އުނގޫފާރު ރީޖަނަލް ހޮސްޕިޓަލްގެ އެކްސްޓެންޝަން އިމާރާތުގެ މަސައްކަތް ނިންމާ އެ އިމާރާތް ހަވާލުކޮށްފިއެވެ.

27 ޖެނުއަރީ 2021 ގައި އެލިއާ ކޮންސްޓްރަކްޝަން އާއި މަސައްކަތް ހަވާލު ކުރެވުނު އެ އިމާރާތުގެ ބިންގާ އެޅި ރަސްމީކޮށް މަސައްކަތް ފެށިގެންދިޔައީ 8 މާރޗް 2021 ގައެވެ. އެ މަސައްކަތް އެލިއާ އާއި ހަވާލު ކުރެވިފައިވަނީ އަގު 80 މިލިއަން ރުފިޔާއަށެވެ. 

އެ މަސައްކަތުގެ ދަށުން އިމާރާތުގެ ތިރީބައިގައި 10 އެނދުގެ އެމަޖެންސީ ޔުނިޓް (އީއާރު)އެއް ވަނީ ގާއިމް ކޮށްފައިވެއެވެ. އެތަނުގައި ހައިޑިޕެންޑެންސީ 4 އެނދު، ލޯޑިޕެންޑެންސީ 4 އެނދު ގާއިމްކޮށްފައިވެއެވެ. މީގެ އިތުރުން ރޭޑިއޮލޮޖީ ޑިޕާޓްމަންޓެއް ގާއިމް ކޮށްފައިވާއިރު އެތަނުގައި އަލްޓްރާ ސައުންޑް ސްކޭން 2 ރޫމާއި އެކްސްރޭ 2 ރޫމާއި މެމޮގްރަފީ ރޫމަކާއި ސީޓީ ސްކޭން ރޫމަކާއިއެމްއާރުއައި ރޫމް ހިމެނެއެވެ.

އެ ހޮސްޕިޓަލުގެ ފުރަތަމަ ފަންގިފިލާގައި ކަށީގެ ސާޖަރީތަކަށް ހާއްސަ ތިއޭޓަރަކާއި އަދި އެހެނިހެން ސާޖަރީ ތަކަށް ހާއްސަ 2 ތިއޭޓަރުގެ ތިއޭޓާ ކޮމްޕްލެކްސެއް ހިމެނެއެވެ. އަދި ހަމައެހެންމެ ދެވަނަ ފަންގިފިލާގައި ފިޒިއޮތެރަޕީ ޑިޕާޓްމަންޓު ގާއިމް ކޮށްފައިވާއިރު ހެލްތު މިނިސްޓްރީން ބުނީ މިހާރު ދެމުންގެންދާ ފިޒިއޮތެރަޕީގެ ހިދުމަތް އެތަނަށް ބަދަލުކުރެވި ހިދުމަތް ފުޅާކުރެވިގެން ދާނެ ކަމަށެވެ.

މީގެއިތުރުން އެކްސްޓެންޝަން އިމާރާތުގައި 10 ކޮޓަރީގެ ޕްރައިވެޓް ވޯޑެއް ވެސް ވަނީ ގާއިމް ކޮށްފައެވެ. ހެލްތު މިނިސްޓްރީން ބުނީ އެ 10 ކޮޓަރިއާއެކު ހޮސްޕިޓަލްގެ ޕްރައިވެޓް ރޫމްގެ އަދަދަ 16 އަށް އިތުރު ވެގެންދާނެ ކަމަށެވެ. އެ މިނިސްޓްރީން ބުނީ މި ޕްރޮޖެކްޓްގައި ހިމަނައިގެން 310 ކިލޯވޮޓްގެ ސޯލާޕެނަލް އެއްވެސް ހަރުކުރެވިފައިވާ ކަމަށެވެ.