ނުކުޅެދުންތެރިކަން ހުންނަ ފަރާތްތަކުގެ ބައިނަލްއަގްވާމީ ދުވަސް ފާހަކުރުމަށްޓަކައި އެޑްވޮކޭޓިންގް ދަ ރައިޓްސް އޮފް ޗިލްރަން (އާކް) އާއި ބިއުޓިފުލް އައިސް ޑައުން ސިންޑްރޯމް އެސޯސިއޭޝަން ގުޅިގެން ބ. އަތޮޅުގައި ސްޕީޗް އެންޑް ހިއަރިން ކޭމްޕެއް ކުރިޔަށް ގެންގޮސްފި އެވެ.
ހަތަރު ދުވަހަށް ކުރިއަށް ގެންދިޔަ މި ކޭމްޕްގައި ބ. އަތޮޅު އޭދަފުށި، ކުޑަރިކިލު، ކަމަދޫ، ހިތާދޫ، ތުޅާދޫ، ފުޅަދޫ، ގޮއިދޫ، ކިހާދޫ، ދޮންފަނު އަދި ދަރަވަންދޫއިން އަޑުއިވުމާއި ވާހަކަދެއްކުމުގެ ދަތިތައް ހުންނަ 65 އަށްވުރެ ގިނަ ކުޑަކުދިންނަށް ރާއްޖެއިން ބޭރުގެ ސްޕީޗް ތެރަޕިސްޓެއް މެދުވެރިކޮށް ކޮންސަލްޓޭޝަން، ޑައިގްނޯސިސް، އިންޑިވިޖުއަލް އެސެސްމަންޓް އަދި އޯޑިއޯމެޓްރިކް ޓެސްޓް ހިލޭ ހަދާދީފައިވެ އެވެ.
އޭގެ އިތުރުން، ނުކުޅެދުންތެރިކަން ހުންނަ ކުދިންނާއެކު މަސައްކަތްކުރާ ޓީޗަރުންނަށް އަމާޒުކޮށްގެން ކްލާސް ރޫމްގައި ބޭނުންކުރެވޭނެ ފަސޭހަ އިންޓަވެންޝަންތައް އަދި ކުޑަކުދިން ވާހަކަދެއްކުމުގައި ހުންނަ ދަތިތައް ފާހަގަކޮށް އެކަންކަމަށް ހައްލު ހޯދާދިނުމަށް ކުރެވޭނެ ކަންކަމުގެ މުހިންމު މައުލޫމާތު ހިއްސާކޮށްފައިވެ އެވެ.
އެގޮތުން، ކެންދޫ ސްކޫލް، ތުޅާދޫ ސްކޫލް، ކަމަދޫ ސްކޫލް، ބ. އަތޮޅު މަދަރުސާ، ފުޅަދޫ ސްކޫލް، ދޮންފަނު ސްކޫލް، ހިތާދޫ ސްކޫލް، މާޅޮހު ސްކޫލް، ގޮއިދޫ ސްކޫލް، ފެހެންދޫ ސްކޫލް، ކިހާދޫ ސްކޫލް އަދި ކުޑަރިކިލު ސްކޫލްގައި ފައުންޑޭޝަން ސްޓެޖަށް ކިޔަވައިދޭ ޓީޗަރުންނާއި އަދި ސެން، 30 އަށްވުރެ ގިނަ ޓީޗަރުން އޭދަފުށީގައި ބޭއްވި ދެ ދުވަހުގެ އެ ވޯކްޝޮޕްގައި ބައިވެރިވި އެވެ.
މިފަދަ ވޯކްޝޮޕެއް ކާމިޔާބު ކަމާއިއެކު ކުރިއަށް ގެންދިޔުމަށް ބ. އަތޮޅު ކައުންސިލާއި، ހޯސްޕިޓަލާއި އެނޫންވެސް ފަރާތްތަކުން ވެދިން އެހީއަށް އާކުން ވަނީ ޝުކުރު އަދާކޮށްފައެވެ. އަދި ނުކުޅެދުންތެރިކަން ހުންނަ ކުޑަކުދިންނަށްވެސް އެހެން ކުދިންނެކޭ އެއްފަދައިން ހަމަހަމަ ފުރުސަތުތަކެއް ލިބިދީ، އެކުދިންގެ ހައްގުތައް ކަށަވަރުކޮށް އަބުރުވެރި މުސްތަގުބަލެއް ހޯދައިދިނުމަށް މަސައްކަތްކުރާނެކަމުގެ ޔަގީންކަން އާކުން ދެއެވެ.
Advertisement
This content is created and paid for by advertisers and does not involve Voice Journalists
