ދިވެހިރާއްޖޭއަށް އިންޑިއާ އިން އިއްޔެ ދިން 100 މިލިއަން ޑޮލަރަކީ އެއްވެސް ޝަރުތަކާއި ނުލައި ދީފައިވާ އެހީއެއް ކަމަށް އެގައުމުން ބުނެފިއެވެ. 

ރާއްޖޭގައި ހުންނަ އިންޑިއާގެ އެމްބަސީން ދިވެހިބަހުންނާއި އިނގިރޭސިބަހުން ނެރުނު ބަޔާނުގައި ބުނީ އިންޑިއާ އިން ދިން އެހީއަކީ ރައީސް ސޯލިހް މިއަހަރުގެ އޮގަސްޓް މަހު އިންޑިއާ އަށް ކުރެއްވި ދަތުރުފުޅުގައި ބޮޑުވަޒީރު ނަރެންދްރަ މޯދީ އަރިހުން އެދުނު އެދުމަށް ދިން އެހީއެއް ކަމަށެވެ.

އަދި ރައީސް ޞާލިހާއި މޯދީގެ ޒަޢާމަތުގެ ދަށުން، އިންޑިއާ އާއި ރާއްޖެ އަންނަނީ ކޮވިޑްގެ ވަބާއާއި އަދި އެނޫންވެސް ދުނިޔޭގައި ހިނގަމުން އަންނަ ކަންކަމުގެ ސަބަބުން ކުރިމަތިވަމުން އަންނަ ގޮންޖެހުންތަކަކަށް ވަރަށް ގާތް ކޮށް މަސައްކަތް ކުރައްވަމުން ކަމަށާ، މި ދެ ގައުމުގެ ތަރައްގީހެ ގުޅުން އަންނަނީ އުމްރާނީ އަދި އިންސާނީ ވަސީލަތްތައް ތަރައްޤީ ކުރުމުގެ ރޮގުންވެސް ކުރިއަރަމުން ކަމަށް އެ ބަޔާނުގައި ބުނެފައިވެއެވެ. 

އިއްޔެ ފޮރިން މިނިސްޓަރ ޝާހިދާއި ފިނޭންސް މިނިސްޓަރ އިބްރާހިމް އަމީރު ވިދާޅުވީ އިންޑިއާ އިން ދިން 100 މިލިއަން ޑޮލަރަކީ ސްޓޭޓް ބޭންކް އޮފް އިންޑިއާ (އެސްބީއައި) މެދުވެރިކޮށް ބޮންޑް ގަންނަން ދިން ލޯނެއް ކަމަށެވެ. 

އިއްޔެ ލޯނުގެ ރަސްމީ ލިޔުން ހަވާލު ކުރަން ބޭއްވި ރަސްމިއްޔާތުގެ މައުލޫމާތު ހާމަކުރަމުން އިންޑިއާ އެމްބަސީގެ ބަޔާނުގައި ބުނެފައި ވަނީ އިންޑިއާ އިން ދިން ދީލަތި އެހީއަށް ފޮރިން މިނިސްޓަރ އަބްދުﷲ ޝާހިދު ވަނީ ރައީސް ސޯލިހާއި ދިވެހި ރައްޔިތުންގެ ނަމުގައި ބޮޑުވަޒީރު މޯދީ އަށް ޝުކުރު އަދާކޮށްފައި ކަމަށެވެ.

މި ފައިސާގެ އެހީ ފޯރުކޮށްދީފައިވަނީ ސްޓޭޓް ބޭންކް އޮފް އިންޑިއާ، އެސް.ބީ.އައި އަށް ދޫކުރެވޭ ޓްރެޝަރީ ބޮންޑް ސޭލްއެއް މެދުވެރިކޮށެވެ. އަދި އިންޑިއާއިން މި އެހީ ދީފައިވަނީ އެއްވެސް ޝަރުތަކާއިނުލާ، ސަރުކާރަށް ފެންނަ ގޮތުގައި އިސްކަންދީގެން ޤައުމަށް މިވަގުތު ދިމާވެފައިވާ އިޤްތިޞާދީ ދަތިކަމުން އަރައިގަތުމަށް ޙަރަދުކުރުމަށެވެ. މި ފައިސާގެ އެހީއަށް އިންޑިއާއިން ވަނީ އެސް.ބީ.އައިއަށް ސޮވެރެއިން ގެރެންޓީ ފޯރުކޮށްދީފައިއެވެ.