އޭޝިއާ ބައްރުން ފާހަގަކޮށްލެވޭ ދެކުނު ކޮރެއާއިން މިފަހަރުގެ ވޯލްޑް ކަޕުގައި ކުޅުނު ފުރަތަމަ މެޗުގައި އުރުގުއޭ މޮޅުވިޔަނުދީ ހިފަހައްޓައިފި އެވެ. 

ގްރޫޕް އެޗް ގައި ކުޅުނު މި މެޗު އެއްވަރުވީ ދެ ޓީމުންކުރެ ޓީމަކަށް ލަނޑެއް ނުޖެހި 0-0 އިންނެވެ. 

މެޗު ފަށައިގެން ދެ ޓީމުގެ ފަރާތުން ވަނީ ދާދި ހަމަހަމަ ކުޅުމެއް ފެނިގެންގޮސްފައެވެ. މީގެތެރެއިން ލަނޑުޖަހާނެ ފުރުސަތެއް އެންމެ ފުރަތަމަ ތަނަވަސްކުރީ ވެސް ދެކުނު ކޮރެއާ އިންނެވެ. ސޮން ފޮނުވާލަން މަސައްކަތްކުރި ހަމަލާ ހުއްޓުވީ އުރުގުއޭ ޑިފެންޑަރުންނެވެ. 

Advertisement

އުރުގުއޭ އިން މެޗުގައި ލީޑުޖަހާނެ ރަނުގެ ފުރުސަތެއް ލިބި ވަނީ ބޭކާރުވެފައެވެ. މެޗުގެ 42 ވަނަ މިނެޓުގައި އުރުގުއޭގެ ގޯޑިން ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ. މެޗުގެ ދެވަނަ ހާފުގައި އުރުގުއޭގެ ޑާވިން ނޫނޭޒް އާއި އެޑިސަން ކަވާނީއަށް ވަނީ ލަނޑު ޖަހަން ފުރުސަތުތަކެއް ލިބި ބޭކާރުވެފައެވެ.

މީގެ އިތުރުން މެޗު ނިމެން ކައިރިވެފައިވަނިކޮށް އުރުގުއޭގެ މިޑްފިލްޑަރު ވަލްވާޑޭ ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ. އޭގެ ފަހުން ކޮރެއާގެ ސޮން އޭރިއާ ބޭރުން ފޮނުވާލި ބާރު ހަމަލާ ދިޔައީ ގޯލާ އަމާޒުނުވެ ބޭރަށެވެ.

މި ގްރޫޕުގައި ހިމެނޭ ޓީމުތަކަކީ ދެކުނު ކޮރެއާ އާއި އުރުގުއޭގެ އިތުރުން ޕޯޗުގަލް އަދި ގާނާއެވެ.