ފީފާ ވޯލްޑް ކަޕްގެ ކުއާޓާ ފައިނަލުގެ ދެވަނަ މެޗުގައި މުބާރާތުގެ އެއް ފޭވަރިޓުން ކަމަށްވާ އާޖެންޓީނާއާ ދެކޮޅަށް ނެދަލެންޑްސް މިރޭ ނުކުންނައިރު، އާޖެންޓީނާ ހުނަވެރި ކެޕްޓަން، ލަޔޮނަލް މެސީ ހުއްޓުވަން ރޭވުންތަކެއް ރާވާފައިވާކަން ހާމަކޮށްފިއެވެ.  

މިރޭގެ މެޗަށް ނެދަލޭންޑު ނުކުންނައިރު، ގިނަ މީހުންގެ ސުވާލަކަށް ވެފައިވަނީ، ނެދަލޭންޑު ގެ ޑިފެންސުން މެސީ ހުއްޓުވަން ކުރާނެ މަސައްކަތަކާއި ގުޅޭގޮތުންނެވެ. އަދި އެފަދަ ރޭވުމެއް މިހާރުވެސް ނެދަލޭންޑުގެ ޓީމުން ރާވާފައިވާކަން އެ ޓީމުގެ ކޯޗް ލުއިސް ވެންހާލް ފޮރުވަންވެސް މަސައްކަތެއް ނުކުރިއެވެ. އެހެންނަމަވެސް، އެއި ރޭވުން ނުވަތަ ޕްލޭން އަކީ ކޮބައިކަން އޭނާ ހާމައެއް ނުކުރެއެވެ. 

"އަހަރެން ކަލޭމެންނަށް އެއްވެސް ޕްލޭންއެއް ހާމައެއް ނުކުރާނަން. އަހަރެމެން އެކަހަލަ ކަމެއް ކުރުމަކީވެސް ވަރަށް މޮޔަ ކަމަކަށްވާނެ. އެހެންނަމަވެސް، މެސީ ހުއްޓުވާނީ ކިހިނެއްތޯ ކުރެވޭ ސުވާލުގެ ޖަވާބެއް ހޯދުމަކީ އެހާ އުނދަގޫ ކަމެއްވެސް ނޫން. ޕާސިން ލައިން، ބްލޮކް ކޮށްލައި ބަންދު ކޮށްލުން ވެދާނެ ބޭނުންތެރި ކަމަކަށް" މެސީ ހުއްޓުވާނެ ގޮތާއި ގުޅޭގޮތުން ނޫސްވެރިއެއް ކުރި ސުވާލަށް ޖަވާބު ދެމުން ވެންހާލް ބުންޏެވެ. 

ނެދަލޭންޑު ގެ ކޯޗު ލުއިސް ވެންހާލް 

މިރޭގެ މެޗާއި ގުޅިގެން ވާހަކަ ދައްކަމުން އާޖެންޓީނާގެ ކޯޗުވަނީ، އިދިކޮޅު ޓީމުތަކުން އަބަދުވެސް މެސީ ހުއްޓުވަން އެކި ރޭވުންތައް ރާވަމުން ދާކަމަށް ބުނެފައެވެ. އަދި އެއީ އައު ކަމެއް ނޫން ކަމަށާ، އެމީހުންގެ ރޭވުންތައް ފެއިލްކޮށް، ބަލިކޮށްލުމަށް ތަފާތު ކަމެއް އެޓީމަށްވެސް ކުރެވިދާނެކަމަށް އޭނާ ބުންޏެވެ. އަދި މީގެ އިތުރުން، އިދިކޮޅު ޓީމުގެ ޓާގެޓަކީ މެސީ ކަމުގައި ވާނަމަ އެކަންވެސް ސިކުނޑީގައި ބައިންދާނެ ކަމަށް އޭނާ ބުންޏެވެ. 

ވޯލްޑް ކަޕްގެ ކުއާޓާ ފައިނަލަށް ނެދަލެންޑްސް ދަތުރުކުރީ ދެވަނަ ބުރުގައި އެމެރިކާގެ މައްޗަށް ކުރި ހޯދައިގެންނެވެ. މި ދެޓީމު ވެސް ވަނީ ގްރޫޕް ސްޓޭޖުގެ އެއްވަނަ ހޯދާފަ އެވެ. ނެދަލެންޑްސް މިހާތަނަށް ބަލިވެފައި ނުވާއިރު އާޖެންޓީނާ ވަނީ ވޯލްޑް ކަޕްގެ ފުރަތަމަ މެޗުގައި ސައުދީ އަރަބިއާ އަތުން ބަލިވެފަ އެވެ. ލުސައިލް ސްޓޭޑިއަމްގައި ނެދަލެންޑްސް އާއި އާޖެންޓީނާ ވާދަކުރާ މެޗު ފަށާނީ މިރޭ މެންދަމު 12 ޖަހާއިރު އެވެ.