެ ޓީމަށް ނަތީޖާ ހަމަހަމަކޮށްދީފައެވެ.
ޖަޕާނުން ވަނީ މެޗުގެ 83 ވަނަ މިނެޓުގައި އިތުރު ގޯލެއް ޖަހައި މެޗުގެ ލީޑު ނަގާފައެވެ. މި ލަނޑު އެ ޓީމަށް ކާމިޔާބު ކޮށްދީފައިވަނީ ވެސް ބަދަލު ކުޅުންތެރިއެއްގެ ގޮތުގައި އެރި ޓަކުމާ އަސާނޯއެވެ.
މުބާރާތުގައި ދެން ޖަޕާނުން ބައްދަލުކުރާނީ މިމަހުގެ 27 ވަނަ ދުވަހު ކޮސްޓަރިކާ އާއެވެ.
Advertisement
This content is created and paid for by advertisers and does not involve Voice Journalists
