ސާބިއާ ޓީމުގެ މައްސަލައެއް ފީފާގެ ޑިސިޕްލިނަރީ ކޮމެޓީން ބަލަންފަށައިފިއެވެ. 

މިހާރު ކުރިއަށްދާ ވޯލްޑްކަޕް ގައި ސާބިއާ އާއި ބްރެޒިލް ބައްދަލުކުރި މެޗު ކުޅެވުނު ދުވަހު އެޓީމުގެ ކުޅުންތެރިން ތިބި ޑްރެސިންގް ރޫމް ތެރޭގައި ސާބިއާ ޓީމުން ވަނީ އެ ގައުމުގެ ދިދަ ހަރުކޮށްފައެވެ. އެގޮތުން، ހަރުކުރި ދިދައިގައި އައުޓްލައިގައި މީގެ ކުރިން ސާބިއާގެ އިސްތިޢުމާރީ ބާރުގެ ދަށުގައި އޮތް ކަސާވާވެސް ވަނީ ހިމަނާފައެވެ. 

ސާބިއާ ޓީމުގެ ޑްރެސިންގް ރޫމުގައި ހަރުކުރި ދިދަ

ކަސާވާ ސާބިއާގެ އަޅުވެތި ކަމުގެ ދަށުން ސަލާމާތްވެފައިވަނީ 2018 ވަނަ އަހަރުއެވެ. އަދި ކަސާވާ އަކީ މިހާރު ފީފާގެ މެންބަރު ގައުމެއްވެސް މެއެވެ. އެހެން ނަމަވެސް އެއީ މިނިވަން ގައުމެއް ކަމުގައި ސާބިއާ އިން އަދިވެސް ނުދެކެއެވެ. 

އަދި ސާބިއާ ޓީމުގެ ޑްރެސިންގް ރޫމުގައި ހަރުކުރި ދިދައިގައި ކަސާވާއަކީ ވެސް އެގައުމުގެ ތަނެއްގެ ގޮތުގައި ސިފަވާގޮތަށް ކުރަހާފައި އެވަނީ އެހެންވެ ކަމުގައި ގަބޫލުކުރެވެއެވެ. 

ސާބިއާ ޓީމުގެ މި ޢަމަލާއި ގުޅިގެން ގިނަ ބަޔަކު އަންނަނީ ނުރުހުން ފާޅުކުރަމުންނެވެ. އެގޮތުން، އެ ޢަމަލަކީ، އަނިޔާވެރިކަމާއި، އިސްތިއުމާރުގެ އިތުރުން ގަތުލުއާމްމު ހިންގުމަށް ހިތްވަރުދޭ ޢަމަލެއް ކަމަށާ، އެފަދަ ކަމެއް ޕްރޮމޯޓް ކުރާ މަންސައެއްގެ ގޮތުގައި ފީފާ ވޯލްޑްކަޕް ހެދުމަކީ އެއްވެސް ގޮތަކުން ބަލައި ގަނެވޭނެ ކަމެއް ނޫން ކަމަށްވެސް އެ ފަރާތްތަކުން ވަނީ ބުނެފައެވެ.  

ސާބިއާ ޓީމުގެ މި މައްސަލަ ހޫނުވެފައި ވަނިކޮށް ފީފާއިން ނެރުނު ބަޔާނެއްގައި ވަނީ، ފީފާގެ ގާނޫނާއި ގަވާއިދުގެ މަތިން، ސާބިއާ ޓީމުގެ މި ޢަމަލު، ޑިސިޕްލިނަރީ ކޮމެޓީން ބަލަމުންދާނެ ކަމަށެވެ.