އަންނަ ހަފްތާގައި ރައީސުލްޖުމްހުރިއްޔާ އިބްރާހީމް މުހައްމަދު ޞާލިހު ގދ.ފަރެސްމާތޮޑާ އަށް ވަޑައިގަންނަވާނެ ކަމަށާއި، އެ ދަތުރުފުޅަށްފަހު ޤަތަރަށް ވެސް ވަޑައިގެންނެވުމަށް ހަމަޖެހިފައިވާ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.

މިއަދު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިއުވާން ވިދާޅުވީ، އަންނަ ހަފާތްގެ އާދިއްތަ ދުވަހު މަސްވެރިންގެ ރަސްމީ ޖަލްސާގައި ބައިވެރިވެވަޑައިގަތުމަށް ރައީސް ޞާލިހު ފަރެސްމާތޮޑާ އަށް ވަޑައިގަންނަވާނެ ކަމަށެވެ. 

އަދި އެ ޖަލްސާގެ އިތުރުން ވެސް މަސްވެރިންގެ ދުވަހާއި ގުޅިގެން އެ ރަށުގައި ބޭއްވުމަށް ހަމަޖެހިފައިވާ ހަރަކާތްތަކުގައި އެމަނިކުފާނު ބައިވެރިވެވަޑައިގަންނަވާނެ ކަމަށް މިއުވާން ވިދާޅުވިއެވެ. 

ފަރެސްމާތޮޑާގެ ދަތުރުފުޅަށްފަހު، ހޯމަ ދުވަހު ރައީސް މާލެ ވަޑައިގަންނަވާނެ ކަމަށާ، އެއަށްފަހު އެ ދުވަހު، ޤަތަރުގެ އަމީރު ތަމީމް ބިން ހަމަދު އަލް ތާނީގެ ދައުވަތަކަށް ޤަތަރަށް ކުރައްވާ ދަތުރު ފުޅެއްގައި އެގައުމަށް އެމަނިކުފާނު ވަޑައިގަންނަވާނެ ކަމަށް މިއުވާން ވިދާޅުވިއެވެ. 

ރައީސް ގެ ޤަތަރުގެ މި ދަތުރުފުޅުގައި، އެގައުމުގައި މިހާރު ކުރިއަށްދާ ވޯލްޑްކަޕް ގެ ސެމީފައިނަލްގެ މެޗެއް ބައްލަވައިލައްވާނެ ކަމަށާއި، އަދު ރައީސް ގެ މި ދަތުރުފުޅާއި އެކު، ރާއްޖެ އާއި ގަތަރާއި ދެމެދުގައި އޮންނަ ގުޅުން އިތުރަށް ބަދަހިވެގެންދާނެ ކަމަށްވެސް މިއުވާން ވިދާޅުވިއެވެ. 

ރައީސް ޞާލިހުގެ ގަތަރުގެ ދަތުރުފުޅާއި ގުޅިގެން ގިނަ ބައެއްގެ ފާޑުކިޔުންތައް އެމަނިކުފާނަށް އަމާޒުވެފައި ވަނިކޮށް، އެމަނިކުފާނު ގަތަރަށް ވަޑައިގަތުމަށް ހަމަޖެހިފައިވަނީ، އަމިއްލަ ހަރަދުފުޅުގައި ޓިކެޓު ނަންގަވައިގެން ކަމަށް، މިއުވާން ވަނީ ވިދާޅުވެފައެވެ. އަދި އެ ދަތުރުގެ ހުރުމާއި ފަރިއްކޮޅު ހަމަޖައްސަވަނީ، ގަތަރު ސަރުކާރުން ކަމަށްވެސް އޭނާ ވިދާޅުވިއެވެ.