ދައުލަތުގެ މީޑިޔާ އިން ވޯލްޑް ކަޕުގެ މެޗުތައް ގެނެސްދެމުން އަންނަ ޔެސް ޓީވީގެ ޕްރީ ޝޯވ ގައި އާޖެންޓީނާ އަދި މެކްސިކޯ ބައްދަލުކުރާ މެޗުގެ ހާއްސަ މެހެމާނަކަށް ނައިބު ރައީސް ފައިސަލް ނަސީމް ވަޑައިގަންނަވާ ގޮތަށް ނިންމަވައިފި އެވެ. 

އިތުބާރު ހުރި މަސްދަރަކުން ވޮއިސް އަށް ވަނީ މި މައުލޫމާތު ކަށަވަރުވެފައެވެ. އަދި ނައިބު ރައީސްގެ އަރިސް ބައެއް ބޭފުޅުން ވެސް ވަނީ މިކަން ކަށަވަރުކޮށްދެއްވާފައެވެ. 

ސިޔާސީ ފިކުރުތައް އެއްކިބާވެ މިިނިވަން ޖައްވެއްގައި ކުޅިވަރު ހަރަކާތްތައް ގެނެސްދޭއިރު ބައެއް ފަރާތްތަކުން ދެކޭ ގޮތުގައި މިއީ ސަރުކާރު ޕްރޮމޯޓުކުރުމަށް ހިންގާ ހީލަތްތެރި ރޭވުމެކެވެ.

Advertisement

އަދި ވޯލްޑް ކަޕު ފަދަ ޝޯވތަކުގައި ނައިބު ރައީސް ބައިވެރިވުމަކީ އާންމުން އެކަމާ ހިތްހަމަނުޖެހޭނެ ކަމެއް ކަމުގައިވެސް ބައެއް އާންމުން ބުނެއެވެ. 

މިއީ ރާއްޖޭގެ ތާރީހުގައި ވެސް ވޯލްޑް ކަޕްގެ ޕްރީޝޯއެއްގެ ތެރެއިން ސިޔާސީ މަގާމެއްގެ އިސް ބޭފުޅަކަށް ފުރުސަތު ލިބޭ ފުރަތަމަ ފަހަރެވެ. 

އާޖެންޓީނާ އާއި މެކްސިކޯ ބައްދަލުކުރާ މެޗު ފަށާނީ ރާއްޖެގަޑިން މިރޭ 00:00 ގައެވެ. އަދި މެޗުގެ ކުރިން އޮންނަ ޕްރީ ޝޯ ޔެސް ޓީވީން ގެނެސްދޭން ފަށާނީ އޭގެ ގަޑިއެއްހާއިރު ކުރިންނެވެ.