ވަރަށް ގިނަ ކުޑަ ކުދިންނާއި ބޮޑެތި މީހުންގެ މެދުގައިވެސް މަގުބޫލުކަން ހޯދާފައިވާ އެނިމޭޓެޑް ކާޓޫން ފިލްމު އުފައްދާ ކުންފުންޏެއް ކަމަށްވާ ޑިޒްނީން އަނެއްކާވެސް އެއްޖިންސުން ގުޅުން ހިންގުން ޕްރޮމޯޓް ކުރާ ފިލްމެއް އުފައްދައިފިއެވެ.
އެއްޖިންސުން ގުޅުން ހިންގުމަކީ، ހައްގެއް ކަމަށް ވާކާލާތުކޮށް، ހަމަހަމަ ކަމަށް ގޮވާލާ ހުޅަނގުގެ ގައުމުތު ތަކުގެ އެ ގޮވެއްޔަށް ތަބައުވުމަށް ޑިޒްނީން ކުރަމުންދާ މަސައްކަތުގެ ތެރެއިން މީގެ ކުރިންވެސްވަނީ އެނިމޭޓެޑް ފިލްމު 'ލައިޓް އިޔަރ' ގައި އެފަދަ މަންޒަރެއް ހިމަނާފައެވެ. އެ ފިލްމުގައި ލޯބިން ގުޅިގެން އުޅޭ ދެ އަންހެނުން ހިމެނޭ އާއިލާއެއް ދައްކާފައިވާއިރު، އެ ކަމާއި ގުޅިގެން ވަރަށް ގިނަ މުސްލިމު ގައުމު ތަކުގައި އެ ފިލްމު ދެއްކުން މަނާވެސް ކުރެވިގެން ދިޔައެވެ.
އެއަށްފަހު، ނިމިދިޔަ ނޮވެމްބަރު މަހު ޑިޒްނީން ނެރުނު އެނިމޭޓެޑް ކާޓޫން ފިލްމު ކަމުގައިވާ "ސްޓްރޭންޖް ވޯލްޑް" ގައިވެސް މިވަނީ އެއްޖިންސުން ގުޅުން ހިންގުން ޕްރޮމޯޓް ކުރާ ކެރެކްޓަރ އެއް ހިމަނާފައެވެ.
އެގޮތުން، އެ ކާޓޫނުގައި ލީޑިން ރޯލުން ފެނިގެންދާ 16 އަހަރުގެ ފުރާވަރު ފިރިހެން ކުއްޖެއް ކަމަށްވާ އީތަން، ކާޓޫނުން ފެނިގެންދާ އެހެން ފިރިހެން ކުއްޖެއް ކަމުގައިވާ ޑިއާޒޯ އަށް ހިތް ކިޔައިގެން އުޅޭ މަންޒަރުތައް ކާޓޫނުން ފެނިގެންދެއެވެ. އެ މަންޒަރު ތަކުގެ ތެރޭގައި، ޑިއާޒޯ އީތަން އަށް ހަދިޔާ ގެންނަ މަންޒަރުތަކާއި، އޭނާ އައުމުން، އީތަންގެ ދެ ކޯ ރަތްވެ، އޭނާ ލަދުން އުޅޭ މަންޒަރު ހިމެނެއެވެ. އޭގެ އިތުރުން، އެ ދެ މީހުން އެކެއް އަނެކެއް ގަޔަށް ލޯ ބޮޑުކޮށްގެން ބަލައި، ޑިއާޒޯ ފެނުމުން ހިތް އަވަސް ވެގެން، ބިންމައްޗަށް ބަލައި ބިންމަތީގައި ހުންނަ ގާތަކާއި އީތަން ފައިން ކުޅޭ މަންޒަރު ވެސް ފެނިގެން ދެއެވެ.
ސްޓްރޭންޖް ވޯލްޑް ކާޓޫނު ފިލްމުގައި އެއްޖިންސުން ގުޅުން ހިންގުން ޕްރޮމޯޓް ކުރާ އީތަން ކެރެކްޓަރ އާއި ޑިއާޒޯ އެކުގައި ފެންނަ މަންޒަރެއް
އެފަދަ އެތައް މަންޒަރު ތަކެއް ފިލްމުން ދައްކައިދޭއިރު, އީތަންގެ ހިތުގައި ފިރިހެނަކާއި މެދު އުފެދިގެން އުޅޭ އިހްސާސް ތަކަކި ރަނގަޅު 'ނޯމަލް' ކަމެއް ކަމަށް ބުނެ އޭނާގެ މައިންބަފައިން އެކަމަށް ހިތްވަރުދޭ މަންޒަރު ވެސް މި ކާޓޫނުން ދައްކުވައިދެއެވެ.
ބޮޑު ޚަރަދު ކޮށްގެން ޑިޒްނީން ނެރުނު މި ކާޓޫނު ފިލްމަށް މާބޮޑު ތަރުހީބެއް ނުލިބި 100 ބިލިއަން ޑޮލަރުގެ ބޮޑު ގެއްލުމެއް ލިބޭނެ ކަމަށް ލަފާކުރެވިފައިވާއިރު، އޭގެ އެއް ސަބަބަކީ މުޖުތަމައު ގަބޫލު ނުކުރާ އެފަދަ މަންޒަރުތައް ހިމެނުން ކަމަށްވެސް ފާޑުކިޔުންތެރިން ބުނެފައިވެއެވެ.
މިފަދަ ކާޓޫނު ތަކުގެ އިތުރުން ވާހަކަތަކުގެވެސް ޒަރީޢާއިން އެއްޖިންސުން ގުޅުން ހިންގުމަކީ އާދައިގެ ކުޑަ، ކަމެއް ކަމަށް ދެއްކުމަށް ހުޅަނގުން ފަތުރަމުންދާ އެޖެންޑާ ތައް މުސްލިމު ކުދިންގެ ތެރެއަށްވެސް ވާސިލު ކުރަން މަސައްކަތް ކުރާއިރު އެކަންކަމާއިމެދު ހުރިހާ ބެލެނިވެރިންވެސް ސަމާލު ވުމަކީ މުހިންމުކަމެކެވެ.
Advertisement
This content is created and paid for by advertisers and does not involve Voice Journalists
