ފީފާ ވޯލްޑް ކަޕްގައި ރޭ ޕެނަލްޓީ ޖަހައިގެން ގަދަފަދަ ސްޕެއިން ބަލިކޮށް މޮރޮކޯ އިން ވޯލްޑް ކަޕްގެ ކުއާޓާ ފައިނަލުން ފުރުސަތު ހޯދާފައިވާއިރު, ޕެނަލްޓީ ޖަހަން ފެށުމުގެ ކުރިން މޮރޮކޯ ޓީނުން ސޫރަތުލް ފާތިޙާ ކިޔެވި މަންޒަރު ފެންނަ ވީޑިއޯއަށް ގިނަ ބައެއްގެ ސަމާލުކަން ލިބިއްޖެއެވެ. 

ރޭ މޮރޮކޯއާއި ސްޕެއިން ބައްދަލު ކުރި މެޗު ނިމުނު އިރުވެސް އެއްވެސް ޓީމަކަށް ގޯލު ޖެހިފައި ނުވާއިރު އިތުރު ވަގުތު ކުޅެގެންވެސް އެކަން ވާގޮތް ވަނީ ނުވެފައެވެ. އެހެންކަމުން، ދެން މެޗުން މޮޅުވާ ޓީމެއް ކަނޑައެޅީ ޕެނަލްޓީ ޖަހައިގެންނެވެ. އެގޮތުން ޕެނަލްޓީ ޖަހައިގެން މޮރޮކޯއިން ސްޕެއިން ގެ މައްޗަށް ކުރި ހޯދީ 3-0 ގެ ނަތީޖާއިންނެވެ. އެއާއެކު މޮރޮކޯ ވެގެން ގޮސްފައިވަނީ ވޯލްޑްކަޕް ގައި ކުއާޓާ ފައިނަލުން ޖާގަ ހޯދި ފުރަތަަމަ މުސްލިމު ގައުމަށެވެ. 

ޕެނަލްޓީ ޖަހައިގެން މޮރޮކޯއިން ހޯދި ފަޚުރުވެރި ކާމިޔާބީގެ އިތުރުން، ގިނަ ބައެއްގެ ސަމާލުކަން ލިބިގެންދިޔައީ، ޕެނަލްޓީ ޖަހަން ފެށުމުގެ ކުރިން އެ ޓީމުގެ ކުޅުންތެރިން ވަށްބުރެއް ހަދައިގެން އެންމެން ހަރު އަޑުން ސޫރަތުލް ފާތިޙާ ކިޔަވާ މަންޒަރު ފެންނަ ވީޑިއޯ އަށެވެ.

މޮރޮކޯ ޓީމުގެ މި ޢަމަލަށް ގިނަބައެއް ތަޢުރީފް ކުރަމުންދާއިރު، އެޓީމުގެ ފަރާތުން މުބާރާތުގައި މިނޫންވެސް އުފާވާ ގިނަ މަންޒަރުތަކެއް މީގެ ކުރިންގެ މެޗުތަކުން ވެސް ވަނީ ފެނިފައެވެ. އެގޮތުން ރޭގެ މެޗަށް ފަހުގައިވެސް އެ ޓީމުން ލިބުނު ކާމީޔާބީއަށް ޝުކުރު ކުރުމުގެ ގޮތުން ދަނޑުމަތީގައި ޝުކުރުގެ ސަޖިދަ ވަނީ ޖަހާފައެވެ.