މަތީ ތަޢުލީމާއި ތަމްރީނުގެ ސަނަދުތައް ޤަބޫލުކުރުމާ ގުޅޭ ގޮތުން މައްސަލައެއް ފެންމަތިވެފައިވަނިކޮށް، އެކަން އޮތްގޮތް ތަފްސީލުކޮށް މޯލްޑިވްސް ކޮލިފިކޭޝަން އޮތޯރިޓީ (އެމްކިޔުއޭ) އިން ބަޔާނެއް ނެރެފިއެވެ.
އެމްކިޔުއޭ އިން ނެރުނު ބަޔާނުގައި ބުނީ، ދިވެހިރާއްޖޭގައި މަތީ ތަޢުލީމާއި ތަމްރީނުގެ ސަނަދުތައް ޤަބޫލުކުރުމަކީ، ދިވެހިރާއްޖޭގެ މަތީ ތަޢުލީމާއި ތަމްރީނުގެ ޤާނޫނު ގެ 7 ވަނަ މާއްދާގެ (ބ) އާއި، އެ ޤާނޫނުގެ 19 ވަނަ މާއްދާގެ ދަށުން އެ އޮތޯރިޓީ އާ ޙަވާލުކުރެވިފައިވާ ޤާނޫނީ ޒިއްމާ އެއް ކަމަށެވެ.
އެހެންކަމުން، އެކި ފަރާތްތަކުން ޙާޞިލުކުރާ ސަނަދުތަކަކީ، އެ އޮތޯރިޓީން ޤަބޫލުކުރާ ސަނަދުތަކަކަށް ވާންޖެހޭ ކަމަށްވެސް އޭގައި ބުނެފައިވެއެވެ.
"އެގޮތުން، ރާއްޖެއިން ބޭރުން ޙާޞިލުކުރާ މަތީ ތަޢުލީމުގެ ސަނަދުތަކަކީ، މި އޮތޯރިޓީ އަށް ހުށަހަޅައިގެން މި އޮތޯރިޓީން ޤަބޫލުކޮށް، އެކަމަށް ޚާއްޞަ މި އޮތޯރިޓީގެ ތައްގަނޑު ޖަހައި، ވެލިޑޭޓްކޮށްފައިވާ ސަނަދުތަކަކަށް ވާންޖެހޭނެ އެވެ. އަދި ސަރުކާރުގެ އެކި އިދާރާތަކުން ވަޒީފާދިނުމުގައި ބަލައިގަންނަނީ މި ދެންނެވި ގޮތަށް މި އޮތޯރިޓީން ޤަބޫލުކޮށްފައިވާ ސަނަދުތައް ކަން ފާހަގަކުރަމެވެ." އެމްކިޔުއޭގެ ބަޔާނުގައި ވެއެވެ.
ކަން މިހެން ހުރި ނަމަވެސް، އެ ގޮތަށް އެމްކިޔުއޭ އިން ޤަބޫލުކުރާ ސަނަދެއްކަން ކަށަވަރުނުކޮށް ބައެއް ސަނަދުތަކުގެ މަޢުލޫމާތު އެކި ގޮތްގޮތަށް ހާމަކުރަމުންދާކަން އެ އޮތޯރިޓީއަށް ފާހަގަކުރެވިފައި ވާއިރު، މިފަދަ ސަނަދުތަކުގެ ތެރޭގައި އެ އޮތޯރިޓީން ޤަބޫލުނުކުރާ ކަމަށް ޢާއްމުކޮށް އިޢުލާންކޮށްފައިވާ ސަނަދުތަކާއި، ސަނަދުތައް ޤަބޫލުކުރުމުގެ އުޞޫލުތަކުގެ ދަށުން އެކި ސަބަބުތަކާ ހެދި އެ އޮތޮރިޓީ އަށް ޤަބޫލުނުކުރެވޭ ފަދަ ސަނަދުތައް ވެސް ހިމެނޭ ކަމަށް އެ ބަޔާނުގައި ފާހަގަކޮށްފައިވެއެވެ.
އެހެންކަމުން، މުއައްސަސާތަކުންނާއި، ސަނަދު ޙާޞިލުކުރައްވާ ފަރާތްތަކުން އެ ކަންކަމަށް ޚާއްޞަ ސަމާލުކަމެއް ދިނުމަށް އެމްކިޔުއޭ އިން ވަނީ އިލްތިމާސްކޮށްފައެވެ.
އެމްކިއުއޭ އިން މިގޮތަށް ބަޔާނެއް ނެރެފައި މި ވަނީ، ލަންކާގެ އެއިމްސް ކޮލެޖުން ހެދި ޕީއެޗްޑީ މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) ގަބޫލު ނުކޮށްގެން ސިވިލް ކޯޓަށް މައްސަލައެއް ހުށަހަޅާފައިވާ ދަނޑިވަޅެއްގައެވެ.
Advertisement
This content is created and paid for by advertisers and does not involve Voice Journalists
