ޤަތަރުގައި މިހާރު ކުރިއަށްދާ ވޯލްޑް ކަޕް ބެލުމަށް އެކި ގައުމުތަކުން އެ ގައުމަށް ޒިޔާރަތްކުރާ ގިނަ ބައެއްގެ ސަމާލުކަން 'މެޓްރޯ މޭން' ހޯދައިފިއެވެ. 

ކެންޔާ އަށް ނިސްބަތްވާ 23 އަހަރުގެ އަބޫބަކުރު އައްބާސް ނަމަކަށް ކިޔާ މި ޒުވާނާގެ މިހާރު ވެގެން ގޮސްފައިވަނީ ވޯލްޑްކަޕް ބަލަންދާ މީހުންގެ 'ފޭން' އަކަށެވެ. އަދި އޭނާގެ ވީޑިއޯ ތަށް މީސްމީޑިއާގެ އެކި ޕްލެޓްފޯމް ތަކުގައި މިހާރު ދަނީ ދައުރުވަމުންނެވެ. 

މިފަދަ ބޮޑު ސަމާލު ކަމެއް އަބޫބަކުރު ނުވަތަ މެޓްރޯ މޭން އަށް ލިބިފައި މިވަނީ، ޓެނިސް އަމްޕަޔަރ ގޮނޑިއެއްގައި އިށީނދެ އިނދެގެން، ޝަހާދަތް އިނގިލިން އިޝާރާތް ކުރާ އަންގިއެއް އަތަށް ލައްވައިގެން، މެގަފޯން އިން 'މެޓްރޯ, މި ދިމާލުގައި މެޓްރޯ، މިދިމާލުގައި' އެފަދައިން ތަކުރާރު ކޮށް ކިޔަމުންދާ ގޮތުގެ ސަބަބުންނެވެ. 

Advertisement

ޤަތަރުގެ ތާރީޚީ މާރުކޭޓެއް ކަމަށްވާ ސޯޤް ވާޤިފް ކައިރީ އިނދެގެން އެތަނަށް ޒިޔާރަށްކުރާ އެތައް ބަޔަކަށް އެންމެ ކައިރީގައި ހުންނަ މެޓްރޯ ހުރި ތަން، މި ޒުވާނާ ކިޔައިދެމުންދާ ގޮތާއި، އޭނާ ނަކަލުކޮށް އެހެން މީހުން އެގޮތަށް އެހެން ކިޔާ ވީޑިއޯ ތައް މިހާރު މީސްމީޑިއާގައި ވައިގައި ހިފާފައިވާ އިރު، ގިނަ ބައެއްގެ ލޯބިވެސް އޭނާއަށް ވަނީ ލިބިފައެވެ. 

"އަހަރެމެން އޭނާ ދެކެ ވަރަށް ލޯބިވޭ. އަހަރެމެން އެ މެޓްރޯ މޭން ދެކެ ވަރަށް ލޯބިވޭ." މެޓްރޯ މޭންއަށް އިޝާރާތްކޮށް އޭނާގެ ފޭން އެއް ބުނެފައިވެއެވެ. 

"އަހަރެންނަށް އޭނާގެ ވީޑިއޯ އެއް ފެނުނީ ޓިކްޓޮކް އިން. އަހަރެންނަށް އެކަން ވަރަށް މަޖާވި. އޭނާ އަހަރެން ހެއްވާލާ. އެހެން މީހަކު ހެއްވާލަ ދިނުމަކީ އެހާވެސް ފަސޭހަ ކަމެއް." މެޓްރޯ މޭންއަށް ތައުރީފް ކޮށް އެހެން މީހަކު ބުންޏެވެ. 

އައްބާސް އާއި ގުޅޭ މާގިނަ މައުލޫމާތެއް މިހާތަނަށް އެނގިފައި ނުވި ނަމަވެސް، ކޮންމެ ދުވަހަކުވެސް ސޯޤް ވާޤިފް މާރުކޭޓަށް ޒިޔާރަތް ކުރާ މީހުންނާއި އެނޫން މީހުންގެވެސް ބޮޑު މަގުބޫލުކަމެއް އޭނާއަށް ވަނީ ލިބިފައެވެ.