ގަތަރުގައި މިހާރު ކުރިޔަށްދާ ފީފާ ވޯލްޑް ކަޕުގެ ގްރޫޕް ޖީ ގައި ކެމަރޫން އަތުން ހަނި ތަފާތަކުން ސްވިޓްޒަލަންޑް މޮޅުވެ ފެށުން ރަނގަޅުކޮށްފިއެވެ.

ވާދަވެރި ކުޅުމެއް ފެނިގެންދިޔަ މި މެޗު ސްވިޒަލަންޑް ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ. ދެ ޓީމަށްވެސް ލަނޑުޖަހާނެ ރަނގަޅު ފުރުސަތުތަކެއް މި މެޗުގައި ލިބިގެންދިޔަ އެވެ.

މީގެތެރެއިން ކެމަރޫންގެ ބްރަޔަން އެމްބުއެލޯ އަށް ލިބުނު ފަހި ފުރުސަތު ފާހަގަކޮށްލެވެއެވެ. އޭނާ ފޮނުވާލި މި ބޯޅައިގެ ހުރަހަކަށް ވީ ސްވިޓްޒަލެންޑްގެ ތަޖުރިބާކާރު ކީޕަރު އިޔާން ސޮމާ އެވެ.

Advertisement

ދެވަނަ ހާފު ފަށައިގެން ތިންވަނަ މިނެޓުގައި ސްވިޓްޒަލަންޑުން ވަނީ ލަނޑު ޖަހާ ލީޑު ނަގާފައެވެ. މި ލަނޑު އެޓީމަށް ޖަހާދިނީ ސްވިޒަލެންޑަށް ނިސްބަތްވާ ކެމަރޫނަށް އުފަން ބްރީލް އެމްބޯލޯއެވެ. މި ލަނޑު ކާމިޔާބުކުރުމަށްފަހު އޭނާ އުފާފާޅުކޮށްފައެއް ނުވެއެވެ.

މިލަނޑަށްފަހު ވެސް ލަނޑުޖަހާނެ ރަނގަޅު ފުރުސަތުތަކެއް ދެ ޓީމަށްވެސް ލިބިގެންދިޔަ ކަން ފާހަގަކޮށްލެވެއެވެ. ސްވިޓްޒަލަންޑާއި ކެމަރޫންގެ އިތުރުން މި ގްރޫޕުގައި ދެން ހިމެނޭ ޓީމުތަކަކީ ސާބިއާ އާއި ބްރެޒިލްއެވެ.