ފީފާ ވޯލްޑްކަޕުގެ ކުއާޓާފައިނަލުގެ ފުރަތަމަ މެޗުގައި ޕެނަލްޓީން ކުރިހޯދާ ފަސް ތަރީގެ ބްރެޒިލް ބަލިކޮށް މުބާރާތުގެ ސެމީފައިނަލަށް ކްރޮއޭޝިއާ ދަތުރުކޮށްފިއެވެ.
މެޗު ކްރޮއޭޝިއާ ކާމިޔާބުކުރީ މެޗުގެ ފުރިހަމަ ވަގުތު ހަމަވިއިރު 1-1 އިން ދެ ޓީމު އޮތުމާއެކު އިތުރު ވަގުތުގެ ދެ ހާފުގައި ވެސް ނަތީޖާ ނުނެރެވުމުން ޕެނަލްޓީގައި 4-2 ގެ ނަތީޖާއަކުން ކުރިހޯދައިގެންނެވެ.
ޕެނަލްޓީ ޝޫޓްއައުޓްގައި ކްރޮއޭޝިއާ އިން ޖެހި ހުރިހާ ޕެނަލްޓީއެއް ވަނީ ކާމިޔާބުކޮށްފައެވެ. ބްރެޒިލުން ޖެހި ދެ ޕެނަލްޓީ ވަނީ ނާކާމިޔާބުވެފަ އެވެ.
މިއީ ވޯލްޑްކަޕުގެ ކުއާޓާފައިނަލާ ހިސާބުން ބްރެޒިލް މުބާރާތުން ޖެހިޖެހިގެން އަލްވަދާއު ކިޔަން ޖެހުނު ދެވަނަ ފަހަރެވެ. އަދި މިއީ މުބާރާތުގެ ސެމީފައިނަލަށް ކްރޮއޭޝިއާ ޖެހިޖެހިގެން ދަތުރުކުރި ދެވަނަ ފަހަރެވެ.
ސެމީގައި ކްރޮއޭޝިއާ ބައްދަލުކުރާނީ އާޖެންޓީނާ އާއި ނެދަލޭންޑްސް ބައްދަލުކުރާ މެޗުން މޮޅުވާ ޓީމަކާ އެވެ.
ބްރެޒިލްގެ އެޑިއުކޭޝަން ސިޓީ ސްޓޭޑިއަމްގައި ކުޅުނު މި މެޗުގައި ކްރޮއޭޝިއާ އިން ވަނީ ކައުންޓަ އެޓޭކުތަކުގައި ރަނގަޅު ހަމަލާތަކެއް އުފައްދާފައެވެ. އަދި ވަކިން ހާއްސަކޮށް ބްރެޒިލްއަށް ލިބުނު ފުރުސަތުތައް ވެސް ފާހަގަކޮށްލެވެއެވެ.
ބްރެޒިލް އިން ފުރަތަމަ ލަނޑު ޖެހީ 90 މިނެޓު ހަމަވެގެން ކުޅުނު އިތުރުވަގުތުގެ ދެ ހާފުގެ ތެރެއިން ފުރަތަމަ ހާފުގައެވެ.
ނޭމާގެ ގޯލުން ބްރެޒިލް ލީޑު ނެގިއިރު މި ގޯލް އޭނާ ކާމިޔާބުކުރީ ކްރޮއޭޝިއާގެ ޕެނަލްޓީއޭރިއާ ތެރެއަށް ވަދެ އެޓީމުގެ ކީޕަރު ކައިރިން ވެސް ނައްޓާލުމަށްފަހު ފޮނުވާލި ހަމަލާއަކުންނެވެ.
މިި ގޯލާއެކު ބްރެޒިލްގެ ގައުމީ ޓީމަށް އެންމެ ގިނަ ލަނޑު ޖަހައިގެން ޕެލޭ ހަދާފައިވާ ރެކޯޑާ ނޭމާ ވަނީ އަރާ ހަމަކޮށްފަ އެވެ. އެއީ 77 ގޯލެވެ.
ބްރެޒިލް މޮޅުވާން ދަނިކޮށް އިތުރު ވަގުތުގެ ފަހު ހަތަރު މިނެޓްގެ ތެރޭގައި ކްރޮއޭޝިއާގެ ބްރޫނޯ ޕެޓްކޮވިޗް ވަނީ އެޓީމަށް ނަތީޖާ ހަމަހަމަކޮށްދީފަ އެވެ.
ވޯލްޑް ކަޕްގައި މިހާތަނަށް ކްރޮއޭޝިއާ ޕެނަލްޓީ ޝޫޓަކުން ބައްޔެއް ނުވެއެވެ.
Advertisement
This content is created and paid for by advertisers and does not involve Voice Journalists
