އެއްޖިންސުން ގުޅުން ހިންގުން ޕްރޮމޯޓް ކުރުމަށް ފައި ވިއްދާލާފައި ތިބި، ޖަރުމަނުގެ ގައުމީ ފުޓުބޯޅަ ޓީމާއި ބެލްޖިއަމް އަށް، ފީފާ ވޯލްޑް ކަޕުގެ ގްރޫޕް ސްޓޭޖާ ހަމައިން މުބާރާތް ނިންމާލަން ޖެހިއްޖެއެވެ. 

މިފަހަރުގެ މުބާރާތް ދަށް ނަތީޖާއަކާއެކު ޖަރުމަނުން ފެށިއިރު، އެޓީމުން ކުޅުނު ދެވަނަ މެޗުވީ އެއްވަރެވެ. އަދި ގްރޫޕް ސްޓޭޖުގައި އެޓީމުން ކުޅުނު ފަހު މެޗުގައި ކޮސްޓަ ރިކާ އަތުން މޮޅު ވެފައިވީ ނަމަވެސް، ރޭގައި ސްޕެއިން އާއި ޖަޕާން ބައްދަލު ކުރި މެޗުން ސްޕެއިންގެ މައްޗަށް ޖަޕާނުން ކުރި ހޯދުމުން، ޖަރުމަނަށް މިވަނީ ގުރޫޕު ސްޓޭޖުން މުބާރާތް ނިންމާލަންޖެހިފައެވެ.  

ޖަރުމަނުގެ އިތުރުން މިދިޔަ ވޯލްޑްކަޕް ގެ މުބާރާތުގައި ތިންވަނަ ހޯދި ބެލްޖިއަމް ޓީމުވެސް ވަނީ ގުރޫޕް ސްޓެޖުން ކަޓައި މުބާރާތާއި އަލާވަދާއު ކިޔަން ޖެހިފަ އެވެ. 

Advertisement

ވޯލްޑްކަޕް ގެ ޗެންޕިއަންކަންވެސް މީގެ ކުރިން ހޯދާފައިވާ ޖަރުމަނާއި، އަދި ފާއިތުވި ވޯލްޑްކަޕްގެ ތިންވަނައިގައި އޮތް ބެލްޖިއަމް ގުރޫޕް ސްޓޭޖުން ކަޓައިގެން ގޮސްފައިވާއިރު، މި ދެ ޓީމަކީވެސް މިފަހަރުގެ ވޯލްޑްކަޕުގައި އެއްޖިންސުން ގުޅުން ހިންގުން ޕްރޮމޯޓް ކުރަން ފައި ވިއްދާލާފައި ތިބި ދެ ޓީމުކަން ފާހަގަކޮށްލަންޖެހެއެވެ. 

އެގޮތުން، ދެ ޓީމު ހިމެނޭހެން، ހުޅަނގުގެ ބައެއް ޓީމުތަކުން އެންމެ ފުރަތަަމަ މަސައްކަތް ކުރީ، އެއްޖިންސުން ގުޅުން ހިންގުން ޕްރޮމޯޓް ކުރާ 'ވަން ލަވް' އާމް ބޭންޑު މުބާރާތުގެ މެޗުތައް ކުޅޭ އިރު އެޅުމަށެވެ. އެހެންނަމަވެސް، އެފަދައިން ކަން ކޮށްފިނަމަ ފިޔަވަޅު އަޅާނެ ކަމުގެ އިންޒާރު ފީފާއިން ދިނުމާއި އެކު ފުރަތަމަ މެޗު ފެށުމުގެ ކުރިން ޖަރުމަނު ޓީމުން އަނގަމަތީގައި އެޅީ އަތެވެ. އެފަދައިން އެ ޓީމުން ކަންކުރީ، އެމީހުން ބޭނުން ގޮތަށް އެއްޖިންސުން ގުޅުން ހިންގުން ޕްރޮމޯޓް ނުކުރެވުމުން އެނޫން ގޮތަކުންވެސް އެމީހުން އެކަމަށް ތާއީދު ކުރާކަން ދެއްކުމަށެވެ. 

މި ދެ ޓީމުގެ ކުޅުންތެރިންގެ އިތުރުން، ޖަރުމަނު ވިލާތުގެ ކުޅިވަރު ކަންކަމާއި ހަވާލުވެ ހުރި، އިންޓީރިއާ މިނިސްޓަރު ނޭންސީއާއި، ބެލްޖިއަމްގެ ދާޚިލީ ވަޒީރު ހަޑްޖާ ލަހްބީބު ވަނީ އެއްޖިންސުން ގުޅުން ހިންގުން ޕްރޮމޯޓް ކުރުން މަނާކޮށް ޤަޠަރުން ހަދާފައިވާ ގަވާއިދަށް ގޮން ޖެހުމަށް ފަހު، އެއްޖިންސުން ގުޅުން ހިންގުމަށް ތާއީދުކުރާ ބޭންޑު އަޅައިގެން ދަނޑަށް ވަދެފައެވެ. 

ޖަރުމަނުގެ އިންޓީރިއާ މިނިސްޓަރާއި ބެލްޖިއަމްގެ ޚާރިޖީ ވަޒީރު އެއްޖިންސުން ގުޅުން ހިންގުން ޕްރޮމޯޓް ކުރާ ބޭންޑް އަޅައިގެން މެޗް ބަލަން ސްޓޭޑިއަމްގައި 

އެއްޖިންސުން ގުޅުން ހިންގުން ޕްރޮމޯޓް ކުރުމަށް ޖަރުމަނުޓީމާއި ބެލްޖިއަމް ޓީމުން ކުރި މަސައްކަތަށް އެތައް ބައެއްގެ ފާޑުކިޔުންތައް އަމާޒުވި އިރު، އެ ދެ ގައުމުގެ މިނިސްޓަރުންގެ މި ޢަމަލާއި ގުޅިގެންވެސް ގިނަ ބައެއްގެ ނުރުހުން ދެ ގައުމަށް އަމާޒުވެގެން ދިޔައެވެ. 

އަދި، އުސޫލުތަކާއި، ގަވާއިދު ތަކަށް ބޯލެނބުމަށް އެންމެ ބާރަށް ގޮވަމުންދާ ހުޅަނގުގެ ގައުމުތަކުގެ ވެރިންނާއި، ޓީމުތަކުން، އެހެން ގައުމުތަކުން ހަދާފައިވާ ގަވާއިދުތަކާއި އުސޫލުތަކަށް ބޯ ނުލެނބުމުންވެސް އެނގިގެންދަނީ އެ ގައުމުތަކުގެ މުނާފިގުކަން ކަމުގައި ގިނަ ބަޔަކު އަންނަނީ ބުނަމުންނެވެ. 

އެއާއެކު އިއްޔެ ފެނިގެންދިޔަ ނަތީޖާތަކުން ޖަރުމަނާއި، ބެލްޖިއަމް މުބާރާތުން ކަޓައިގެން ދިޔަ ކަމީ ލިބިގެންދިޔަ ހިތްހަމަޖެހުމެއް ކަމަށާ، އެ ދެ ޓީމުންވެސް މިފަހަރު ވޯލްޑްކަޕު ކުޅެން އައީ އެހެން ކަމެއް ޕްރޮމޯޓް ކުރުމަށް ކަމަށް ފާޑުކިޔުންތެރިން އަންނަނީ ބުނަމުންނެވެ.