ސަރުކަާރުން އަޅަން ފަށާފައިވާ ތިލަމާލެ ބްރިޖު ހަދަން ބޭނުން ކުރާ ޕްލެޓްފޯމް އޮންނަނީ ދެދުވަހުން އެއްދުވަހު ގޮނޑުދޮށަށް ލައްގާފައި ކަމަށް ބުނެ އިދިކޮޅު ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ފާޑު ވިދާޅުވެއްޖެއެވެ.
ސަންގު ޓީވީގެ “ހަބަރަށްފަހު” ޕްރޮގްރާމުގައި ވާހަކަދައްކަވަމުން ޝިޔާމް ވިދާޅުވީ، ދިވެހި ވިޔަފާރި ވެރިން ސަރުކާރަށް ކުރަމުންދިޔަ އިތުބާރު މިހާރު ގެއްލިފައިވާ ކަމަށެވެ. އެހެންކަމުން، ސަރުކާރުގެ ޓީ ބިލްވެސް ގަންނާނެ ބަޔަކު ނުވާކަމަށާ، އޭގެ ސަބަބުން ސަރުކާރު މިހާރު އޮތީ ފައިސާ ހޯދުމަށްޓަކައި ކޮންމެ ކަމެއްވެސް ކުރާހާ "ޑެސްޕަރޭޓް" ވެފައިކަމަށްވެސް އޭނާ ވިދާޅުވިއެވެ.
އަދި އައިއެމްއެފް އާއި ވޯލްޑް ބޭންކުން ދޭ އިރުޝާދުތަކަށް ސަރުކާރުން ބޯ ނުލަނބައި ޚަރަދުތައް ކުޑަ ކުރުމުގެ މަސައްކަތް ނުކުރާތީ އެ ތަންތަނާއި ގުޅުންހުރި އެއްވެސް ބޭންކަކުން ސަރުކާރަށް އެހީ ނުވާނެ ކަމަށްވެސް އޭނާ ވިދާޅުވިއެވެ.
"އެހެންނަމަވެސް އެސްބީއައި އިން އެ އޮތީ މި ސަރުކަާރު ނަގަހައްޓަން ކޮންމެ ކަމެއްވެސް ކޮށްދޭ ގޮތަށް. އެއީ އެމީހުން މިވަރު އެއްޗެއް ދީފިއްޔާ، އެމީހުން ދަމާލާ މިންވަރު އަޅުގަނޑުމެންނަށް އެބަފެނޭ. އެއް އިންޗި ދީފިއްޔާމުން އެމީހުން ފަސް އިންޗި އެބަ ދަމާލާ. އެހެން އެއްވެސް މާލީ އެޖެންސީ އެއް މި ސަރުކާރަކަށް މިހާރު ލޯނެއް ދޭ ގޮތަކަށް ނޫން އޮތީކީ." ޝިޔާމް ވިދާޅުވިއެވެ.
މިއާއެކު ޝިޔާމް ވަނީ، އަދުގެ ސަރުކާރަކީ ކުރީގެ ރައީސް ޔާމީން އަބްދުލްގައްޔޫމް އަބަދު އެއް ގައުމަކުން ލޯނު ނަގާކަމަށް ބުނެ ފާޑުކިޔައި ހެދި ބައެއް ކަމަށާ، ނަމަވެސް އެމަނިކުފާނު އެ ލޯނުތައް ނަންގަވައިގެން ކުރެއްވި ކަންކަން ފެންނަން ހުރި ކަމަށް ވިދާޅުވެފައެވެ. އަދި އޭރުވެސް ފެންނަމުން ދިޔައީ އެމަނިކުފާނު ކުރެއްވި މަސައްކަތްތައް ކަމަށާ، އަދި މިހާރުވެސް އެ ނޫން މަސައްކަތެއް ނުފެންނަ ކަމަށް ޝިޔާމް ވިދާޅުވިއެވެ.
"700 މިލިއަން ގާތްގަނޑަކަށް ޑޮލަރު ހޭދަކޮށްގެން މިތާ ވިލިމާލެއާއި މާލެއާއި ދޭތެރޭގައި މި އަޅާ ބުރިޖު، ދެ ދުވަހުން އެއް ދުވަހު އެ އޮންނަނީ ގޮނޑުދޮށަށް ލައްގާފައި. ދެދުވަހުން އެ އޮންނަނީ އޭގެ ޕްލެޓްފޯމު ގޮނޑުދޮށަށް ލައްގާފައި. މިއީ މީހުން ބްރިޖު އަޅަން އުޅޭ ގޮތްތަ؟"
ޝިޔާމް ވިދާޅުވީ ރައީސް ޔާމީން އެޅުއްވި ސިނަމާލެ ބްރިޖަކީ އަޅާނެ އެއްޗެއްކަން ރައްޔިތުންނަށް ޔަގީން ކޮށްދިނުމުގެ ގޮތުން، ބްރިޖު ބަލަން ޕްލެޓްފޯމު އެއްވެއް އެމަނިކުފާނު ހެއްދެވި ކަމަށެވެ.
"އެހާ ޔަގީން ކަމާއި އެކުގައޭ ބްރިޖު އެޅުއްވީ. އެކަމު މިއަދު ކީއްތޯ މިވަނީ؟ ދެދުވަހުން އެއްދުވަހު އަޅުގަނޑުމެން ޚަބަރު ބަލާލާއިރު ނި އޮންނަނީ އޭގެ ތަނބެއް ވެއްޓިގެން، ނޫނީ ބްރިޖެ އެޅުމަށްޓަކައި އެމީހުން ގެންގުޅޭ ޕްލެޓްފޯމު، ގޮނޑުދޮށަށް ލައްގައިގެން، ނޫނީ ފަރުމައްޗަށް ލައްގައިގެން ފަރުހަލާކުވެގެން އުޅޭ ވާހަކައެއް ނޫންތޯ؟"
އެއާއެކު ޝިޔާމް އިތުރަށް ވިދާޅުވީ ރައްޔިތުންގެ ފައިސާއިން ލޯނު ނަގައިގެން ބްރިޖުގެ މަސައްކަތް ހަވާލުކޮށްފައި މިވަނީ އޭގެ ޓެކްނިކަލް މަސައްކަތް އެނގޭ ބަޔަކާއިކަމާއި މެދުވެސް މިހާރު ޝައްކު އުފެދޭ ކަމަށް އެނާ ވިދާޅުވިއެވެ.
"700 މިލިއަން ޑޮލަރު ނަގައިފި. އެ ފައިސާ ހަރަދުކޮށްގެން އެ ހަދާ އެއްޗެއް ފެނުން މައްޗަށް އަރާތަނެއް ނުވެއް ފެނޭ." ބްރިޖު ހަދަމުންދާގޮތަށް ފާޑުވިދާޅުވެ ޝިޔާމް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
