ގަތަރު ގައި މިހާރު ކުރިއަށްދާ ވޯލްޑް ކަޕް 2022 ހުޅުވިގެން ދިޔަ ކުލަ ގަދަ ރަސްމިއްޔާތަށްފަހު، މުބާރާތުގެ ފުރަތަަމަ މެޗު ކުޅެވުނު އިރު، އެ މެޗުގައި ބައްދަލު ކުރީ ގަތަރާއި އެކުއެޑޯ އެވެ. 

އަލް ބައިތް ސްޓޭޑިއަމުގައި ކުޅުނު އެ މެޗު ނިމިގެން ދިޔައީ 2-0 އިން އެކުއެޑޯ މެޗު ކާމިޔާބުކޮށްގެންނެވެ. އެއީ ވޯލްޑް ކަޕުގެ ތާރީހުގައި މުބާރާތް ބާއްވާ ގައުމު ކުޅުނު ފުރަތަމަ މެޗުން ބަލިވި ފުރަތަމަ ފަހަރެވެ.

އެ މެޗުގެ ތެރެއިން، ގިނަ ބައެއްގެ ޚާއްސަކޮށް މެޗު ބަލަން ވަދެ ތިބި ޗައިނާ ރައްޔިތުންގެ ލޮލުގައި އަޅައިގަތީ، މެޗުން ގަތަރު ބަލިވަމުން ދިޔުމާއި ގުޅިގެން، އެ ގައުމުގެ ޒުވާން ކުއްޖަކު އުޅެމުން ދިޔަ ގޮތެވެ.  

ގަތަރުގެ ސަގާފީ ފަގުޑި ބޮލުގައި އަޅައިގެން ހުރި, އަބްދުއްރަހުމާން ފަހަދު އައްޘާނީ ނަމަކަށް ކިޔާ 16 އަހަރުގެ އެ ކުއްޖާ، މެޗުން ގަތަރު ޓީމު ބަލިވަމުން ދާތަން ފެނި، ބޮލުގައި އަޅައިގެން ހުރި ފަގުޑި ފަހަތައް އެއްލައި، މޫނުމަތިން ހިތާމަވެރިކަމުގެ ކުލަވަރާއި، ހައިރާން ކަމުގެ ކުލަވަރާއު އެކި ކުލަވަރުތައް ދިޔައީ ދައްކަމުންނެވެ. 

އެ މަންޒަރާއި މެދު އެންމެ ގަޔާވި ބަޔަކަށް ވެގެން ދިޔައީ ސްޓޭޑިއަމް އަށްވަދެ ތިބި ޗައިނާ މީހުންނަށެވެ. އެގޮތުން، އެމީހުންވަނީ އެ ކުއްޖާގެ ވީޑިއޯތައް ކޮށް މީސްމީޑިއާގައި ވައިރަލްކޮށްލާފައެވެ. އަދި އޭގެ އިތުރުން، އޭނާ އާއި ދިމާއަށް 'ވޮންޓޮން ވްރެޕާ ޕްރިންސް' ގެ ނަމުން ނަންދީ  އެމީހުންވެސް ބޮލުގައި ފޮތިގަނޑު ގަނޑު އަޅައިގެން އެކުއްޖާގެ އަމަލުތައް ހުރިގޮތް ނަކަލުކޮށް ކޮށްފައިވާ ވީޑިއޯތަކާއި، "ލައީބް" އާއި އެއްގޮތް ކޮށް ކޮށްފައިވާ ޕޯސްޓަރު ތަކުން މީސްމީޑިއާ ފުރާލިއެވެ. ލައީބް އަކީ ގަތަރުގެ ވޯލްޑްކަޕްގެ ރަސްމީ މަސްކޮޓް އެވެ. އަދި 'ވޮންޓޮން ވްރެޕާ ޕްރިންސް' ގެ ނަމުން ޗައިނާ މީހުން އޭނާ އަށް ކިޔާފައިވަނީ، ޗައިނާ މީހުން ކައި އުޅޭ ވޮންޓޮން ވްރެޕާ ކިޔާ އެއްޗަކާއި އޭނާގެ ފަގުޑިއާއި އެއްގޮތް ކުރުމުގެ ގޮތުންނެވެ. 

ޗައިނާގެ ފޭނުންގެ މި ވީޑިއޯ ތަކާއި ގުޅިގެން އަބްދުއްރަހްމާން އާއްމު ކުރި ވީޑިއޯއެއްގައި އޭނާ ވަނީ ޗައިނާގެ މީހުން ހަދާފައިވާ އެ ހުރިހާ ޕޯސްޓުތަކާއި ވީޑިއޯތައްވެސް އޭނާ ބަލާފައިވާ ކަމަށް ބުނެފައެވެ. އަދި އޭނާ އަކީ މިވަގުތު ޗައިނާގައި އެންމެ މަޝްހޫރު އެކަކަށް ހަދައިދިން ކަމަށްޓަކައި އޭނާ ވަނީ ޗައިނާގެ ފޭނުންނަށް ޝުކުރު އަދާކޮށްފައެވެ.