މިއަދު ސަރުކާރުގެ ވެރިކަންކުރާ މައި ޕާޓީ އެމްޑީީޕީ، ވެފައި މިވަނީ އެންމެ ރާއްޖެއަށް އެންމެ ދަތިވި ދުވަސްވަރު ގައުމު ސަލާމަތް ކޮށްދިން ޕާޓީއަށް ކަމަށް އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ވަރަށް ބޮޑަށް ތައުރީފް ކުރައްވައި ރޮޒައިނާ މިއަދު ކުރެއްވި ޓުވީޓެއްގައި ވިދާޅުވީ، އެމްޑީީޕީއަށް ރައްޔިތުންގެ އިތުބާރު ހޯދަވައިދެއްވީ އެމަނިކުފާނު ކަމަށެވެ.
"އިގްތިޞާދީ އަދި އިޖުތިމާއީ ގޮތުން ގައުމު ބިނާ ކުރައްވައި، ގައުމީ ރޫހު އާލާ ކުރައްވައި، ގައުމު އެއްބައިވަންތަ ކުރުވައި، ހަމަހަމަކަމާއި އެކު ޚިދުމަތް ދެއްވުމަށް ތިޔަ ކުރައްވަމުން ގެންދަވާ މަސައްކަތަށް ވަރަށް ބޮޑަށް މަރުހަބާ" ރައީސް ޞާލިހަށް ތައުރީފް ކުރައްވައި ރޮޒައިނާ ވިދާޅުވިއެވެ.
މިއާއެކު ރޮޒައިނާ ވިދާޅުވީ، މީގެ ކުރިން މީހުން އެމްޑީޕީ ދެކެނީ މަގުމަތީ ހަރަކާތަށް އެކަނި ފަރިތަ ޕާޓީއެއްގެ ގޮތުގައި ކަމަށާ، އެހެންނަމަވެސް، މިއަދު އެމްޑީީޕީ ވެފައި މިއޮތީ މިގައުމަށް އެންމެ ދަތިވި ދުވަސްވަރު ގައުމު ސަލާމަތް ކޮށްދިން ޕާޓީއަށް ކަމަށެވެ.
"ސަލާމަތީ ޚިދުމަތް ތަކުގެ އިތުބާރު އޮތް ޕާޓީ އަކަށް. ހުރިހާ ޕާޓީ ތަކަކާއި އެކު މަސައްކަތް ކުރެވޭ ޕާޓީއަކަށް" ރޮޒައިނާ ވިދާޅުވިއެވެ.
ރޮޒައިނާ އިތުރަށް ވިދާޅުވީ، މިގައުމަށް ޑިމޮކްރަސީ ތައާރަފްވީފަހުން އެންމެ އަމާން ފަސް އަހަރަކީ ރައީސް ޞާލިހުގެ ފަސް އަހަރު ކަން އެއީ އެއްވެއް ޝައްކެތް އޮތް ކަމެއް ނޫންކަމަށާ، ކޯލިޝަން އާއި އެކު ވެރިކަމަށް ވަޑައިގެން، އެ އެއްބަސްވުމަށް ހަމައެކަނި އިހްތިރާމް ކުރެއްވީ އެމަނިކުފާނު ކަމަށެވެ.
އަދި އައު ގާނޫނު އަސާސީގެ ދަށުން، އެ ގާނޫނު އަސާސީ އާއި އެއްގޮތަށް ވެރިކަން ކުރެއްވި ހަމައެކަނި ރައީސް އަކީ ރައީސް ޞާލިހު ކަން ފާހަގަކުރައްވައި ރޮޒެއިނާ ވިދާޅުވީ، އަންހެނުންގެ ތަރައްގީއަށްވެސް އެންމެ ހަރުދަނާ މަސައްކަތް ކޮށްދެއްވީ އެމަނުކުފާނު ކަމަށެވެ.
"ސިޔާސީ މަގާމުތަކަކަށް އަންހެނުން ގެނައުމާއި، އިގްތިސާދީ ގޮތުން އަންހެނުން ކުރިއެރުވުމަށް ލޯން އަދި ޓްރެއިނިންގ ދިނުމާއި، އިޖުތިމާއީ ގޮތުން އަންހެނުންނަށް ފަސޭހަ ކޮށްދިނުމަށް 6 މަހުގެ ވިހެއުމުގެ ޗުއްޓީ" ރައީސް ޞާލިހަށް ތައުރީފް ކުރައްވައި ރޮޒައިނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
