ވޯލްޑްކަޕް ފުޓުބޯޅަ މުބާރާތުގެ ގަދަ 16 ޓީމުގެ ބުރުގައި އޮސްޓްރޭލިއާ އަތުން މޮޅުވެ ކެޕްޓަން ލިއޮނަލް މެސީގެ ކެރިއަރުގެ 1000 ވަނަ މެޗުގައި އޭނާ ކާމިޔާބުކުރި ލަނޑާއެކު އާޖެންޓީނާ ކުއާޓާފައިނަލަށް ދަތުރުކޮށްފިއެވެ. 

ގަތަރުގެ އަހުމަދު ބިން އަލީ ސްޓޭޑިއަމްގައި ކުޅުނު މި މެޗު އާޖެންޓީނާ ކާމިޔާބުކޮށްފައިވަނީ 2-1 ގެ ނަތީޖާއަކުންނެވެ. މި މޮޅާއެކު ކުއާޓާފައިނަލުގައި އާޖެންޓީނާ ބައްދަލުކުރާނީ ނެދަލޭންޑްސް އާއެވެ. 

އާޖެންޓީނާ އިން ގިނަ ވަގުތު ބޯޅަ ހިފަހައްޓައިގެން ކުޅުނުއިރު އެޓީމުގެ ފުރަތަމަ ގޯލް މެޗުގެ 35 ވަނަ މިނެޓްގައި ކާމިޔާބުކޮށްދިނީ ލިއޮނަލް މެސީ އެވެ. މި ގޯލް މެސީ ކާމިޔާބުކުރީ އޮސްޓްރޭލިއާގެ ޕެނަލްޓީއޭރިއާގެ ތެރޭގައި ހުރެ ގޯލުގެ ކަނަށް ފޮނުވާލި ބޯޅައަކުން އޭނާ ކާމިޔާބުކުރި ލަނޑެކެވެ. 

މި ލަނޑާއެކު ވޯލްޑް ކަޕުގައި މެސީ ޖެހި ލަނޑުތަކުގެ އަދަދު ވަނީ 9 އަށް އަރާފައެވެ. އެއާއެކު އޭނާ ވެފައިވަނީ ވޯލްޑް ކަޕްގައި އާޖެންޓީނާއަށް ދެވަނަ އަށް އެންމެ ގިނަ ގޯލް ކާމިޔާބުކުރި ކުޅުންތެރިއާ އަށެވެ. އެއްވަނައަށް އެރުމަށް މެސީއަށް ދެން ބޭނުންވަނީ ދެ ގޯލެވެ. އެއްވަނައިގައި އުޅެނީ 10 ގޯލާއެކު ގެބްރިއަލް ބަޓިސްޓޫޓާ އެވެ. 

މެޗުގެ 57 ވަނަ މިނެޓްގައި އެޓީމުގެ ދެވަނަ ގޯލް ކާމިޔާބުކޮށްދިނީ ޖޫލިއަން އަލްވަރޭޒް އެވެ. މިއީ އޮސްޓްރޭލިއާގެ ކެޕްޓަން މެޓް ރަޔަން އަތުން ހެދުނު ގޯހެއްގެ ފައިދާ ނަގައިގެން އޭނާ ކާމިޔާބުކުރި ލަނޑެކެވެ. 

އާޖެންޓީނާ އިން މޮޅަށް ކުޅެމުން ދަނިކޮށް މެޗުގެ 77 ވަނަ މިނެޓްގައި ގޯލެއް ކާމިޔާބުކޮށް އޮސްޓްރޭލިއާ އަށް އުއްމީދެއް ލިބުނެވެ. މިއީ އާޖެންޓީނާގެ އެންޒޯ ފެނާންޑޭޒް ބޮލުގައި ޖެހިފައި ބައިކޮޅަށް ވަން ލަނޑެކެވެ. 

އާޖެންޓީނާ އާއި ނެދަލޭންޑްސް ބައްދަލުކުރާ މުބާރާތުގެ ކުއާޓާފައިނަލް މެޗު ކުޅުމަށް ހަމަޖެހިފައިވަނީ އަންނަަ ހުކުރު ދުވަހުގެ ރޭގަނޑު އެވެ.