ޕޯޗުގަލްގެ ހުނަރުވެރި ކުޅުންތެރިޔާ ކްރިސްޓިއާނޯ ރޮނާލްޑޯ، ވޯލްޑްކަޕުގެ ކުރިއަށް ހުރި މެޗުތައް ނުކުޅެ ދާން އުޅޭ ކަމަށް ފަތުރާ ވާހަކަތަކަަށް އޭނާ ރައްދު ދީފިއެވެ. 

ފީފާ ވޯލްޑް ކަޕްގެ ދެވަނަ ބުރުގައި، 1-6 އިން ސްވިޒަލެންޑް ބަލިކޮށް ޕޯޗުގަލް ކުއާޓާ ފައިނަލުން ޖާގަ ހޯދި މެޗުގައި ރޮނާލްޑޯ ބެންޗުގައި އިންއިރު، އޭނާގެ ބަދަލުގައި، ފުރަތަަމަ އެގާރައިން ޖާގަ ހޯދީ 21 އަހަރުގެ ފޯވާޑް، ގޮންޒާލޯ ރާމޯސް އެވެ. މެޗުގެ ފުރަތަަމަ 11 ގައި ރޮނަލްޑޯ ނުހިމަނަން ކޯޗު ނިންމާފައިވަނީ އެދެމީހުންގެ ދެމެދުގައި މައްސަލަ ތަކެއް ޖެހިގެން ކަމަށް މީޑިއާ ރިޕޯޓްތައް ބުނި ނަމަވެސް، އެ މައްސަލަ ހައްލުކޮށްފައިވާ ކަން ކޯޗު ވަނީ ނޫސްވެރިންނަށް ކަށަވަރުކޮށްދީފައެވެ. 

ރޮނާލްޑޯ ފުރަތަަމަ 11 ގައި ނުހިމަނައި ސްވިޒަލޭންޑް އާއި ދެކޮޅަށް ޕޯޗުގަލް ކުޅުނު އެ މެޗުގައި އޭނާގެ ބަދަލުގައި ކުޅެން އެރި، ރާމޯސް ވަނީ ހެޓްރިކްއެއްވެސް ހަދާފައެވެ. އެއާއެކު، ކުރިއަށް އޮތް މެޗުތަކުގައިވެސް، ރާމޯސް ދޫކޮށް ރޮނާލްޑޯ އަށް އެ ޖާގަ ދިނުމަކީ އެޓީމުގެ ކޯޗު ފެނާންޑޯ ސަންޓޯސް އަށް މިހާރު ދަތިކަމަކަށް ވެފައިވާ ކަމަށް ބައެއް ނޫސްތަކުންވަނީ ރިޕޯޓް ކޮށްފައެވެ. 

 އަދި އެފަދަ ކަންކަމާއި، ރޮނާލްޑޯ އާއި ކޯޗާއި ދެމެދު އުފެދިފައިވާ ދެކޮޅުވެރިކަމުގެ ސަބަބުން، ވޯލްޑްކަޕްގެ ކުރިއަށް ހުރި މެޗުތައް ނުކުޅެ އޭނާ ދާން އުޅޭ ކަމަށްވެސް މީޑިއާގައި ވަނީ ޚަބަރުތައް ފެތުރެން ފަށާފައެވެ. އަދި އޭނާ ހުއްޓުވާފައިވަނީ ވަރަށް މަސައްކަތުން ކަމަށްވެސް އެ ޚަބާރުތަކުގައި ބުނެފައިވެއެވެ. 

ރޮނާލްޑޯ އާއި ގުޅިގެން ފެތުރުނު އެ ވާހަކަތަކަކީ ހަގީގަތާއި ޚިލާފު ވާހަކަތަކެއް ކަމަށް ޕޯޗުގަލް ގެ ފުޓުބޯޅަ ފެޑެރޭޝަން އިން ބުނެފައިވާއިރު، އެވާހަކަތަކަށް ރޮނާލްޑޯ ވެސް ވަނީ ރައްދު ދީފައެވެ. 

"ބޭރުގެ އެއްވެސް ބާރަކުން މި ގުރޫޕް ވަކިކޮށްލެވޭ ވަރަށްވުރެ މާ ބޮޑަށް ގުޅިލާމެހިފައިވާ ގުރޫޕެއް މިއީ. މި ގައުމަކީ ދުޝްމަނުންނަށް ބިރުގަންނަވަރަށް ވުރެ މާ ކެރޭ، ސާބިތު ގައުމެއް. މިއީ ހުވަފެންތައް ހަގީގަތަކަށް ހެދުމަށް އެންމެ ފަހުވަގުތާއި ޖެހެންދެންވެސް މަސައްކަތް ކުރާނެ ތެދުވެރި ޓީމެއް." ރޮނާލްޑޯ ބުނެފައިވެއެވެ. 

މިއާއެކު ރޮނާލްޑޯ އެ ޓީމަށް ކުރާ އިތުބާރު ދެމެހެއްޓުމަށް ވެސް ސަޕޯޓަރުންގެ ކިބައިން އެދިފައެވެ.