ލޯކަލް ޓުއަރިޒަމް ފުޅާ ދާއިރާއެއްގައި ހިންގަމުންދާ ކ މާފުއްޓަކީ ހަށިވިއްކާ މަރުކަޒެއްގެ ގޮތުގައި ސިފަކުރުމުން އެ ރަށުގެ ކައުންސިލުން ކަންބޮޑުވުން ފާޅުކޮށްފިއެވެ. 

މާފުށީ ކައުންސިލުން ވަނީ އެ ކަމާއި ގުޅިގެން ބަޔާނެއްވެސް ނެރެފައެވެ. 

މާފުށީ ކައުންސިލުން ނެރެފައިވާ ބަޔާނުގައި ބުނެފައިވަނީ މާފުށީގައި ހަށިވިއްކުމުގެ އެއްވެސް ކަމެއް ހިނގައިގެން މިހާތަނަށް ރިޕޯޓުކޮށްފައި ނުވާއިރު މާފުއްޓާއި ގުޅިގެން ނެރެފައިވާ ރިޕޯޓުތަކުގައި އެ ރަށަކީ ހަށިވިއްކުމުގެ މަރުކަޒެއްގެ ގޮތުގައި ސިފަކުރުމަކީ ވަރަށް ޒިންމާދާރުކަން ކުޑަ ކަމެއް ކަމަށެވެ. 

ކައުންސިލުން ބުނީ މާފުށީގައި ދިރިއުޅޭ މީހުންނާއި އެ ރަށަށް އަރާ ދެ ޖިންސުގެ މީހުންނަކީ ހަށިގަނެ ހަށި ވިއްކުމުގައި އުޅޭ މީހުން ކަމުގައި ދެކޭނަމަ އެއީ އެގޮތަށް ދެކޭ މީހުންގެ އުނިކަން ކަމަށެވެ. 

އޭގެ އިތުރުން މަސްތުވާ ތަކެއްޗާއި ގުޅުންހުރި މައްސަލަތައް ރާއްޖޭގެ އެކި ކަންކޮޅުތަކުގައި ފެތުރެމުންދާ ކަމަށާއި، އެއީ ލޯކަލް ޓުއަރިޒަމްއާއި ގުޅުންހުރި ކަމެއްކަމަށް ގަބޫލުނުކުރާކަމަށް ކައުންސިލުގެ ބަޔާނުގައި ވަނީ ބުނެފައެވެ. އަދި މާފުއްޓަކީ ގިނަ އަދަދެއްގެ ބަޔަކު ޒިޔާރަތްކުރާ ރަށަކަށްވުމުން ކުރިމަތި ވެދާނެ އިޖްތިމާއީ މައްސަލަތަކަށް އިޖާބަ ދިނުމުގައި ކަމާބެހޭ ހުރިހާ އިދާރާތައް މަސައްކަތް ކުރަން ޖެހެނީ އެ މާހައުލަކާ އެކަށޭނަ ގާބިލްކަން ލިބި ތިބެގެން ކަން މި ކައުންސިލުންވެސް ގަބޫލު ކުރާކަމަށް ވެސް ބުނެފައިވެއެވެ. 

މާފުށީ ކައުންސިލުން ބުނީ  ރަލާ އޫރުމަހާ ނުލައިވެސް ޓޫރިޒަމްއަކީ ކުރިއަށް ގެންދެވިދާނެ ވިޔަފާރިއެއް ކަން މުޅި ދުނިޔެއަަށް މާފުށީ ރައްޔިތުން ސާބިތުކޮށް ދީފައިވާ ކަމަށެވެ. އަދި ޓޫރިސްޓުން މާފުއްޓަށް އަންނަނީ އެ ރަށުގެ ރީތިކަން ދެކެލާ ހިތްހަމަ ޖައްސާލު ކަމަށްވެސް ބުނެފައިވެއެވެ.

އަހަރަކު ގާތްގަނޑަކަށް 40 މިލިއަން ޑޮލަރު (ގާތްގަނޑަކަށް 618 މިލިއަން ރުފިޔާ) ރޯލް ކުރާ މާފުއްޓަކީ ރާއްޖޭގައި އޮތް އެންމެ ގިނައިން އާމްދަނީ ވަންނަ ރަށެވެ. މި ރަށުގައި 63 ތަނެއްގައި 1,868 ޓޫރިސްޓު އެނދު އެބަހުއްޓެވެ.

އެއާއެކު މާފުށި ބަދުނާމުވާ ގޮތަށް ހަގީގަތާއި ޚިލާފަށް ރިޕޯޓުތައް އާންމު ކުރުމަކީ ވަރަށް ބޮޑަށް ކަންބޮޑުވާ ކަމެއްކަން މާފުށީ ކައުންސިލުން ވަނީ ބުނެފައެވެ. އަދި އެކަން އެގޮތަށް ނުކުރުމަށްވެސް އެ ކައުންސިލުން ގޮވާލާފައިވެއެވެ.