ކުރިއަށް އޮތް ރިޔާސީ އިންތިހާބު ކާމިޔާބު ކޮށް، ދެވަނަ ދައުރަކަށް އިންތިޚާބުވެވަޑައިގެންނެވުމަށްވުރެ ރައީސުލްޖުމްހުރިއްޔާ އިބްރާހީމް މުހައްމަދު ޞާލިހަށް މުހިންމީ ގައުމު ބަނގުރޫޓު ވުމުން ސަލާމަތް ކުރެއްވުން ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވެއްޖެއެވެ. 

ރޮޒައިނާ މިފަދައިން ވިދާޅުވީ ވޯލްޑް ބޭންކުގެ ދެކުނު އޭޝިއާ ސަރަޙައްދަށް ކަނޑައަޅުއްވާފައި ހުންނަވާ ނައިބު ރައީސް، މާޓިން ރައިސަރ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ އަރިހަށް ކުރެއްވި ޒިޔާރަތުގައި އިޤްތިޞާދީ ކަންކަން ބެލެހެއްޓުމަށް ދިވެހި ސަރުކާރުން ނިންމެވީ އުނދަގޫ އެހެންނަމަވެސް ރަނގަޅު ނިންމެވުންތަކެއްކަން ފާހަގަކުރައްވައި އެކަންކަމަށް ތަޢުރީފުކުރެއްވުމާއި ގުޅިގެންނެވެ. 

އެގޮތުން ރޮޒައިނާ ވިދާޅުވީ، ދެވަނަ ދައުރަކަށް ކުރިމަތި ލައްވާނެ ކަމަށް ވިދާޅުވެފައިވާ ރައިސަކަށް ކުރައްވަން އެންމެ އުނދަގޫ އެއްކަމަކަށް ވާނީ ޓެކްސް ބޮޑުކުރެއްވުން ކަމަށެވެ. 

Advertisement

އެހެންނަމަވެސް، ވެރިކަން ހޯދުމަށްވުރެން ގައުމު ބަނގުރޫޓުނުވެ އޮތުން މުހިއްމު ކަމަށް ދެކި ރައީސް ޞާލިހު އެޅުއްވި ފިޔަވަޅުތަކަށް ދުނިޔެވެސް ތައުރީފް ކުރާ ކަމަށް އޭނާ ވިދާޅުވިއެވެ. 

ތަކެތީގެ އަގުތައް އިންތިހާއަށް އުފެލެމުންދާއިރު، އަންނަ ޖަނަވަރީ މަހުން ފެށިގެން ޖީއެސްޓީ އަދި ޓީޖީއެސްޓީ ބޮޑުކުރަން ސަރުކާރުން ވަނީ  ނިންމާފައެވެ. 

ސަރުކާރުން މިފަދަ ނިންމުމެއް ނިންމީ ދައުލަތުގެ އާމްދަނީ އިތުރު ކުރަން ކަމަށް ބުނެފައިވާއިރު، ސަރުކާރުން އުފައްދަމުންދާ ސިޔާސީ މަގާމު ތަކާއި، ސަރުކާރުގެ ވެރިން ބޭރަށް ކުރާ ދަތުރުތައް މަދުކޮށް، ސަރުކާރު ތެރެއިން ހިންގާ ކޮރަޕްޝަން ހުއްޓުވައިފިނަމަ، ޓެކްސް ބޮޑު ނުކޮށް ވެސް އާމްދަނީ އިތުރު ކުރެވޭނެ ކަމަށް އެމްޑީީޕީގެ ބައެއް މެންބަރުން ވެސް އަންނަނީ ބުނަމުންނެވެ.