ދެކުނު ކޮރެއާ ޤައުމީ ޓީމަށް ކުޅެމުން އަނަންނަ ޗު ގީ ސޮން އަށް ކައިވެނީގެ ހުށައެޅުންތައް އަންނަވަރުން އޮބިނޯވެގެން އެންމެ ފަހުން ލޯބިވެރިއަކު ހުންނަކަން ހާމަކޮށްފިއެވެ. 

އުމުރުން 24 އަހަރުގެ ކުޅުންތެރިޔާ އާންމުންގެ މެދުގައި މަޤުބޫލުވީ ވޯލްޑްކަޕުގެ ތެރެއިންނެވެ. އެންމެ ފަހުން ކޮރެއާ ކުޅުނު މެޗަށްފަހު ގިނަ އަދަދެއްގެ އަންހެން ކުދިން އޭނާއަށް މެސެޖުކޮށް ގުޅާ ހަދާ ކަމަށް ރިޕޯޓުތައް ބުނެއެވެ. 

ދުނިޔޭގެ އެކި ކަންކޮޅުތަކުން އަންހެން ކުދިން އޭނާއަށް މެސެޖުކޮށް ގުޅާ ކައިވެންޏަށް އެދޭވަރު ބޮޑުވުމުން ޓީމުގެ އެހެން ކުޅުންތެރިންނަށް ވެސް އޭގެ އުނދަގޫ ކުރިމަތިވާ ކަމަށްވެއެވެ. އެންމެ ފަހުން ގޮތް ހުސްވެގެން ފޯނުވެސް ނިއްވާލަން ޖެހުނު ކަމަށް މީޑިއާ ރިޕޯޓުތައް ބުނެއެވެ. 

"މުޅިންވެސް އިވޭނީ ފޯނު ރިންގުވާ އަޑު ނޫނީ އޭނާގެ ފޯނަށް މެސެޖު އަންނަ އަޑު، ހަމަޔަށް ނިދެނީކީ ނޫން މިކަމަކާ ހުރެ" ކޮރެއާ މީޑިއާއަށް ވާހަކަދައްކަމުން ކުޅުންތެރިއަކު ބުންޏެވެ. 

ބައިނަލްއަގުވާމީ ނޫސްތަކުގެ ފަލަ ސުރުހީތަކަށް ވެސް ޗުގީ ގެ ވާހަކަތައް ދަނީ އަރަމުންނެވެ. މައުލޫމާތު ލިބިފައިވާ ގޮތުގައި ޗުގީގެ ލޯބިވެރިއަކީ އެހާ މަޝްހޫރު މީހެއް ނޫނެވެ. އަދި ވީހާވެސް އެކަން ސިއްރުކުރަން އޭނާ މަސައްކަތްކުރާ ކަމަށްވެސް ރިޕޯޓުތައް ބުނެއެވެ. ދެ މީހުން ރައްޓެހިވެގެން އުޅޭތާ ތިން އަހަރު ވެފައިވާ ކަމަށްވެއެވެ. 

ވޯލްޑްކަޕުގެ މެޗުތަކުން ލިބުނު ތަރުހީބު ބޮޑުކަމުން އިންސްޓަގްރާމުގައި 20،000 މީހުން ފޮލޯ ކުރަމުންދިޔަ ޗުގީގެ ފޮލޯވަރުންގެ އަދަދު ދެތިން ހަފްތާ ތެރޭގައި 1.6 މިލިއަނަށް އެރިއެވެ. އަދި ހުޅަނގުގެ މީޑިއާތަކުގައި ވެސް އޭނާ މަގުބޫލުކަން ހޯދިއެވެ.