ފީފާ ވާރލްޑް ކަޕް ފުޓްބޯޅަ މުބާރާތުގައި އާޖެންޓީނާ އާއި އޮސްޓްރޭލިއާ މިރޭ ބައްދަލުކުރާ މެޗަކީ މޮޅުވާން މަޖުބޫރު މެޗަކަށް ވީ ނަމަވެސް ގާތްގާތުގައި މެޗުތަކެއް ކުޅެން ޖެހުމުން އޭގެ އަސަރު ޓީމަށް ކޮށްފައިވާ ކަމަށް އާޖެންޓީނާގެ ކޯޗު ލިއޮނަލް ސްކަލޯނީ ބުނެފިއެވެ. 

ރާއްޖެގަޑިން މިރޭ 00:00 ގައި އާޖެންޓީނާ އާއި އޮސްޓްރޭލިއާ ބައްދަލުކުރާ މެޗުގެ ކުރިން ބޭއްވި ނޫސްވެެރިންގެ ބައްދަލުވުމުގައި ސްކަލޯނީ ބުނީ މެޗަށް ތައްޔާރުވާން ލިބުނު ވަގުތު ކޮޅު މަދުވުމުން އެކަމާއި ކަންބޮޑުވުން ފާޅުކޮށްފައެވެ.

އެގޮތުން ގްރޫޕެއްގެ ދެވަނަ ޓީމެއްގެ ގޮތުގައި ގަދަ 16 ބުރުން ޖާގަ ހޯދި އޮސްޓްރޭލިއާއަށް ލިބުނު ވަގުތު އާޖެންޓީނާއަށް ވުރެ ތަންކޮޅެއް އިތުރުވި އިރު ގްރޫޕެއްގެ އެއްވަނަ ޓީމެއްގެ ގޮތުގައި އައި އާޖެންޓީނާއަށް ލިބުނު ވަގުތު ތަންކޮޅެއް މަދު ކަމަށެވެ.

Advertisement

މި ޝަކުވާތަކާ އެކުވެސް ސްކަލޯނީ ބުނީ އޭނާގެ ޓީމުން މަސައްކަތްކުރާނީ ކޮންމެ ފަދަ ހާލަތެއްގައި ވެސް ނަތީޖާ ނެރުމަށް ކަމަށްވެސް ބުންޏެވެ. އަދި މިފަހަރުގެ ވޯލްޑްކަޕް އުނދަގޫވާނެ ކަމަށްވެސް ބުންޏެވެ. 

އޮސްޓްރޭލިއާ އާއި ދެކޮޅަށް އާޖެންޓީނާ ކުޅޭ މި މެޗަކީ އާޖެންޓީނާގެ ކެޕްޓަން ލިއޮނެލް މެސީގެ ކެރިއަރުގައި ކުޅޭ 1000 ވަނަ މެޗެވެ. މިއީ އޭނާ އާޖެންޓީނާ ޤައުމީ ޓީމަށް ކުޅޭ 169 ވަނަ މެޗެވެ. އޭނާ ވަނީ ބާސެލޯނާގައި 778 މެޗު ކުޅެފައެވެ. އަދި މިހާރު ކުޅެމުން އަންނަ ޕީއެސްޖީއަށް 53 މެޗު ކުޅެދިނެވެ. 

ސްކަލޯނީ ބުނީ މިފަހަރުގެ ވޯލްޑްކަޕް ހުރިހާ ގޮތަކުންވެސް އާޖެންޓީނާއަށް އުނދަގޫ ކަމަށެވެ. ނަމަވެސް ކުޅުންތެރިންގެ ހިތްވަރު މެޗަކަށްފަހު މެޗަކުން ފެންނަ ކަމަށާއި އެ ތަފާތާއެކު ތަށި ކާމިޔާބުކުރަން ހުރިހާ ކުޅުންތެރިންވެސް ކެތްމަދުވެފައިވާ ކަމަށެވެ.